ЎЗБЕКИСТОН: “БИРДАМЛИК” ХАЛҚ ДЕМОКРАТИК ҲАРАКАТИ ОҒИР ЖУДОЛИККА УЧРАДИ

Акромхўжа Муҳиддин

            Куни кеча,  25 июнь куни “Бирдамлик” Халқ демократик ҳаракати Ўзбекистон бўлими шижоаткор  фаолиларидан бири Акромхўжа Муҳиддиновдан жудо бўлди.

            Эндигина ўзининг 59 баҳорини қарши олган “Бирдамлик” фаоли жамоат жойида,  Янгийўл туманидаги Лаззат чойхонаси биқинидаги дўконда тамаки харид қилаётганида  чавақлаб кетилди.

             Бу ҳақда 26 июь куни эрталаб соат 7.00 ларда телефон орқали хабар топган “Бирдамлик” халқ демократик ҳаракати Ўзбекиcтон бўлими етакчиси Малоҳат Эшонқулова Ҳаракатнинг Тошкент вилоят бўлими етакчиси Саноат Абдураҳмонова билан Янгийўл тумани Убай Мусаев Қишлоқ фуқаролар йиғини, Қора тепа маҳалласидаги Акромхўжа ака истиқомат қилаётган  хонадонга соат 11.00 ларда етиб борди.

           – Биз борганимизда марҳумнинг якка-ю ягона қизи фарёд чекиб ўтирарди. Қариндош-уруғлар эса жоназа тараддусида юришган экан. Уйда Акромхўжа аканинг рафиқалари кўринмади. Суриштириб билдикки, марҳумнинг жасади  ҳали моргдан келтирилмаган экан, – дейди Малоҳат Эшонқулова биз билан суҳбатда, – Орадан бир соат ўтгач, чамаси 12.00 ларда ҳовлида қий-чув бошланди. Икки йигит марҳумни кўтариб киришди. Акромхўжа ака билан охирги бор дийдорлашиш ва хайирлашиш учун марҳум қўйилган хонага кирдик. Акромхўжа ака гуё мийиғида жилмайиб тургандек ётарди. Марҳумдан  рози-ризолик олгач, фурсат пойлаб, минг-бир изтироб билан Акромхўжа аканинг рафиқасини суҳбатга тортдим.

             – Ҳар куни кечки соат  19.00 ларда мен бозордан қайтардим. Акангиз эса менинг юкларимга кўмаклашиш учун Чархпалак – Лаззат кафесининг ёнида мени кутиб турардилар. Йўловчи транспортдан тушганимда ҳар доимгидек кутиб турган эканлар. Бозорлик молларим солинган сумкани кўтаришга кўмаклашдилар. Лағомон танаввул қилгим келаяпти, кел, шу ошхонада тамадди қилиб олайлик дедилар. Қаршилик қилмадим. Шу пайтда қизим ҳам ишдан қайтиб қолди. Она, қизим, биз билан овқатланмайсанми, дедилар қизига. Қизим эса сизлар бемалол ўтираверинглар, мен уйга борай, деб биз билан ўтиришга унамай, уйга кетди. Енгил-елпи тамадди қилиб олганимиздан кейин, Акромхўжа акангиз қизимга ҳам бирор егулик олиб кирайлик, деб тўрт дона манти олдилар. Шу топда кафеда ичиб ўтирган маҳалламизда яшовчи  уч нафар эркак кишилар кутилмаганда хўжайинимни сўкиб, ҳақоратлаб кетишди. Оғизга олиб бўлмайдиган ҳақоратлардан мен ҳам қуруқ қолмадим.

         Биз, эр-хотин уларга норози қараб, чойхонадан чиқиб, унинг ёнгинасидаги дўконга кирдик. Мен шакар олиб, эримнинг  машинасига қўйиш учун ташқарига чиқдим. Турмуш ўртоғим тамаки олиш учун дўконда ушланиб қолди.  Мен чиқаётганимда кўзи қонга тўлган уч нафар эркак кишининг дўконга кираётганларини кўргнадим. Аммо кейин ичкарида нима бўлганини билмайман. Дўкон сотувчиси Раҳимжоннинг айтишига қараганда, маҳалламизга яқинда оиласи билан Тошкент шаҳридан кўчиб келган 1992 йилда туғилган Мирислом деган йигитча э, йўқ, бе йўқ, Акромхўжа акангизнинг ортидан ҳамла қилган ва жигар қисмига уч-тўрт бор пичоқ урган.

          Шовқиндан ҳовлиқиб, дўконга кирганимда Акромхўжа акангиз қонга беланиб ётарди. Пичоқ шунчалар чуқур кирган, қорин қисмини ёриб ташлагандики, эримнинг ичак-чавоқлари ташқарига чиқиб, осилиб ётганди. Уч нафар қотиллар эса қочиб улгуришган экан.  Тез ёрдамга бир эмас, минг мрата қўнғироқ қилдим, аммо гўшакни ҳеч ким кўтармади. Жон ҳолатда эримни судраб-суяб катта бетонка йўлга олиб чиқдим. Бир соатлар чамаси машина тўхтатишга уриндим. Бу орада, Акромхўжа акангизнинг жигари жароҳатланган эмасми, бор қони оқиб, тугаб-тамом бўлганди. Ҳадсиз қонни кўрган шафёрларнинг бирортаси тўхтай, жарбдийдага кўмак берай демасди. Охири, бетонкадаги асфальт йўлга, машиналар балони остига узала тушиб ётиб олишга мажбур бўлдим. Мени босиб кетишдан қўрққан бир жигули ҳайдовчиси ҳартугул тўхтади. Икки йигит Акромхўжа акани машинага олди. Бироқ, кўргулик экан, эрим то Янгийўл шаҳар шифохонасига қадар етиб бора олмади. Телеграф олдига етганимизда жони узилди…. Бугун эшитдим, эримни чавақлаган Мирисломни ва унинг икки нафар гумаштасини Ички ишлар ходамлари тутиб келишганмиш. Кеча Акромхўжа акангизни шифохонада қолдирдик, ўзимиз эса тунги соат 3.00 га қадар  туман прокуратурасида тергов бердик.  Эрим шундай аянчли тарзда, кўз ўнгимда жон беради деб ҳеч ҳам ўйламаган эдим. Энг аламлиси, бу Мирислом деган йигитни умуман танимаймиз. Маҳалламизга кўчиб келганига 1-2 йил бўлган. Кўча-куйда кўришиб, салом-алик қилганмиз, холос. Аммо уларнинг эримда, бизнинг оиламизда қандай хусумати борлигини ҳечам тушуниб ета олмаяпман, – дейди оғир жудоликдан, аламли ғамдан адо бўлган марҳумнинг рафиқаси  Муҳаббатхон опа андуҳ билан.

       Эслатиб ўтамиз, Акромхўжа Муҳиддинов  2007-2008 йилларда “Бирдамлик” халқ ҳаракати ўзбекитсон бўлими етакчиси сифатида фаолият олиб борган. Шу нарса аниқки, тиниб-тинчимас Акромхўжа аканинг иродасини ҳеч бир нарса  бука олмас эди. Кейинги пайтларда  Акромхўжа аканинг танқидий-таҳлилий мақолалари, ранг-баранг хабарлари  Хўжа Ҳақназар тахаллуси билан “Бирдамлик” сайтининг мазмундорлигини оширишда хизмат қилиб келган.

        Охирги маротаба Ҳаракат томонидан Акромхўжа Муҳиддиновга шижоатли фаолларидан бири, асли Қашқадарё вилоятининг Шаҳрисабз туманида туғилган, айни дамда Янгийўл туманида фаолият юритувчи Инобат опа Хидировани излаб топиш ва опа билан алоқага киришиш борасидаги    топшириқ юклатилган эди.

         Инобат Хидировани суриштириш ишлари билан машғул бўлган Акромхўжа Муҳиддинов бугун орамизда йўқ.

          Бугун, 26 июль куни Акромхўжа Муҳиддиновни оиласи, дўстлари охирги манзилга кузатдилар.

         Чуқурроқ мушоҳада қилиб кўрилса, қотилликга қўл уриш даражасидаги муаммонинг, низонинг ўзи бўлмаган, аслида. Шундай экан, ёшгина йигит – Мирисломнинг қўлига тиғ олишга, бир инсоннинг ҳаётига зомин бўлишга нима мажбур қилди?

         Бу  каби адоқсиз саволларга жавоб топишга уринамиз, ўйлаймиз. Ўзининг жонкуярлиги, ҳарактачанлиги, ҳақгўйлиги билан Янгийўл туман ҲОКОНларининг жиғига тегиб юрган Акромхўжа Муҳиддинов кейинги фаолияти давомида  яна қай бир арбобнинг “думини босиб қўйган” бўлиши мумкинми? Мумкин! Юқорида айтиб ўтганимиздек, Акромхўжа аканинг иродасини букиб бўлмасди. Назаримизда, ҳукуматнинг куч ишлатар тизимлари Акромхўжа аканинг шунчаки кўзини қўрқитиб қўйиш учун руҳий таъсир кўрсата оллмагач, А. Муҳиддиновни жисмонан йўқ қилишга бел боғлаган бўлиши ҳам эҳтимолдан ҳоли эмас.

          Бундан хулоса қилиш мумкинки, ҳақ учун, ҳақиқат учун йўўлга чиққан ҳар бир мухолифат фаолининг жонига, ҳар бир ҳуқуқ ҳимоячисининг танига Ўзбекистон деб аталмиш адолатсизликлар оролида ҳар дамда, ҳар сонияда айнан мана шу тақлиддаги аянчли ўлим хавфи соя солиб турган бўлиши мумкин. Бу аниқ.  Эртага куч ишлатар тизимларнинг чангалига тушмаслигимиз, қурбонига айланиб қолмаслигимиз учун ҳам бирликни, бирдамликни қўлдан бой бермаслигимиз лозим.

 

 

            “Бирдамлик” халқ ҳаракати Ўзбекистон бўлими Матбуот маркази

Copyright © 2018 Birdamlik.Info