Мирзачўл туманидан меҳмонга келган қариндошим турмуш ўртоғи Россияда ишлаётганлиги, биринчи бор пул жўнатганлигини айтиб, Жиззах шаҳар банкларининг бирига пулни олиш учун бирга боришимни таклиф қилди. 2012 йилнинг 12 ноябрь, душанба куни эрталаб иккимиз Жиззах шаҳрига бордик. Аввало, Иппотека банкига бордик. Навбатда турганларнинг охири кўринмади. Халк банкига бордик. Электор токи йўқлиги учун ишламаётганлигини айтишди. Шу ерда турган бир киши Вилоят биржа биноси ёнидаги Алоқа банкида ҳам пул ўтказмалари берилиши ҳақида хабар бераркан, бизга ўша жойга боришимизни маслахат берди.
Иккимиз биргалашиб айтилган банка бордик. У ерда хам одамлар тирбанд экан. Бир аёл келган мижозларни рўйхатга олиб, навбатдаги номерга ёзилар экан. Қариндошим ҳам навбатга ёзилди. Биз борган вақти соат 11 лар бўлиб қолган, бу пайтда ҳали банкнинг четдан келаётган пулларни тарқатиш бўлимии ишламаётган экан. 60 га якин киши кутиб ўтирдик. Шу пайт шу ерда турган бир аёл хаммадан 500 сўм беришимизни сўради. Нима учун деб сўраганларга <<банкнинг қоғози учун>> дея жавоб берди. Пул олиш учун навбатда турганларнинг ҳаммаси 500 сўмдан йиғишди. Шу тариқа тахминан 60 кишидан тахминан 30.000 (ўттиз минг) сўм пул қўлма қўл ичкарига узатилди.
Россия ёки бошқа давлатда мусофирликда, Ватанидан, ота-онаси, жигарлари, бола- чакаси дийдоридан йироқда балким минг азобда ишлаб яқинларига пул жўнатаётган юртдошларимиз жўнатмани жўнатаётган пайтларида банк харажатларини ҳам тўлашса керак? Ёки йўқми? Битта кишига неча варақ қоғоз кетади? 30.000 сўмга қанча қоғоз сотиб олиш мумкин? Банкирларнинг мижозлардан <<қоғоз учун>> деб пул йиғиб олишини уят, шармандалик ҳол деб биламан. Банк қоғоз учун пул тополмайдими? Банклар келиб тушаётган чет эл валюталаридан фойда олмайдими? Бир кунда тахминан 30.000 сум йиғилса, ўн кундачи, бир ойдачи? Бу пулларни ким йиғиб олаяпти, қаерга кирим қилинаяпти, қандай сарфланаяпти? Бундай ҳолатни тегишли ташкилотлар назоратига олишса яхши бўларди. Токи, бундай беъмани йиғимни бошқа банклар ҳам ўзларида жорий қилиб олишмасин.
Саида ҚУРБОН
“Бирдамлик” Халқ Демократик ҳаракати Жиззах вилоят бўлими етакчиси