Малоҳат ЭШОНҚУЛОВА: Менга “Сиёсатдан шунчалар нольмисиз? Битта ўзбек аёлининг ҳаёти икки давлат ўртасидаги дипломатик алоқаларга совуқчилик солишга арзийди деб ўйлайсизми?” дейишганди…
Дунёнинг ишлари қизиқ…
Табиатан мен ўта ўжар ва ўз билганимдан қолмайдиган “билимдон” бандаман.
Худди ўша феълим – ўзимбилармонлигим ҳақиқатдан ҳам бошимга ҳадсиз кулфатлар келтиради…
Нима деб ўйлайсиз? Менда мамлакатимизда фаолият юритаётган элчихоналарга мурожаат қилиш истаги туғилиб қолди-ю, ҳеч бир ўйлаб ўтирмадсан, мурожаатномани ёзиб юборганман деб хаёл қиласизми?
Йўқ.
Олдин ўзим сиёсатда билимдон деб билган айрим кекса мухолифат вакиллари билан обдон маслаҳатлашиб кўрдим.
Шунда ақилли маслакдошларимиздан бири: “Сизни сиёсатдан шу даражада саводингиз йўқ деб ўйламагандим. Ахир, ўзингиз ўйлаб кўринг, битта ўзбек аёлининг ҳаёти икки давлат ўртасидаги дипломатик алоқалардан устун қўйилади деб ўйлайсизми? Албатта, ҳар қандай мамлакат ҳам сизнинг иддаоларингизга аниқлик киритаман деб Ўзбекитсон билан ҳамкорлигига путур етиб қолишини истамайди. Мабодо, Худо кўрсатмасин, сизнинг заҳарланиб қолганлигингиз (ким томониданлиги, албатта, гарчи мавҳум бўлса-да) исботини топгудек бўлса, давлатлараро дўстона алоқалар савол остида қолади, ўртага шубҳа, совуқчилик тушади, маслаҳатим, мурожаат қилишдан тийилинг-да, соғлик керак бўлса, яширин йўллар орқали маҳаллий тиббиёт ходимларига мурожаат қилиб кўринг. Эсингизни йиғинг” дея олтинга тенг оқилона маслаҳат бергандилар….
“Ўйлаб кўраман” дедим-у, барибир ўз билганимдан қолмадим.
Афтидан, маслакдошимиз айтганидек, “Биттагина ўзбек аёлининг ҳаёти икки давлат ўртасидаги дипломатик алоқалардан муҳимроқ ва устунроқ” эмаслигини бу оқсоқ ақлим амалда исботлаб қўйишни истади чоғи…
Менинг ишончли тиббий кўрикдан ўтказишларини сўраб ёзган мурожаатимга Германия, Франция, Англия каби ўзга бирор бир элчихона вакиллари томонидан эътибор берилган эмас. Юборилган электрон хатларимга ҳатто бирор бир жавоб ҳам бўлмади.
Тан олишим керак, оҳимга ёлғизгина АҚШ элчихонаси вакилларигина эътибор қаратишди. Элчихонага, учрашувга чақиришди, бир соат давомида суҳбатда бўлишди. Менинг арз-додларимни сабр-тоқат билан тинглашга ўзларида куч ҳам топишди.
Шуни алоҳида қайд қилишим керакки, АҚШ элчихонаси ҳам ривожланган мамлакатларнинг ўзга элчихоналари вакиллари каби кўзларини кўр, қулоқларини кар қилиб, “Бор-э” дея бепарво қўл силтаб қўя қолишлари мумкин эди.
Эҳтимол, кимдир шунчаки расмиятчилик юзасидан чақирди дер, балки бошқа биров ўзгача талқин қилишни хуш кўрар, нима бўлишидан қатъий назар мен ҳар қандай ҳолатда ҳам АҚШ элчихонасининг эътиборидан чексиз миннаддорман.
Мендек касални лоақал кўзлари билан кўриб қўйишга бир бора бўлса ҳам қизиқиб кўришди-ку, шунисига ҳам ташаккур. Мени эшитишга вақт ажратишди, тинглашга тоқат топишди-ку…
Аллоҳнинг бандаларида шукроналик туйғуси ҳам бўлиши керак…
Халқимизда бир ҳикматли ибора бор: “Яхшига қилсанг яхшилик – ҳам айтадур, ҳам қайтадур, ёмонга қилсанг яхшилик, на айтадур, на қайтадур” дейишади…
АҚШ элчихонасининг одамийлигини эътироф этмагудек бўлсам, мен томонимдан ўта инсофсизлик бўлар-ов деб ўйладим.
Шу боис ҳам эътирофларимни эълон қилиб қўйсам дегандим… Токи тўрт томонга турфа туҳмат фикирлар тарқалиб кетмасин…
Аслида менинг айниқса жаноб Эрик Коллингсга ҳурматим баланд. Гарчи АҚШлик бўлса-да, Жаноб Эрик Коллингс ўзбек тилимизни мукаммал билиши, нафақат тўлиқ тушиниши, балки гапира олиши билан менинг меҳримни қозонган.
Ёрдам сўраб элчихоналарга мурожаат қилиш менинг ҳуқуқим эди. Кўмак бериш ёки бермаслик элчихоналарнинг ҳуқуқи, истак ҳоҳиши.
“Менга ишончли тиббий кўмак керак” дея қилган сўровимга жавобан на АҚШ элчихонаси ва на бошқа бир элчихона вакиллари бу ўтинчимни ижро этишга, менга кўмак қилишга мажбур эмаслар.
Буни тўғри тушунаман.
Аслида йиллаб юрагимда йиғилиб қолган зардобларни АҚШ элчихонаси вакилларига тўкиб солишимнинг ўзи ҳам менинг анча енгил тортишимга кўмак берди.
Ўз жонимни асраш илинжида АҚШ элчихонаси вакилларини ноқулай вазиятда қолдирганимдан жудаям ҳижолатдаман.
АҚШ элчихонаси маҳаллий клиникаларга мурожаат этишим мумкинлигини маслаҳат беришганлари ҳам рост.
Маҳаллий шифохоналарга мурожаат этишга ҳақли эканлигимни эсимни таниганимдан бери биламан. Бироқ, муаммо шундаки, менда уларга нисбатан ишончсизлик кучли бўлганлиги сабабли ҳам Ўзбекистонлик шифокорлардан эмас, элчихоналардан кўмак сўрагандим-да.
Мабодо, маҳаллий шифокорларга кўриниш мени бу қадар чўчитмаганида эди, элчихоналарга мурожаат қилиб, таъналар остида қолиб ўтирмасдим, аксинча, аллақачонлар тиббий кўрикдан ўтган бўлардим.
Тан оламан, ишончли тиббий кўмак кўрсатишларини сўраб мурожаат ёзиб, АҚШ элчихонасини ўта ноқулай аҳволга солиб қўйишим, менинг сиёсий савиямни етук эмаслигидан далолат.
Мен мухолиф ҳаракатнинг етакчиси сифатида “давлатлараро низо туғдириб қўйишим мумкинлигини” тўлиқ англаб етишим ва масъулиятни ҳис қилган ҳолда саломатлигим хусусида қайғуришнинг ўзга усулларини қидириб топишим лозим эди.
Шу боис ўз ўринсиз мурожаатим билан мамлакатимизда фаолият юритаётган элчихона вакилларининг, айниқса, АҚШ элчихонаси расмийларининг ҳаловатларини бузиб қўйганим, хотиржамликларига халал берганим учун минг бор узр сўраб қўйишни бурчим деб биламан.
Тақдиримдан у ё бу маънода ташвишга тушаётган дўстларимга шуни маълум қиламанки, мени эртага нима кутаётган бўлишидан қатъий назар, маҳаллий шифокорларга кўриниш бериш ниятида эмасман.
Модомики, ривожланган димократик давлат намоёндаларининг менга ишончли тиббий кўмак кўрсатишга қўллари калталик қилар экан, лоақал Россия ва ё Қозоғистонга бориб, мазкур мамлакатлардан бирининг тиббиёт кучига таяниш ниятидаман.
Ана шу мақсадда олдимга қўйилган сунъий тўсиқларни бартараф этишга киришишим кераклигини ҳам биламан.
Менинг саломатлигим, тақдирим хусусида қай бир йўсинда бўлмасин, қайғуриш ва хавотирингизни ўз йўналишларингизга хос услубда изҳор қилганингиз учун барчангиздан миннаддорман. Ҳаммангизга катта раҳмат.
Танангиз дард нима, билмасин.