Бугун, 2014 йилнинг 5 апрел куни маҳаллий вақт билан тахминан соат 12.30 ларда Эшонқулованинг қўл телефони жиринглаган.
Одатига кўра гўшакни бемор онасига “котиба”лик қилаётган “Бирдамлик”нинг заҳарланган бўлиши тахмин қилинаётган лидери Малоҳат Эшонқулованинг тўнғич қизи Зарнигор Ҳакимова кўтарган.
“Бу фуқаро Эшонқулова Малоҳатнинг телефон рақамими? Мен – Тошкент вилояти, Зангиота туман прокуратурасидан безовта қилаяпман. Эшонқуловани телефонга мумкинми?” деган телефон ортидаги овоз.
Зарнигорнинг “Йўқ, аям бетоб эдилар. Дам олаяптилар, сиз билан гаплаша олмайдилар” деган сўзларига жавобан ходим томонидан “У ҳолда фуқаро Эшонқуловага айтиб қўйинг, зудлик билан Зангиота туман прокуратурасига келиб учрашсин” деган буйруқ бўлган.
Хасталиги сабаб Зангиота тумна прокуратурасига – Келисга бора олмаслигига кўзи етган Эшонқулова +998981 2333632 – рақамини кўп кечиктирмай қайта терган ва прократура ходимига бетоблиги сабабли Келисга бора олмаслигини маълум қилган.
Эшонқулованинг “Кечирасиз, ўзи мен ким билан гаплашаяпман? Сиз ким бўласиз? Ва мени айнан нима мақсадда чақиртирмоқдасиз?” деган сўровига гўшак ортидаги овоз “Мен Зангиота туман прокуратурасидан Сарварман. Сиз юқори идораларга шикоят ариза йўллагансиз. Марҳамат қилиб келиб, шикоят аризангиз юзасидан “Тушунтириш хати” ёзиб беришингизнига тўғри келади” деган талабни қўйган.
“Сарваржон, сизни тушунмадим? Мен ҳукумат идораларига юзлаб шикоятлар ёзганман. Лекин ҳали бирор бир прокуратура ходими мендан тушунтириш хати ёзиб беришимни талаб қилмаганди. Муаммо нимада ўзи? Аризам юзасидан айнан шу кеча-кундузда “Тушунтириш” талаб қилинишининг синоати нимада? Ваҳоланки, мен барча иддаоларимни ҳамиша ўз аризаларимда аниқ-тиниқ баён этиб келганман-ку?” ажабланди Эшонуқлова.
“Модомики, келолмас экансиз, у ҳолда сиздан тушунтириш хати олиб келиш учун уйингизга участка нозирларини юборамиз” гапни қисқа қилди ўзини прокуратура ходими деб таништирган Сарвар исимли йигит.
Ҳозирча, Зангиота туман прокуратураси ходими Сарвар ваъда қилган участка нозири “Тушунтириш хати” олиш мақсадида “Бирдамлик” Халқ Демократик Ҳаракатининг Ўзбекистон бўлими етакчиси, ўзининг заҳарланиб қолган бўлиши мумкинлиги хусусида мамлакатдаги мавжуд элчихона ва дипломатик корпус вакилларига мурожаатнома тарқатган Малоҳат Эшонқулованинг эшигини таққиллатиб келган эмас.
Ўз тахминларига таянган ҳолда Эшонқулованинг ўзи мазкур вазиятга : “Прокуратура ходимларининг мени қидириб қолишлари заҳарланиш ҳақидаги иддаомдан кейин рўй бериши шубҳали. Ҳойнаҳой менга қарши қонун қўли билан жиддий провокация уюштирилаётган бўлса ҳам ажаб эмас” дея баҳо бермоқда.
Дарҳақиқат, Малоҳат Эшонқулованинг элчихоналарга қилган заҳарланишга оид мурожаатидан кейин прокуратура ходимлари “Бирдамлик”нинг бетоб лидерини йўқлаб қолишганлари ростанам қизиқ…
“Бирдамлик” Халқ Демократик Ҳаракати матбуот хизмати