Куч ишлатар тизими ходимлари 2014 йилнинг 25 апрел куни “Бирдамлик” Халқ Демократик Ҳаракати офисига ноқонуний йўллар билан киришга уринган.
Бу ҳақда бизга “Бирдамлик” Халқ Демократик Ҳаракати Ўзбекистон бўлими “Ёшлар” қаноти фаоли Зарнигор Ҳакимова хабар берди.
“Ёшлар қаноти” фаолининг сўзларига кўра, Қулитойда кутилаётган меҳмонларни муносиб кутиб олиш мақсадида унинг синглиси Зарҳала Ҳакимова саранжом-саришта қилиш мақсадида бугун тушликдан кейин Ҳаракат офисига ўтган.
Маҳаллий вақт билан кеч соат 18.000 ларга яқин, қош қорая бошлаганда ичкаридан тамбаланган Ҳаракат офисининг эшигига орт томондан – ташқаридан калит солинган.
Эшик ортидаги одам пастки қулфни очишга узоқ уринган.
Бу уринишлар ниҳоясига етавермагач, эшик “глазог”идан секингина ташқарини кузатган Зарҳала Ҳакимованинг кўзи бирлари ИИБ формасида, иккинчиси фуқаро кйимида бўлган икки нафар эркак кишига тушган.
Нотаниш эркакларнинг ҳаракатидан қўрқувга тушган қизалоқ воқелик хусусида зудлик билан телефон орқали опаси Зарнигор Ҳакимовани огоҳ этган.
– Ҳаракатнинг Ўзбекистон бўлими етакчиси – ойижоним -Малоҳат Эшонқулова бетоблигига қарамасдан Қурилтойда иштирок этиш масъулиятини ҳис этганлари учун Самарқнаддан куни кеча Тошкентга қайтишга мажбур бўлгандилар. Мен офисдаги ҳолат хусусида аяжонимга хабар берсам бўларди. Бироқ, улар ҳамон бетоб, кучли толиқиш, ҳолсизликдан силласи қуриган. Уларга айни дамда ҳаяжонланиш, асаббузарлик қилиш мумкин эмас. Шу сабаб ҳам опа-сингил офис масаласида аяжонимни безовта қилмасликка келишдик. Шунинг учун ҳам офисга зудлик билан ўзим етиб боришимга тўғри келди, – дея ҳикоя қилади Зарнигор Ҳакимова, – Офис эшиги тагида ҳақиқатдан ҳам бири ИИБ формасидаги, яна бири фуқаро кийимидаги икки нотаниш эркак кишилар туришарди.
Уларга берган илк саволим шундай бўлди: “Кимсизлар? Милиция формасидаги замонавий қароқчимисизлар? Бировнинг шахсий мулкига кўз олайтиришга, бировнинг эшигига калит солишга сизларга ким ҳуқуқ берди?” дегандим, ИИБ ходими “Биз эшик қулфини очишга уринмадик, шунчаки тақиллатдик, ҳеч ким очмади. Бу хонадонда ҳеч ким турмаслиги сабаб яқинда ўғри тушганди. Шу ҳолат бўйича хабар олгани келгандик. Бу уйга бир аёл масъул экан. Лекин негадир ўша аёл уйнинг кимнинг номида эканлигини орган ходимларидан сир сақлаб келмоқда. Сайлов яқинлиги сабабли, биз хавфсизлик нуқтаи назаридан ҳар бир хонадонларни назоратдан ўтказишимиз ва хотиржамликка замин яратишимиз зарур. Бизга шундай топшириқ бўлган. Бугун бу уй эгаси номаълум эканлиги сабаб, эшикни муҳирлашга мажбурмиз” дея жавоб қайтарди.
– “Сиз ўзингиз кимсиз? Шахсингиз, хизмат вазифангизни тасдиқловчи ҳужжатингизни кўрсам бўладими?” деган саволимга ИИБ формасидаги ходим “Мен шу ернинг участка нозираман, мана ҳужжатим дея қандайдир гувоҳномани узоқдан кўрсатиб қўйди. Иккинчи кишига юзлангандим, фуқаро формасидаги киши “Менинг кимлигимни билишингиз шарт эмас. Биз хизматдаги одамлармиз. Хизмат бурчини бажарувчилармиз” деди совуқ оҳангда. “Яхшиси, бу уй кимга тегишли, эгалари қаерда, шулар ҳақида маълумот беринг” дея талаб қилиб қолди. Ўз навбатида мен ҳам уларга қарата “Кимлигингиз, қандай вазифада ишлашингизни айтмаслигингиз мумкин, лекин мен қайси ташкилотдан эканлигингизни билиб турибман. Айтишингиз ҳам шарт эмас. Мен ҳам бу уй кимга тешили эканлигини айтишим шарт эмас деб ўйлайман. Негаки, “Бу уй кимга тегишли, хонадонга қараб туришга ким масъул, бу уйга бугун сизларни нима етаклаб келган?” – барчасидан воқифсиз. Алдаб нима қиласизлар? Ҳаммасини аниқ-тиниқ биласизу, яна мени сўроққа тутасиз. Мен сизларга ёш бола эмасман. Бу уй Бекзод Чориевнинг номида эканлигини ҳам биласиз. Бу уйга ўғри тушганида, уларни Шаҳрисабздан чақиртириб, уй эгаси сифатида Бекзод акадан “прокуратурага шикоят қилманг, ҳеч кимга ҳеч қандай даъвойим йўқ” деб ёзиб беришларини талаб қилганлар ҳам сизлар эмасми? Уларнинг Тошкентга келганлиги, сизларга учрашганлигидан ҳам хабарим бор. Бировнинг хусусий мулки эшигига калит солишга умуман ҳаққингиз йўқ. Эшикка калит солмадим деб мени алдашга уринманг, негаки, ичкарида ишларингизга гувоҳ бўлиб турган одам бор. Ёлғонларимга ишонтираман деб овра бўласиз. Ўзганинг эшигини ноқонуний очишга уринганлигингиз учун юқорига шикоят қилишимиз мумкин. Ҳаммасини била туриб, атай келибсизларми, айтингчи, биздан, аямдан, бу хонадондан айнан нима истайсиз?, – дея дангал савол қўйдим.
Чақирилмаган меҳмонлар “У ҳолда онангизга айтинг, эртанинг ўзидаёқ уй ҳужжатларини олиб, участка нозирининг хонасига борсин ва менга учрашсин. Акс ҳолда эшикни муҳирлаб қўймиз” деб ортларига қайтишди.
Мен ҳам ортимга қайтарканман, синглимга “супир-сидирни бўлгач, хоналарни саранжом-саришта қилиб, уйга қайтавер” деб тайинладим.
Кўп ўтмай синглимнинг телефонда безовтали овози эшитилди: “Эшикнинг пастки қулфини ана у келган орган ходимлари бузиб кетишибди. Қулфга бегона калит солишганми ё сим, мих тиқишганми, эшик умуман қулфланмаяпти. Фақат битта тепа “замог”ини қулфлаб кетишим мумкин” деб қолди зорланиб.
Офис эшигига иккита қулф ўрнатилганди.
Тепа қулфни бузишнинг имкони йўқ. Мустаҳкамроқ эди. Шу сабаб ИИБ формасидаги “меҳмон”лар пастки қулфни бузишгагина муваффақ бўлишган экан.
Ноилож қолган синглим биргина тепа қулфни маҳкамлаб, уйга қайтди, – дея ҳикоясига якун ясади “Бирдамлик” ХДҲ Ўзбекистон бўлими “Ёшлар қаноти” фаоли Зарнигор Ҳакимова.
Айни масала юзасидан Ҳаракатнинг Ўзбекистон бўлими етакчиси Малоҳат Эшонқуловани безовта қилишга мажбур бўлдик:
– Сизнингча, орган ходимлари нима учун офис эшигини очишга уринган бўлишлари мумкин? – деган саволимизга етакчи “Мен бетоблигим сабабли, анчадан буён Самарқандда эдим. Тошкентга қайтишимга оилам қаршилик қилгандилар. Шу сабаб Қурилтойда иштирок этиш-этмаслигим ҳам сўроқ остида эди. Эҳтимол, мени Тошкентга қайтмайди дея бепарво бўлган куч ишлатар тизимлар пойтахтга қилган кутилмаган ташрифимдан ташвишга тушган бўлишлари ҳам мумкин. Менинг Тошкентда пайдо бўлишим “Ҳаракат офисида Қурилтой иштирокчилари жамул-жам бўлади” деган маънони англатади. Қолаверса, кун бўйи мен Қурилтой иштирокчилари билан телефонда, интернетда боғландим, Қурилтой режалари хусусида ўртоқлашдим. Юқоридаги кўнгилсиз ҳолат телефон ва эл. манзилларимиз қаттиқ назорат остига олинганлигини яна бир бор амалда исботлаб қўйди, адашмасам. Бу ҳолат – босимлар бошланиб кетганлигидан далолат. Эртага Қурилтой иштирокчиларини нима кутаётганликларини билмадиму, бетоблигим сабаб, кўнглим ўксиб юргандим. Бугун катта қизимнинг ИИБ ва МХХ ходимлари билан бўлган тўқнашувидаги савол-жавобларини эшитиб, анча енгил тортдим. Куч ишлатар тизимларининг ходимлари билан дангал гаплашиш ҳар кимнинг ҳам қўлидан келавермайди. Ҳарҳолда муносиб издошим борлигидан хурсанд бўлиб қўйдим…. Эртага бизни қандай қисмат кутмоқда, омон бўлсак, кўрармиз, – дейди М. Эшонқулова биз билан мулоқотда.
Мухтасар қилиб айтганда, юқоридаги таҳлика ва ташвишларга тўла дараклар “Бирдамлик” Халқ Демократик Ҳаракати Қурилтойига халал бериш мақсадида бошланган босимлардан далолат. Бунга шубҳа йўқ.
“Бирдамлик” Халқ Демократик Ҳаракати Ўзбекистон бўлими Матбуот хизмати