Бугун, 2014 йилнинг 18 июн куни маҳаллий вақт билан тахминан кеч соат 20.30 ларда пойтахтнинг Чилонзор туманига қарашли Шуҳрат кўчасида катта портлаш содир бўлди.
Мазкур фожианинг гувоҳларига кўра, кучли портлаш натижасида “Шуҳрат”даги EVOS кафесининг кули кўкка соврилган.
– Ниҳоятда қаттиқ портлаш бўлди. Ёнғинни айтмайсизми? Портлаш овозини эшитган одам, лаваш, гамбургер билан савдо қилувчи EVOS кафесидан ном-нишон қолмаган бўлса керак деб ўйлаши мумкин. Ҳозир портлаш рўй берган жой милиция ходимлари томонидан ўраб олинган. Фалокат рўй берган жойга ҳеч кимнинг ўтишига изин берилмаяпти.
Мазкур кафе номозшом маҳали, айниқса, мижозлар билан гавжум бўлади. Кафенинг ўзида ҳам анчагина ишчи-хизматчилар бор эди. Ишқилиб, хўрандаларга, кафе ходимларига зиён етмаган бўлса бўлгани, – дейди портлаш манзили яқинидаги “пайнет”да ишлайдиган ҳодисанинг қисман гувоҳларидан бири.
Ҳозирча Ўзбекистон пойтахти Тошкентнинг Чилонзор туманига қарашли Шуҳрат кўчасида жойлашган EVOS кафесидаги портлаш ниманинг оқибатида рўй берганлиги номаълум.
Мазкур фожиадан жабрланганлар, яродор бўлганлар ва хатто қурбонлар ҳам бўлган бўлиши эҳтимолдан ҳоли эмас.
Айни дамда портлашнинг сабабларига оид суриштирув ишлари олиб борилмоқда.
“Бирдамлик” Халқ Демократик Ҳаракати Матбуот хизмати