Кейинги кунларда чексиз бепул интернет ҳақидаги эълонларга кўзимиз тушиб қоладиган бўлди. Нима эмиш, МТСни “бонкрот” қилиб, эндиликда ўзи ўзбекистонликларга сифатли мобил алоқа хизматини йўлга қўйишга ярамаётган Ucell мижозларига янги чексиз мобил интернет тариф режасини туҳфа этганмиш.
Ҳотамтойликни қаранг-а? Ҳой, барака топгурлар, “бепул, текин, арзон ва қулай”ликларни қўя туринг, қулоқларга лағмон осмай қўя тек қў инг, яхшиси, тўлаётган соққамизни ҳалоллаб олингу, сифатли хизмат кўрсатинг, деворгинг келади гоҳида.
Дарвоқе, то тунги соат 12 га қадар Ucell алоқа тармоғи орқали интернетга уланиш умуман имконсиз. Кун бўйи интернетга боғланиб бўлмаганидан кейин ўйин қилишади – арзон ва осон дейишади-да.
Ucellда чексиз мобил интернет тарифи ростданам арзонми, йўқми, билмадиг-у, аммо Ucell нинг MAX интернет пакетлари қимматлашганидан бохабармиз.Яқин-яқингача MAX интернет пакетидан 10$ га 2000 мегабайт олиш мумкин бўларди.
Куни кеча эса, мазкур тариф қимматлаганидан, 10$га 1500 мегабайт олиш мумкинлигидан хабар топиб қолдим.
Ҳисобимни 11$ дан ортиқроқ маблағ билан тўлдириб, 10$ га 2000 мегабайт сотиб олмоқчи эдим, афсуски, менга 1500 мегабайт берилди. 500 мегабайт зиён қилишимни билганимда Ucellнинг интернет хизматидан фойдаланмаган бўлардим, аттанг.
Ucell нуқул қаллоблик қилади, мижозларни алдаб, фойда орттиришни кўзлайдиган кўринади. Аслида МТСнинг эмас, Ucell нинг умри тугаса айни муддао бўлар эди.
Ушбу алоқа компаниясининг қаллоблиги, кирдикорларини мендан бошқалар ҳам сезиб қолишган чамаси, қаранг, кейинги уч ой давомида 1,5 миллиондан ортиқ мижоз Ucellдан қўлини ювиб, қўлтиғига суришган экан. Энди мени галим…
Мақсуда ҚИЛИЧЕВА