Байрамлар ҳар қандай мамлакатларда халққа хурсандчилик, файз олиб келади.
Одамлар бир-бирларини табриклашади.
Хурсандчилик килишади.
Биздачи? Хатто коммунистик мафкура ҳукм сурган Советлар даврида ҳам байрамларни ёш болалардан бошлаб, ёши катталаргача орзикиб кутишарди.
1991 йилдан кейин ҳам ушбу тенденция анча вақт давом этди.
Вазият 1999 йил 16-февралидан кейин тубдан ўзгарди.
Байрамлар яқинлашаётгани сайин халққа ноқулайлик кўпая бошлайди.
Ишхоналарда тунги навбатчилик, пойтахтга йўловчи автобусларнинг киритилмаслиги, милиция ходимларининг уйма-уй кириб паспорт сўрашлари ва х.к.
Нега бизда бундай? Нега бизда ҳаммаси тескари?
Ҳукумат халқдан нимага бунчалик қўрқади?
Ҳатто 14 кишидан, атиги 14 кишидан.
Мен Олой бозорида Бирдамлик Халқ Демократик Ҳаракатининг ОШ тадбири иштирокчиларининг кичик қатағонини назарда тутаяпман.
Нимага тузум мухолифат вакилларининг талаб-таклифларини умуман инобатга олмайди?
Ахир улар хам шу заминда туғилишган, шу заминда катта бўлишган.
Президент айтганидай шу азиз ватан барчамизники эмасми?
Инобатга олиш у ёқда турсин, душман сифатида қарайди. Агар ҳукумат 22 йилдан бери амалга ошириб келаётан иқтисодий, пул кредит, ижтимоий сиёсат нотўғри бўлмаганида ишсизлик даражаси, инфляция бунақа астрономик даражага етмас эди-ку! Наҳотки, Президент Каримов умуман хато қилмаса, ҳатто пайғамбарлар ҳам хато қилишмаганми? Наҳотки, Президентнинг хатосини айтиш кечириб бўлмас гуноҳ, бўлса? Президент ҳам мен каби, сиз каби оддий одам эмасми?
Нимага бизнинг пулимиз, Қирғизистонни пулидан қадрсиз?
Демак, қаердадир нотўғри қарорлар қабул қилинган, демак қаердадир нотўғри тадбирлар амалга оширилган.
Нимага Ўзбекистонда иш ҳақи пасту, нарх-наво Москвадагидан ҳам қиммат? Озиқ-овқатдан тортиб, кийим-кечагу, кир ювиш воситларигача?
Демак, божхона сиёсатида қаердадир оқсаш ва коррупция иллати бор.
Нимага Ўзбекистонда чоп этилаётган газета-журналларига мажбуран обуна амалга оширилади?
Демак, Ўзбекистон газеталарини ҳеч ким ўқимайди.
Одамлар матбуотни кузатиб боришлари учун нима қилиш керак?
Қонун доирасида сўз эркинлиги берилиши керак.
Ўшанда газеталарга мажбурлаб обуна қилдириш ўз-ўзидан йўқолади.
Ваҳоланки, Конституцияда цензурага йўл қўйилмайди дейилган.
Агар мамлакатдаги камчилик муаммоларни ёзсанг, сиёсатга қарши ватан хоинига айланасан!
Нима учун нақд пул банкларда муаммо?
Демак, ўша пул кредит сиёсатини амалга ошираётган ҳукумат деймиз-ми, марказий банк деймизми, шу ваколатли орган ёмон ишлаяпти. Шу ваколатли орган накд пул муаммосини ўзи ечишни билмаса, қўшни Қозоғистон ёки бошқа мамлакатлар тажрибасидан ўрганиб, шу тартибларни жорий килиши керак.
Ёки мулозимлар ижобий силжишларни қасддан ҳоҳлашмаяптими?
Нимага Россия федерацияси Президенти Владимир Путин ўзи КГБ дан чиққан бўлса ҳам халқ билан очиқ мулоқот қилади-ю, бизда ҳатто туман, шаҳар ҳокимлари ҳам оддий халқни назар қилмайди?
Ҳукумат мухолифатдан фойдаланиб, ўзининг мулозимлари яшираётган муаммоларни аниқлаб, шу муаммоларни тузатишни ўйламайдими?
Ҳукумат қачонгача 37-йиллар ёки ўрта асрлар инквизиция усулидан фойдаланади?
Гапирсанг гап кўп…
Шу “Бирдамлик”чиларни Олой бозорига чиқишга нима мажбур қилдийкан, деб нимага ўзингизга савол бериб кўрмайсиз?
Мухолифларни дунёга келтираётган ўзларингиз-ку!
Аниқроғи, сизнинг мамлакат иқтисодиётини ўтирғизиб қўйган нотўғри сиёсатингиз!
Жамиятни либераллаштириш вақти келди.
Ҳам иқтисодий, ҳам сиёсий….
Ортиқча бундай яшаб бўлмайди.
Жамиятимизни ривожлантирадиган, қонун устунлигини таъминлай оладиган ягона илғор тизим,бу – демократия!
Конституцияни, қонунларни ҳурмат қиладиган, ҳар қандай ҳолатда ҳам қонунсизликка нозўравон усул билан курашадиган «Бирдамлик» Халқ Демократик Ҳаракатининг ОШ тадбири иштирокчиларини қатағон қилишни бас қилинг.
Наҳотки, Ўзбекистон конституциясини халққа тарқатиш жиноят бўлса!?
АҚШ ёки бошқа давлатнинг конституцияси эмас-ку, ахир!
Намойишлар қатағон қилинар экан, бўлмаса, “Бирдамлик”ни расмий рўйхатдан ўтказиб, ТВда кўрсатувлар қилишга рухсат беринглар, нимага бунчалик қўрқасизлар?!
Керак бўлса, “Бирдамлик”ка ҳам бюджетдан пул ажратинг, бошқа партияларга ажратилганидек.
Мана, Россия ТВсида Жириновский билан Зюганов ва бошқалар Худони берган куни Путиннинг сиёсатини танқид қилишади. Шу билан Путинни обрўйи тушиб қолгани йўқ.
Аксинча, халқ кимнинг сиёсати тўғрилигини дунёқарашлар рақобати орасидан ўзлари танлаб олмоқда.
“Бирдамлик”ка, бизга – оддий аҳолига ҳатто тинч намойиш қилишга ҳам имкон қолдирмаяпсизларку?!
Мухаммад Али Уроқов