Жорий йилнинг 13-июль куни ўзбекистонлик таниқли журналистлар, инсон ҳуқуқлари фаоллари, Ўзбекистон фуқаролик жамияти вакиллари Галима ва Боғила Бухорбоеваларнинг волидаи муҳтарамаси Манзура-ая Бухорбоева узоқ давом этган оғир хасталикдан сўнг 71 ёшида Ўзбекистонда вафот этди.
Айни пайтда чет элда яшаётган Галима ва Боғила Бухорбоевалар Ўзбекистонда ўрнатилган сиёсий ва диктаторларча бошқарув тартиби туфайли онаси Манзура-аяни сўнгги манзилга кузатишга бора олмаган. Опа-сингил Галима ва Боғила Бухорбоевалар 2005 йилнинг май ойида Андижон шаҳрида рўй берган воқеалар ва талатумларнинг бевосита гувоҳи сифатида туркум мақолалар ва репортажлар тайёрлагани учун ҳукумат томонидан кучли таъқибга учраган ва бунинг натижасида иложсизликдан она-ватанни тарк этган. Афсуски, бугунги кунда мамлакатдаги мавжуд сиёсий тартиб туфайли чет элда яшаётган бошқа ўзбекистонлик фуқаролик жамияти вакиллари ҳам ўзларининг ота-оналари, яқин қариндош-уруғларини сўнгги манзилга кузатишдан мосуво қолмоқда.
Галима ва Боғила Бухорбоеваларнинг падари бузруквори Сулаймон Бухорбоев 2014 йилда вафот этгандан кейин онаси Манзура Бухорбоева тез-тез касал бўлган. Боз устига ватандан олисда яшаётган қизлар соғинчи, улар билан учрашиш, дийдорлашишдаги муаммолар, ўртадаги борди-келдига қўйилган сунъий тўсиқлар онанинг тинка-мадорини кун сайин қуритиб борган.
Сулаймон ота ва Манзура ая ҳаёти давомида фақат хайрли ва эзгу ишларга қўл урган инсонлар эди. Улар ўз фарзандлари тарбиясига алоҳида эътибор қаратдилар. Бунинг натижасида фарзандлар Галима ва Боғила Бухорбоевалар тўғрисўз, илмли, зиёли, эл-юрт корига ярайдиган, ҳақиқат учун курашувчи инсонлар бўлиб вояга етишди. Опа-сингил Бухорбоеваларнинг мамлакатда сўз эркинлиги, матбуот эркинлиги, демократия ва фуқаролик жамияти равнақи йўлидаги меҳнатлари алоҳида таҳсинга лойиқ.
«Бирдамлик» Халқ Демократик ҳаракатининг етакчиси ва Ҳаракат аъзолари Ўзбекистон фуқаролик жамияти вакиллари Галима ва Боғила Бухорбоеваларга волидаи муҳтарамалари Манзура Бухорбоеванинг вафоти муносабати билан уларга ва марҳуманинг бошқа оила аъзолари ва қариндош-уруғларига таъзия изҳор қилган ҳолда сабр-тоқат тилайди. Манзура аянинг жойлари жаннат, охиратлари обод бўлсин!
Баҳодир Хон Туркистон, «Бирдамлик» Халқ Демократик Ҳаракатининг раҳбари.