Янги йил, 8-Март, Наврўз шодёналарида бир дастурхон атрофига жамул-жам бўлиш “Бирдамлик”чилар учун одат тусига кирган.
Ўзбекистонаги иқтисодий ва ижтиимоий бўйронлар киши бўғзидан олиб турган бугунги шароитда, тан олиш керак, барча фаолларимиз ҳам бирдек турмуш ташвишларидан ортиб, ҳа деганда бир жойда тўплана олишмайди.
Аслида, Ҳаракатимиз тадбирлари “Бирдамлик” ва умуман, Ўзбекистондаги барча мухолифат ва Ҳуқуқ фаолларининг бошини қовуштириш, жамулжам қилиш, бир мақсад ва бир маслак остида бирлаштириш мақсадларига қаратилган.
Айтишади-ку, “Байрам баҳона-ю, дийдор ғанимат” деб…
Бу гал ҳам шундай бўлди.
“Бирдамлик” Халқ Демократик Ҳаракати Ўзбекистон бўлими демократик жамият қуриш йўлида тиним билмаётган аёлларимизга атаб 8-Март – Халқаро Хотин-қизлар куни муносабати билан байрам тадбири ташкил этди.
Ҳаракатнинг Ўзбекистон бўлими офисида ўтказилган байрам шодёнасига жамул-жам бўлган аёлларимиз бир пиёла чой устида дийдорлашдилар, турмуш ташвишларини унитиб, бир дақиқа бўлса-да баҳор шукуҳидан баҳраманд бўлдилар.
– Мана шундай тадбирларнинг тез-тез уюштирилиб тургани яхши, – дейди “Бирдамлик” нинг Тошкент вилоят бўлими фаоли Саноат Абдураҳмонова, – Мана, 8-Март муносабати билан ёзилган дастурхоннинг шарофати билан анчадан бери кўришишга илҳақ бўлган сафдошлар билан кўришдик. Янгийўллик Муҳаббатхон билан бир пиёла чой устида кечаги бу бўлғуси ишлар хусусида гаплашиб олдик.
– Ҳозир бирор бир киши ўзидан ортадиган ва ё орттирадиган замон эмас. Замона шиддаткор. Бош қашлашга вақт йўқ. Шундай олағавур замонда “Бирдамлик” Халқ Демократик Ҳаракати барча байрамлар қаторида 8-Март – Халқаро хотин-қизлар кунида биз-Ўзбекиcтонлик аёлларни қутлашни эсларидан чиқармаганликларидан хурсандмиз, – дейди Ҳаракатнинг Тошкент шаҳар бўлими фаоли Татьяна Давлатова, – Ўтирдик, қувнадик, чиройли куй-қўшиқларга рақс тушдик. Негаки, мухолифат ва инсон ҳуқуқлари соҳасида ҳар дақиқангда кучли босим ва руҳий зўриқиш.остида яшашнинг ўзи бўлмайди. Кишини ҳам жисмонан, ҳам руҳан толиқтириб қўяди. Ўйлайманки, мана шун каби тадбирлар нозик аёлларимизнинг йилда бир бор бўлса-да борлиқни унутиб, юракдан яйраб ўтиришларига, хурсандчилик қилишиларига замин яратади. Бунинг учун “Бирдамлик”чилардан миннатдор бўлишимиз керак.
Ҳар галгидек, “Бирдамлик” томонидан ташкил этилган навбатдаги байрам базми ҳам рисоладагидек ўтди.
Тадбир сўнгида байрам иштирокчиларига – шижоаткор аёлларимизга Ҳаракатнинг байрам совғалари топширилди.
“Бирдамлик” шуни ачиниш билан таъкидлаб ўтадики, Ўзбекистоннинг энг оловқалб аёлларидан бири, “Альянс” инсон ҳуқуқлари ташкилоти етакчиси Елена Урлаева шифохонага ётқизилганлиги сабаб, Ҳаракатнинг байрам тадбирида иштирок эта олмади.
Шундай бўлса-да, “Бирдамлик”чилар байрам тадбиридан сўнг инсон ҳуқуқлари ташкилоти лидерини байрам билан қутлаш илинжида у ётган шифохонага йўл олишни режа қилишди.
“Бирдамлик” Халқ Демократик Ҳаракати Ўзбекистоннинг лобар аёллари, бутун олам хотин-қизларини 8-март – Халқаро хотин-қизлар куни билан самимий қутлайди!
Ўткир зеҳн, қилни қирқ ёрадиган ақл, битмас-туганмас ирода, аёллик иффати, меҳру-муҳаббати Сизларни ҳеч қачон тарк этмасин, муҳтарам аёллар!
Аёллик бахтидан бир умр бошингиз айланиб, сармаст юрмоқликнини Яратганнинг ўзи барчангизга насиб айласин!
Байрам муборак!
“Бирдамлик” Халқ Демократик Ҳаракати Матбуот хизмати
