Бугунги кунда демократия йўлидан бораётган мамлакатлар ўз нурли истиқболлари сари дадил одим отмоқда, дунё ҳамжамиятида ўзининг муносиб ўринини топмоқда.
Ақниқса, демократик ривожланишнинг муҳим босқичига ўтган давлатларда энг аввало аҳоли таркибининг асосий қисмини ташкил етувчи ёшларга берилган кенг имконият ва яратилган шарт-шароитларни алоҳида эътироф этиш жоиз.
Шу ўринда таъкидлаш керакки, демократик йўлни танланган давлатларда ёшларнинг ўз фикрларини эркин ифода этишлари учун бирор бир тўсиқ қўйилмаган.
Қолаверса, улар ўз ҳақ-ҳуқуқларини бемалол талаб қилиб чиқа оладилар. Агар бу талаблар қондирилмайдиган бўлса, ҳукумат томонидан эътиборсиз қолдирилса, керак бўлса кўча юришлари, пекитлар уюштириш каби қатор ҳуқуқларидан қонун доирасида фойдалана оладилар.
Бундан ташқари, ёшларнинг ийтимоий-сиёсий жабҳаларда бемалол иштирок этиши, ўз ташаббуслари билан чиқишларига ҳам ҳеч бир чеклов қўйилмаган.
Аксинча, бундай саъи-ҳаракатлар қўллаб-қувватланади ва рағбатлантирилади.
Шу аснода ёшлар томонидан билдирилган амалий таклифлар жамиятга фойдасига тегадиган соҳага йўналтирилади.
Шунингдек, демократик давлат ёшлари турли хил сиёсий партияларга, ҳаракат, жамоат ташкилотларига эркин киришлари мумкин.
Чунончи, ёшлар ўз муаммоларини ҳал этиш ва уни юқори ташкилотларга олиб чиқиш имконига эга бўлиш истагида турли уюшмалар, иттифоқлар, жамиятлар туза оладилар. Шу боисдан ҳам демократик мамлакатларда ёшлар ҳаётига доир муаммолар ўз ечимини осонгина топмоқда.
Демак, ёшларнинг жамиятдаги фаоллиги биринчи навбатда уларни ҳукумат томонидан қай даражда қўллаб-қувватланишига боғлиқ.
Мабодо, Ўзбекистонда ҳам ёшларнинг ўз фикирларини эркин ифода етишлари, ўз муаммоларини тегишли муассасаларга бемалол олиб чиқишлари учун етарлича имкон яратилганида эди, бугун минглаб, миллионлаб ёшлар бошқа мамлакатларга иш излаб кетмаган, иссиққина оиласи бағридан ситилиб чиқиб, ота-онаси, қавму қариндошлари, ёру дўстлари, киндик қони томган юртидан олисларда соғинчдан эзилиб, сарсону саргардон бўлиб юрмаган бўлар эди.
Дилшод НУРХОНОВ
“Бирдамлик” Халқ Демократик Ҳаракати фаоли