Умр деганлари оқар дарё каби ўткинчи… Бир зумда оқади-кетади дейишади…
Бу гап қулоққа чалинганда кўпам эътибор қилавермайсан киши…
Аммо, лекин, бироқ…
Яқин кишингдан айрилганингда, қадирдон одамингга қазо деган қирғин қутқу солганидагина бу калом мағзини ич-ичингдан, юрак-юракдан ҳис қиларкансан, рангинг кузги хазон каби зафарон тортиб қоларкан, руҳиятинг фоний дунё синаотлари қаршисида лолу ҳайрон тин оларкан….
Биз “Бирдамлик” Халқ Демократик Ҳаракати Хоразм вилоят бўлими етакчиси Валерий Назаровнинг бевақт ўлими ҳақида эшитганимизда худди ана шунингдек куйга тушдик….
Валерий оға…
Хиёл новча, қотмадан келган оғанинг чўкиб кетган кўзларида ўзгача меҳр, ишонч, умид учқунларди… Одамларга муҳаббат билан боқарди…
Ўзбекистондаги диктаторлик тузими ўрнига ҳақиқий демократик жамият бунёд этиш барча ўзбеклар қатори Хоразмлик оғанинг ҳам азалий орзуси эди.
Ана шу истаклар Валерий Назаровни “Бирдамлик” Халқ Демократик Ҳаракати сафига етаклаган бўлса, ажаб эмас.
Валерий оға Ҳаракатимизнинг Хоразм вилоят бўлими етакчиси сифатида қисқа, бироқ самарали фаолият олиб борган эди десак, муболаға қилмаган бўламиз…
Хоразм вилояти “Нажот” инсон ҳуқуқлари ташкилоти раиси Хайитбой ЯҚУБОВ тарқатган хабарга кўра, шу йилнинг 10 ноябрь куни Валерий Назаровни 66 ёшида шафқатсиз ўлим орамиздан бевақт олиб кетган….
– Оғадан ҳол сўраш мақсадида Хоразмга қилган сафаримиздан кейин оға менга бир эмас, тўрт-беш бор қўнғироқ қилгандилар… “Қўл телефоним йўқ. Набираларникидан фойдаланаяпман…. Энди… шундай бўлиб қолди… бир томони қаричилик… Кексаргани сайин киши кимларгадир тобе, муте бўлиб қоларкан… Сиз сайтларда чиққанларига эътибор қилиб, сиқилиб ўтирманг-а, аввалгидек қувватим йўқ, лекин шуни билингки, мен руҳан сизлар биланман” дегандилар қайта-қайта… Кўнглимни тоғдек кўтаргандилар, – дейди “Бирдамлик” Халқ Демократик Ҳаракати Ўзбекистон бўлими етакчиси Малоҳат Эшонқулова, – Ўтган йилнинг январ ойи охирларида оға билан дийдорлашгандик. Ўша охирги учрашувимиздаёқ Валерий Назаровнинг ҳоли хароб эканлигини сезгандим… Оға “Ўзимни ўнглаб олсам, сизлар билан қиладиган ишларим кўп ҳали” дея бизни ҳам умидвор қилиб қўйгандилар. Шунга оғанинг тамомила соғайиб кетишларини кутаётгандик… Валерий оғадан айрилиш нафақат “Бирдамлик”га, балки Хоразм халқига, бутун Ўзбекистон аҳолисига жуда катта йўқотиш бўлди… Негаки, мамлакатимизнинг чекка вилоятлари, туманларида жамиятда, тузумда кечаётган воқкеликларни оға каби юракдан чуқур хис қиладиган, тейран тушунадиган фуқароларимиз сони, афсуски, жуда кам…
Эсиз, Валерий Назаров, назаримда, орзулари рўёбини кўра олмасдан, юрагида бир олам армон билан кетдилар… Илоҳим, охиратлари обод бўлсин…. У киши кўрмаган кунларни кўриш зурриёдларига насиб этсин…
Ҳа, шундай бўлсин. Камтарин, камгап, ҳақгўй оғани Худо ўз раҳматига олган бўлсин.
“Бирдамлик” Халқ Демократик Ҳаракати фаоллари Хоразмнинг эркпарвар ўғлони Валерий Назаровнинг вафоти муносабати билан марҳумнинг оила аъзоларига, воҳанинг танти аҳлига чуқур таъзия изҳор қилади.
Илоҳим, Валерий Назаровнинг жойлари жаннатда бўлсин. Оға каби осмонўпар оппоқ орзулар билан яшаб ўтмоқлик, кўпнинг корига камарбаста бўлиб яшамоқлик бахти барчамизга-да насиб этсин….
“Бирдамлик” Халқ Демократик Ҳаракати матбуот маркази