Қўлланма (иккинчи)нинг муҳокамаси!
ҚЎЛЛАНМА – ЎЗБЕКИСТОН ХАЛҚИ УЧУН ДАСТУРУЛ АМАЛ БЎЛМОҒИ ЛОЗИМ!
Қўлланма(иккинчи)ни ўқиб чикдим. Менда умид ўйғондики, саодатли кунлар якин. Лекин, Каримов диктатурасинининг кучли хавфсизлик машинаси фитна уюштириши эҳтимоли ҳам ҳисобга олиниши лозим.
Баҳодир Чориев бошчилигидаги «Бирдамлик» Халқ Демократик Ҳаракатининг мамлакатимиз аҳолисини инсоний ҳаётга эриштириш учун режалаштираётган эзгу ниятларини диктатура бир авантюрага айлантирмасин ёки айлантира олмасин.
Албатта, қўлланмада кўрсатиб ўтилган вазифа ва режалар таҳсинга мувофиқ.
Қани эди, ушбу қўлланмани мамлакатимизнинг лоакал 15 фоиз аҳолиси ўқиб чикса!
Мамлакатимизда амалга ошаётган негатив ишларга томошабин бўлиб ўтирмасди. Сиёсий фаоллик, ўз ҳуқуқларини реал даражада таниш ва талаб қилиш каби журъат пайдо бўлармиди?
Аслида, диктатор ҳам, мен, сиз, Эшмат, Тошматлар каби одий одам. Ҳатто, унга ҳам истеъфога кетинг, ишни бажара олмаяпсиз, мамлакатимизни бундай аянчли аҳволга олиб келишга сизнинг ҳаққингиз йўқ, дейишга ҳар биримизнинг ҳаққимиз бор.
Шу оддий нарсани амалга оширишга журъатимиз етмайди-ю, лекин, бир бурда нон топиш учун, узоқ улкаларда, ҳаёт учун хавфли бўлган меҳнат шароитларида ҳаётимизнинг ҳар бир сония ўлим билан тугаши мумкин бўлган ишларда ишлашга журъат топа оламиз.
Яқинда битта миллатимиз вакили Владивосток шаҳридаги туғруқхона ёнидаги кўчада туғишга мажбур этилди. Албатта, бундай йўл тутишида, касалхона ходимларининг ҳам ҳиссаси бор. Лекин, барибир, полиция аралашмаганида ўша миллатимиз вакили кўчада туғар эди. Агар, шу миллатимиз вакилидан Каримов сиёсатига қаршимисан, десанг, йўқ, қарши эмасман, юртбошимизнинг умри узоқ бўлсин, деб айтади. Бу аниқ.
Сиёсий лоқайдлик ва саводсизлик шу даражада. Лекин, барибир умид бор. Диктаторимизнинг ўз лаганбардорлари билан ўтказаётган йиғилишларида: «Бугунги ўзбек халқи, 91 йилнинг ўзбеклари эмас» деб кўп айтади.
Қандай маънода айтади, буни ўзи ва Худо билади.
Лекин мен айтаманки, бугунги ўзбек халқи 1991 йилдагидек Каримовга ишонадиган халқ эмас.
Агар халқимиз кўтарилса, Каримовни оила аъзолари билан Каддафийдан баттар қилиб ташлайди.
«Пахта» инқилобини амалга ошириш учун, 30 миллион аҳоли сиёсий саводли ва фаол бўлиши ҳам шарт эмас, аслида.
Нозўравон норозиликни ўтказиш учун мамлакатмиз аҳолисининг 1/10 ҳам бири етади.
Мана шу 1/10 и у ёқда турсин, 1/100 и ёки 1/1000 дан биридан ҳам қўрқади бу ҳукумат.
Халқ, омма катта кучдир. Каримов Худодан ҳам, бошқасидан ҳам қўрқмайди. У халқдан қўрқади.
Биз қачон халқ бўламиз? Қачонки, бирлашсак, бирдам бўлсак!!!!
Қўлланмада айтилгандек, ҳар провокацияга учмаслик ўта мухим, диктатура махсус хизмати бўлажак тинч намойишчилар орасига қуролли махсус одамларини киритиб, қуролли провакацияни чиқаришни ҳам олдини олиш механизмини яратишимиз лозим.
Милиция ва бошка куч ишлатар тизимлари ходимлари дубинка билан уриш, қайнок сув ва бошқа воситалар билан қайтариш чораларини кўрганда қандай йўл тутмоқ лозим?
Шулар ҳақида ҳам аниқ йўриқнома бўлиши лозиммикан?
Россия федерацияси ҳудудидан бугунги кунда кўпчилик ватандошларимиз депортация қилинмоқда.
Эшелонлаб ватандошларимиз ишсизлик, қонунсизлик ҳукм сураётган Зулмистонга қайтиб келишаяпти.
Бу Ўзбекистонда ижтимоий инқирозларни келтириб чиқарадиган фактор ҳисобланади. Ҳозирнинг ўзида, ўғрилик, одам ўлдириш каби жиноятларининг ортиши сезиларли даражада ошганлиги кузатилаяпти.
Заиф ва ҳуқуқсиз мардикорларнинг 4-5 сўмини қўрқитиб шилишга одатланган ментлар ҳеч нарса қила олмаяпти.
Ўзбекистон учун катта сиёсий тўфонлар керак эмас.
Бу тўфонларнинг олдини олишимиз керак. Бу ҳам бўлса, «Бирдамлик» сафларига қўшилиш, оммавийлик, уюшқоқлик билан аниқ ва пухта иш олиб боришдир.
Гап Каримовда ҳам эмас, гап Каримовдан кейин нима бўлишида. Шунинг учун, ҳар бир ўзбек юртимиз, болаларимиз келажаги учун масъулдир.
Агар узоқни кўра била оларканмиз, “Бидамлик” Ҳаракати томонидан чоп этилган Қўлланмани диққат билан ўқиш – ўқишга чақираман.
Қўланмада кўрсатилган ишлар амалга оширилса, албатта, Ўзбекистонимизда буюк прогрессив ўзаришлар бўлажак!
Яна бир нарсани айтиб ўтмасам, бўлмайди. Бугунги кундаги ўзбек мухолифати ичида аниқ амалий ишлар қилаётган ва қилишга уринаётган ягона ҳаракат бу «Бирдамлик».
Хулосани ўзингиз чиқаринг!!!!!
Муҳаммадамин УЗОҚОВ