Олдинги чиқишларимда айтганимдек, 2013 йилнинг 3 ноябрь куни АҚШнинг Флорида штати, Маями шаҳрида жойлашган Sam’s Klub савдо компанияига шартномага асосан юк олиб келдим.
Sam’s Klub савдо компаниясининг юк қабул қилиш бўлимидаги қора танли менеджер траилларимни шартномада кўрсатилган соатда юкдан ҳоли қилиш ўрнига, қабул қилиш муддатини асоссиз равишда кечиктирди, менга ўта қўпол ва беписанд муомалада бўлди.
Бунингдек ноҳақликка нисбатан ўз норозилигимни билдирганим, ҳақ-ҳуқуқимни ҳимоя қилганим учун эса Sam’s Klub савдо ташкилоти тармоғи менеджерининг ғазаби нишонига айланиб қолдим.
У мени камситиш мақсадида юкларимни қабул қилишни қасддан бутунлай бекор қилишини маълум қилди.
Ўз навбатида мен мазкур компания менеджерининг нописанд муомаласи, ноҳақ қабул қилган қарори, камситишларига кўз юмиб кета олмадим.
Мазкур камситишлардан нечоғлик қоним қайнамасин, ғазабланмайин тарбия кўрган, маданиятли шахс сифатида юзимга қараб махаратомуз тиржайиб турган менеджернинг вазият тақозоси туфайли ёқасидан ҳам ололмас эдим.
Хўш, у ҳолда нима қилиш керак?
Камситишларга кўз юмиб кетгудек бўлсам, ўзимни бир умр кечираолмас эдим.
Вақт нииҳоятда қадрли нарса. Айни дамда мен лоқайд ходим томонидан атай кўкка беҳуда соврилаётган вақтимга ачинганим учун ҳам ҳақ талаб қилардим.
Вақтдан ютқзаётганим аламли эди, албатта. Бироқ, беписанд муносабатга қарши курашиш мен учун нечоғлик қимматга тушмасин, камситишларга қарши туришга, ғурурим, шаъним, оёқ ости қилинган ҳақ-ҳуқуқларимни тиклаш учун бебаҳо бўлган вақтимни тикишга қарор қилгандим.
Шундай ҳам қилдим.
Sam’s Klub савдо компаниясининг юк қабул қилиш бўлимидаги менеджернинг камситишларига қарши ўзим маъқул деб билган усул – очлик эълон қилиш орқали жавоб қайтариш энг тўғри йўл деган тўхтамга келдим.
2013 йилнинг 4 ноябрь куни Sam’s Klub менеджерининг кишини таҳқирловчи муносабатига нисбатан ўз норозилигимни билдириш мақсадида Маями шаҳрида очлик акциясини бошлагандим.
Орадан 5 кун ўтди.
2013 йилнинг 8 ноябр куни эрта тонгдан Sam’s Klub савдо компанияси юк қабул қилиш бўлими олдида қолдирган траиллиримдан хабар олиш учун бордим. У ҳамон айнан ўзим қўйган ерда турарди.
Кундузги соат 10.30ларда Брокер қўнғироқ қилиб, “Траиллирингни бўшатишибди, уни олиб кетишинг мумкин” дея хабар берди.
Мен олти кундирки очлик ўтказаётганлигим сабабли, юк қоғозни олиб келиш учун рафиқам Феруза кетди. Кўп ўтмай у “Юк қабул қилинди” дея имзоланган ҳужжатни келтирди.
Мен эса «Мени Sam’s Klub менеджерлари диксриминатция қилганлиги учун 4 ноябрдан буён Очлик эълон қилдим» деган юзув битилган плокат олд томонига бириктириб қўйилган трокимни кўпчилик аҳоли кўрсин ва ўқисин деган мақасдда қулайроқ ерга – енгил машиналар паркинг қиладиган жойга ҳайдадим, яъни юк машинамни 15 метр олдга олдим.
Гарчи юк машинам тахминан 4 та енгил машинага мўлжалланган ерни эггалаган бўлса-да, ҳайдовчиларнинг йўлини тўсиб қўйган, ўткинчи йўловчиларга халақит берган эмас.
Орадан 2 соатлар фурсат ўтиб, ёнимга Sam’s Klubнинг 3 нафар ходими келишди. Улар мендан паркинг майдонини тарк этишимни талаб қилишди.
Уларнинг талабига қилган жавобим шу бўлди: “Мен Sam’s Klub ходимининг камситишларига қарши очлик эълон қилганман. Ўз навбатида ҳақли талабларимни илгари сурганман. Қачонки, талабларим Sam’s Klub савдо ташкилоти томонидан қаноатлантирилсагина, очликни тўхтатишим ва бу ерни тарк этишим мумкин”.
Табиийки, мен томонимдан қилинган жавоб уларга хуш келмади. Дарҳол полиция чақиришди.
Бу гал бир зумда етиб келган полиция ходимлари ҳам олдимга Sam’s Klub майдонини тарк этиш талабини қўйишди.
Мен эса полиция ходимларига беш кундирки Sam’s Klubдаги камситишларга қарши очлик эълон қилиб ўтирганимни, ҳуқуқларинми ҳимоя қилиш истагида эканлигимни тушунтиришга уриндим. Ҳақ-ҳуқуқларим оёқ ости бўлиб турган бир пайтда, истаган тақдиримда ҳам полиция талабини бажара олмаслигимни билдирдим.
Ҳозир мен учун хибисдан ҳайиқиш эмас, ҳуқуқларимни ҳимоя қилиш муҳимроқ эди.
Натижада ўз ихтиёрим билан қўлларимни яна полиция ихтиёрига – кишанга тутиб беришимга тўғри келди.
Полиция томонидан яна қамоққа олиндим.
Улар мени қўлларим кишанланган ҳолда хизмат машиналарига ўтқизишгач, рафиқам Ферузага трокни тарк этишни буюрди. Юк машинамни тезликда тортиб(товинг)олиб кетишларини маълум қилишди.
Рафиқам “Борадиган жойим йўқ, қаерга бораман?” деган сўровига полиция ходамларидан “Истаган меҳмонхонангизга боришингиз мумкин” деган жавоб олди.
Улар ўртаида бўлиб ўтган кейинга мулоқот мазмунидан бехабар қолдим. Чунки бу пайтда мени қўлларим кишанланган ҳолда полиция хизмат машинасига ўтқазиб бўлишганди. Суҳбат ичкарига эшитилмади.
Кўп ўтмай полиция ходимлари қўллари кишанланган Ферузани ҳам ёнимга жойлаштиришди.
“Бирорта меҳмонхонага жойлашишинг керак эди-ку, нега энди сениям кишанлаб қўйишди?” сўрадим ундан ажабланиб.
Рафиқам “Беш кундан буён оч ўтирибсиз. Ҳозирги шароитда ёнингизда бўлишим керак” дея жавоб қилди.
Кейин маълум бўлишича, Феруза полиция ходимларидан “Мен трокдан тушмайман, яхшиси мени ҳам қамоққа олинглар, турмуш ўртоғим билан бирга бўлишни истайман” дея талаб қилиб туриб олганлиги учун ҳам уни кишанбанд қилишган экан.
Соат чамаси 16.00ларда биз Sam’s Klubнинг енгил машиналар паркинг майдонини шу алфозда – қўлларимиз кишанланган ҳолда, полиция хизмат машинасида тарк этдик.
Енгил машиналар паркинг жойида менинг троким, траиллирим эса Sam’s Klub юк қабул қилиш бўлими остонасида қолди.
Тахминан соат 17.20 ларда қамоқка олиш билан боғлиқ жараёнлар тугаб, ниҳоят бизни ичкарига олиб кириб кетишди…
Узр, ортиқча оворагарчилик, асаббузарлик, очлик ва йўл азоби ортидан жисмоний ва руҳий толиқиш устунлик қилмоқда. Руҳиятим ва танамни чарчоқ тарк этгунга қадар воқеалар ривожига оид ҳикоямни кейинроққа сурам дегандим….
П.С Бугун сизга етказмоқчи бўлган энг муҳим хабарим: 2013 йилнинг 10 ноябрь куни Очликни тўхтатдим. Ҳуқуларимни суд орқали ҳимоя қилиш борасида бир тўхтамга келдим.
Баҳодир ЧОРИЕВ
Катта юк машинаси ҳайдовчиси,
“Бирдамлик” Халқ Демократик Ҳаракати раҳбари