Россия ҳарбийларининг билдиришларича, Калининградда қисқа масофага мўлжалланган ракеталарни жойлаштириш режасидан воз кечишган. Бу ҳақда Россиянинг Интерфакс ахборот агентлиги хабар берган.
Ахборот агентлиги тарқатган хабарларга кўра, россиялик ҳарбий мулозим Америка мавқеининг ўзгариши бу каби қарорга келишларига туртки бўлганини айтган.
Россия Президенти Дмитрий Медведев ўтган ноябр ойида АҚШ томонининг Оврўпода ракетадан мудофаа тизими ўрнатиш режасига жавобан шундай йўл тутишларини билдирганди.
Расмий Москва Американинг режасини ўзларига тўғридан-тўғри таҳдид сифатида кўради.
АҚШ томони эса, Польша ва Чех Республикасида ўрнатишни режалаган ракетадан мудофаа тизими фақатгина Эрон каби «ёвузлик учоғи» давлатларидан ҳимояланишга қаратилганини айтади.
Россия мудофаа вазирлиги ҳозирча жим
Россия мудофаа вазирлиги шу пайтга қадар Интерфакс ахборот агентлиги тарқатган хабарларни тасдиқламаган.
Москвада бўлган мухбиримиз Жеймс Рожерс (James Rodgers) нинг хабар беришича, Кремль ахборот агентлигидан тез-тез ўз таклифларини ёйиб туришда фойдаланиб келади.
Мухбиримизга кўра, агар россиялик расмийларнинг баёнотлари пишиб қолган бўлса, бу расмий Москванинг Президент Барак Обама раҳбарлигида Америка Оврўпода ракетадан мудофаа тизимини ўрнатиш режасидан қайтиб қолишига умид қилаётганига далолат қилади.
Унинг айтишича, агар Россия «Искандар» русумидаги қисқа масофага мўлжалланган ракеталарини жойидан силжитмаса, бу янги АҚШ маъмуриятига тақдим этилаётган муроса чораси бўлиши мумкин.
Режадан мақсад нима?
АҚШ томони, ўз таъбирида, глобал ракетадан мудофаа тизимидаги бўшлиқни тўлдириш учун Польша ва Чех Республикаси билан бу хусусда бир битимга келганини билдирганди.
Америка таклиф этаётган мазкур тизим НАТО га аъзо кўплаб давлатлар томонидан ҳам қўллаб-қувватланмоқда.
Расмий Вашингтонга кўра, Эрон олис масофага мўлжалланган ракета технологияси устида иш олиб бормоқда ва янги ракетадан мудофаа тизими ана шундан ҳимояланишга қаратилган.
Американинг мазкур режаси расмий Москванинг ғазабини тошириб, ўзаро муносабатларга путур етказганди.