Хабарингиз бор, “Бирдамлик” Халқ Демократик Ҳаракати 1 сентябрдан 10 сентябрга қадар навбатдаги ОШ акциясини эълон қилди.
Тадбир талабларига кўра, Каримовнинг зўравонликка асосланган тузумига, жамиятда авж олган порахўрлик, ишсизлик, ижтимоий тенгсизлик каби адолатсизликларга қарши бўлган аҳоли ўз норозиликларини эгниларига оқ либос кийиш орқали изҳор қилишлари талаб этилади.
Шунингдек, ОШ акцияси иштирокчилари оқ либосларида тушган расмларини тадбирнинг расмлар танлови ҳайъатига тақдим этишлари керак.
Эслатиб ўтамиз, мазкур расмлар танловига “Бирдамлик” Халқ Демократик Ҳаракати ҳисобидан 16 минг АҚШ доллари миқдорида мукофот таъсис этилган.
Қувончлиси шундаки, бугун 1 сенябрь куни Ҳаракат фаоллари ва Ўзбекистон аҳолиси ўртасида қонхўр Каримовни “Озодлик” радиоси орқали танқид қилиб, оқибатда минг бир таъқибга учраган ва диктаторнинг ҳақиқий асирига айланган Ҳасан Чориев номидаги Олий мукофот – 3 минг АҚШ долларини қўлга киритиш учун ҳақиқий кураш бошланди.
Шунингдек, 6 та 1-ўрин соҳибларининг ҳар бирларига аталган 1000 АҚШ доллари миқдоридаги мукофотга талабгорлар ҳам кам эмас.
Яна кимлардир жуда бўлмаганда 500 АҚШ доллари ваъда қилинган 3- ўринга муносиб деб топилажак 6 нафар ғолибнинг бирига айланишга умидвор.
Бир сўз билан айтганда, Ҳаракат электрон манзилларига ҳамюртларимизнинг оқ либосларда акс этган расмлари келиб тушишни бошлади.
Эслатиб ўтамиз, ОШ акциясининг расмлар танловига юборилган суратлар 11 сенябр кунидан эътиборан сайтимизда эълон қилинади ва ўқувчилар ҳукмига ҳавола этилади.
Азиз ватандошлар!
Ислом Каримов асос солган қўрқув салтанатига қарши чиқишдан чўчиманг!
Нурли манзиллар, оппоқ орзулар сари оқ либосларда қўрқмасдан қадам қўйишга ўзингизда куч топинг!
Айнан журъат – порлоқ кунлар пойдевори!
“Бирдамлик” Халқ Демократик Ҳаракати – ҳамиша Сиз билан бирга!
“Бирдамлик” Халқ Демократик Ҳаракати Матбуот Маркази