Бизнинг қонунларда ота учун бола, бола учун ота жавобгар эмаслиги аниқ ёзиб қўйилган. Аммо, ота, она ёки бола мухолиф сифатида кўзга кўринса, биринчи навбатда уни «тийиб» қўйишнинг ҳамма биладиган «усули» бу фарзандига нисбатан тайзиқларнинг кучайишида кўринади.
Бу натижа бермаса, қариндош-уруғ, қуда-андага бошланади.
Ҳақиқат учун, жамиятдаги тўсиқлар, ҳокимятларнинг бош-бошдоқлиги, маьмурий органларнинг ҳақиқатсизлиги ҳақида гапирмоқчи бўлганлар ана шу йуллар билан «жим» қилинади.
Шунинг учун ҳам «Озодлик» радиосида таькидлаганидек, «Исмини ошкор қилишимизни истамаган манбанинг хабар беришича», каби иборалар болалаб кетди. Ошкоралик, очиқлик қоғозларда-ю, сарой маддоҳларининг ва депутатларнинг оғзида холос.
Баҳодир Чориевнинг отасига нисбатан қилинган ҳаёсизларча туҳмат ҳам худди ана шу кўринишларнинг исботидир. Ўғли адолат ва демократия йўлида кураш олиб боргани учун бугун Ота туҳмат балосига учраб, қамоқда қийноқларга солинмоқда.
Аслида Ҳасан отага нисбатан қўйилган айблов умуман ҳеч бир мантиққа тўғри келмаслигини ҳаммаси билиб турибди. Бу ҳолатни таҳлил қиладиган бўлсак, мамлакат ичкарисида рост ва ҳақни гапириб, мавжуд муаммоларга, юқори мулозимларнинг райишига қарши бориш одамни нима кунларга олиб келишини намойиш қилишмокда.
Ҳар қандай шароитда Сиз ҳақ бўлсангиз ҳам турли йўллар билан туҳмат балосига тиқишлари мумкинлигининг исботидир.
Насиба Маьмур
“Бирдамлик” Халқ Демократик Ҳаракати
Ўзбекистон бўлими фаоли