СУМБУЛА
Сумбула-ю сумбула,
Ўраб олай гул била.
Менинг кўнглим сен била-ё.
Сен кетасан ким била,
Қадаминга гуллар очилсин!
Ўчоқ бошида қумғон,
Атрофи баланд қўрғон,
Ёргинамга етолмай-ё,
Юрак-бағрим бўлди қон,
Қадаминга гуллар очилсин!Мен бу ерда ўт ёқсам,
Фарғонада тутуни,
Бу дунёда бормикан-о,
Юрак-бағри бутуни,
Қадаминга гуллар очилсин!
Бу дунёда бор бўлса
Юрак-бағри бутуни,
Қоғоздан ўчоқ ясаб-о,
Гулдан қилай ўтин-эй,
Қадаминга гуллар очилсин!
***
ДАРЁ ТОШҚИН
Дарё тошқин, сувлар тўлқин, ўтолмайман-о,
Отим ориқ – манзилимга етолмайман-о!
Отгинамни ориқ қилган шул майда тош-ей,
Рангинамни сариқ қилган шул қалам қош-ей!
Оҳ, укажоним-эй,
Қуралай кўзим-эй,
Рангинамни сариқ қилган
Шул қалам қош-ей!
Дарёларнинг ул юзида уйлорингиз-эй,
Оқаришиб қўриноди бўйлорингиз-эй,
Ипданмиди, ипакмиди кийгонингиз-эй,
Бизлардан ҳам ортиқмиди суйгонингиз-эй?
Оҳ, укажоним-эй,
Қуралай кўзим-эй,
Бизлардан ҳам ортиқмиди
Суйгонингиз-эй?
Дарёлардан ўтар эдим, ўтар эдим-эй,
Манзилимга етар эдим, етар эдим-эй,
Мен севсам-у, ул севмаса, мен нетарман?
Шўрлик бошим олиб қайга мен кетарман?
Оҳ, укажоним-эй,
Қуралай кўзим-эй,
Шўрлик бошим олиб
Қайга мен кетарман?
***
Матн терувчи, Шоира Маҳмудова