Туркия бош вазири Режеп Тойиб Эрдўған 13 июн куни тунда аксилҳукумат норозилик акциялари иштирокчилари билан шошилинч музокаралар ўтказди. Учрашувда бош вазир истанбулликларни аччиғини келтирган Гези истироҳат боғида амалга оширилажак қурилиш лойиҳасини музлатиб қўйишга рози бўлди ҳамда ортиқча куч ишлатишда айбдор саналаётган полициячиларни жазолашга ваъда берди. Бу ҳақда матбуот анжуманида ҳукумат бошқарувида турган Адолат ва ривожланиш партиясининг вакили Ҳусейн Челик (Hüseyin Çelik) маълум қилди, дея хабар беради Лента.Ру “Анатолия” агентлигига ишорат билан.
Олдинроқ Эрдўған норозилик иштирокчиларига ультиматив шаклда бир сутка ичида тарқалишни талаб қилган, аммо рад жавобини олгач музокараларни бошлаган эди.
Ҳусейн Челик айтишича, Гези истироҳат боғида қурилиш ишларини тақиқловчи суд ҳукми ўз кучида қолади. “Юридик процесс ниҳоясига етгунича ҳеч нарса қилинмайди”, – дейди Челик Газета.Ру келтирган иқтибосда. Челикка кўра, шундан сўнг Истанбул аҳолиси ўртасида истанбулликлар нимани исташликларини тушуниш учун референдум ўтказилади. Матбуот котиби қайд этишича, референдум натижалари “тўғридан-тўғри қўлланади”.Шунингдек, Челик бўлиб ўтган музокаралардан сўнг “ёшлар истироҳат боғини бўшатиб қўйишлари лозим бўлади”, деб билдирган, дея хабар беради Коммерсант.