Қоғозларда фуқаролар фаровонлигига оид рақамлар ўсгани ўсган… амалда қачон илдамлаш бўларкин?…
Мабодо буйрагингизда тош бўлса, жарроҳга чойчақа сарфлаб, танингизга тиғ теккизиб ўтирманг. Бугунги кунда Ўзбекистонда буйрак тошини туширишнинг энг қулай ва самарали, энг муҳими камчиқим усули мавжуд.
Ишонмайсизми?
Агар ишонмасангиз, Тошкент – Самарқанд, Самарқанд –Қарши, Самарқнад –Сурхандарё, Самарқанд – Навоий – Бухоро, ана боринг, бу ёғи то Хоразмга қадар М-39 магистрал йўлида лоақал бир бор қатнаб кўринг.
Мавжуд магистрал йўлининг носозлигидан, ўнқир-чўнқирлигидан эсингиз кетади.
Масалан, Тошкент-Самарқанд, ёҳуд Самарқанд-Қарши йўналишининг М-39 магистрал йўлида юрган одамнинг нафақат буйрагидаги тош парча-парча бўлади, балки суякларингиз ҳам синиб кетади-ку?– Бу йўлларда юришга ҳатто темир транспорт ҳам дош бера олмайди. Қарши-Тошкент йўналишига бир бориб келган машинанинг “ичи тўкилиб” тушади. Ҳаражатга тушади одам. Машинани қайта қилишга тўғри келади. Бу йўлларда юришнинг турган-битгани чиқим, – дея ҳасрат қилади қамашилик ҳайдовчи зорланиб.
Модомики, темир машиналарнинг “ичи тўкилиб” кетар экан, нега энди одам боласининг ичи эзилмаслиги керак?! Худди ана шу эзилиш натижасида зора буйрагингиздаги тош парчаланиб қум шаклига келса-ю пешоб билан чиқиб кетса, дея умид қиламиз-да. Лекинчи, эслатиб ўтамиз, оғир оёқ, ой куни яқин аёлларга бу йўлларда транспортда юриш тавсия қилинмайди. Мутлақо таъқиқланади. Акс ҳолда ҳомиласидан ажраб қолишлари ҳеч гап эмас…
Очиғи, бу магистрал йўллар яқин йилларда капитал таъмирдан чиқарилмаган. Шунчаки хўжакўрсин учун қилинган жорий таъмирлар эса, мендан кетгунча, эгасига етгунча қабилида амалга оширилган.
Асфальт йўлларнинг ўйилган ўрадек ўпарилиб кетишига сабаб, таъмир учун ажратилган маблағнинг, хом ошёнинг тежалишида.
Негаки, йўл қурилиш идоралари мутасаддилари йўлларни номигагина “бир кўрмоққа жон бермоқ” қабилида “лой-сувоқ”дан ўтказишади-ю, “тежамкорликларидан” тушган фойдани ҳамёнларига уришади: иморат қуришади, қўш машина олишади – мана сизга ҳақиқат!
Провардида эса, йўлларимизнинг аҳволи ҳалигидақа – ҳолига маймунлар йиғлайди.
Йўлларимизнинг автодаҳоллигидан фарқли ўлароқ, мазкур йилимизнинг илк чорагида ижтимоий-иқтисодий ривожлантириш якунларига оид Давлат статистика қўмитасининг ҳисоботига кўз қирингизни ташласангиз, эсингиз оғиб қолиши тайин:
Рақамлар кўрсатгичининг юқорилигидан бошингиз айланиб, кўзингиз тиниб кетади.
Жумладан, “Жорий йилнинг биринчи чорагида Ўзбекистон миллий автомагистрали таркибига кирадиган автомобиль йўлларини қуриш ва реконструкция қилиш объектларида 61,7 миллиард сўмлик капитал қўйилмалар, жумладан Республика йўл жамғармаси маблағлари ҳисобидан 44,1 миллиард сўм, Ўзбекистон Республикаси ҳукумати кафолати остида четдан олинган заёмлар ҳисобидан 8,7 миллион доллар ўзлаштирилди”, дейилади ҳисоботда.
Биргина автомобиль йўлларини қуриш ва таъмирлаш ишларига 3 ой ичида 44,1 миллард сўм ва яна заёмлар ҳисобидан 8,7 миллон доллар сарфлаш?! Чакки эмас-а?
Бундай чиқимлар оқибатида мамлакатимизда 3 ой ичида қурилиш ишлари сурати 113,2 фоизга ошиб кетган эмиш. Қаранг-а!
Ҳисоботу қоғозлардаги рақамлар ўсишига гап йўқ. Бироқ, айтингчи, ҳисоботбоз жаноблар, қоғозлардаги бу кўрсатгичлар ҳаётимизга қачон кўчади? Оғизда эмас, қачон амалда турмуш фаровонлигимизда ўсиш –ўзгариш бўлади-а?!
Орзигул ХУДОЁРОВА
“Бирдамлик” Халқ Демократик Ҳаракати
Ўзбекистон бўлими фаоли