Москвада ва Россиянинг қатор шаҳарларида 14 апрел куни Ўрта Осиё мамлакатлари билан виза тартибини киритиш талаби билан намойишлар бўлиб ўтди, дея хабар беради Национальный акцент.
Москванинг Суворов майдонида маҳаллий ҳукумат билан келишилган ҳолда ўтказилган митингда 700 га яқин киши қатнашди. Виза тартиби жорий этилишини талаб қилувчи митинглар, шунингдек, Санкт-Петербург, Липецк, Брянск ва Ўфў шаҳарларида бўлиб ўтди.
Акция иштирокчилари виза тартиби киритилишидан ташқари, Давлат Думаси фуқаролик тўғрисидаги қонунни қайта кўриб чиқишини, ўрта осиёлик муҳожирларни қабул қилиш дастурини тўхтатишни, меҳнат муҳожирларининг ойлик иш маошларини россияликлар билан тенглаштирмасликни, муҳожирларнинг меҳнатидан фаол фойдаланаётган иш берувчилар ҳақидаги маълумотларни чоп этишни, муҳожирлар меҳнатидан фойдаланиш учун жавобгарлик киритилишни талаб қилдилар.Шу куннинг ўзида Россия бош вазирининг ўринбосари Дмитрий Рогозин шу йилдан бошлаб МДҲ мамлакатлари фуқароларини Россияга фақат хорижий паспортлар билан киришига рухсат берилиши мумкинлигини билдирди.
Эслатиб ўтамиз, 11 апрель куни рўйхатдан ўтмаган “Новая сила” партияси томонидан Марказий Осиё ва Кавказорти мамлакатлари билан виза тартиби киритилишини ёқлаган 100 минг одамнинг имзолари Давлат Думасига тақдим этилган. 13 апрель куни миллатчилар маҳаллий ҳокимият билан келишмаган ҳолда “Ғазаб куни” норозилик акциясини ўтказмоқчи бўлганди, аммо полиция томонидан тарқатиб юборилди.
Шу вақтнинг ўзида Санкт-Петербургда белоруссиялик, украиналик, тожикистонлик ва ўзбекистонлик меҳнат муҳожирлари яшаётган ётоқхонага ўт қўйилди. Фонтанка.Ру Россия Тергов қўмитасининг Петербург бўйича бошқармасига таянган ҳолда хабар беришича, ёнғин Балтийская кўчасидаги 59 уйда, 12 апрель куни тунгги соат 22 атрофида содир бўлган: икки номаълум кимса ёнғин келтирувчи ёқилғини уй деразаларига улоқтирганлар. Ёнғин оқибатида уч киши оғир аҳволда касалхонага ётқизилган, бинонинг икки қавати қисман куйиб кетган.
“Фарғона” халқаро ахборот агентлиги