Азиз юртдошлар!
Юртидан олисда қўним топган муҳтарам ватандошлар!
Ҳаётимиз остонасида яна навбатдаги Наврўз – Янги кун энтикиб турибди.
Аммо хаёлимизда куни кечагина Наврўз байрамини кутиб олгандекмиз гуё, шундай эмасми?…
Ҳа, хато хаёл қилмадингиз, чиндан ҳам ўтган Наврўз қувончи ҳали хотирамиздан ўчган эмас, кўкламой кўкатларининг тансиқ тамолари таъми ҳануз оғзимиздан кетган эмас, адашмадингиз.
Қаранг-а, кўз очиб юмгунча навбатдаги Наврўзи олам остонасидамиз.
Сизнингча, бу нимадан дбалолат? Бу ҳолат замона шиддаткорлигидан, вақтнинг шавқатсизлиги-ю, сонияларнинг сизу бизнинг измимизга бўйсунмаслигидан нишона эмасми? Ҳа, шундай, вақт шошқалоқ, дақиқалар чопоғон, сониялар югурик…
Бугун кўркини кўз-кўз қилиб Наврўз киряпти. Бу яна бир йил орда қолди, умримизнинг бир йили хотима топти демакдир…
Мана шундай кезларда ўтган вақтга ачиниш ҳисси қалбларни қуршаб олади, афсус туйғусини туйганлар қанча… Бироқ, чуқурроқ мушодаҳа қилиб кўрадиган бўлсак, ўкинишга ҳеч бир сабаб кўрмаймиз, ортиқча сиқилишларга бирор бир асос йўқ, буларнинг барчаси бекор… Зеро одам боласида шукроналик туйғуси борки, кўрсатган кунларига, берган неъматларига қувонмаслик, кўкламнинг илк чечакларини табаррук билиб, кўзларга тўтиё қилмаслик мумкин эмас, увол.
Шундай шукуҳли кунлар қаршисида ўтган кунларимизни сарҳисоб қилишимиз табиий. Лекин шу ўтган бир йил давомида кўзланган мақсадга етмадингиз, интилган нарсангизни қўлга киритмадингизми, ўкинманг, негаки, мана, Яратган яна сизу бизга навбатдаги Янги кунни – Янги йилни тортиқ қилиб, тантилик қилиб турибди! Демакки, олдга одим отишга, марра сари интилишга, эзгу сақсад йўлида курашишишга мажбурмиз… Зеро бу шарт ва зарур…
Шундай экан, азиз ватандошлар, Худонинг ўзи туҳфа этиб, икки қўллаб тутиб турган Наврўз – тириклик, яратиш, яшнатиш фасли, олддаги кунлар, эртанги имкониятлар сизу бизга, барчамизга-да қутлуғ бўлсин!
Янги йил, янги орзулар, янги интилишлар, янгидан-янги мақсадлар муборак!
“Бирдамлик” Халқ демократик ҳаракати барчангизни Наврўз айёми билан самимий муборакбод этади.
Ҳеч қачон қаторингиздан кам бўлманг, бахт деганлари бўйингиз билан бўйлашиб, омад ортингиздан соядек эргашиб юрсин. Танангиз ва руҳингизни тетиклик, саломатлик ҳеч қачон тарк этмасин!
Барча-барчангизга Наврўз – янги кун, Янги йил қутлуғ бўлсин!
“Бирдамлик” Халқ Демократик ҳаракати