Ички ишлар идоралари ходимлари ва суд ҳокимиятининг адолатсизлиги оқибатида ўз норозиликларини очлик акцияси орқали ифода этишга уринаётган Лариса Григорьева ва унинг балоғатга етмаган ўғли Григорий Григорьевнинг очлик эълон қилганига мана, ҳаш-паш дегунча беш кун ҳам бўлибди.
Бугун ҳукумат идораларидан адолат истаб очлик акциясини ўтказаётган она-бола Григорьевларнинг ҳолидан хабар олиш мақсадида ҳуқуқ фаоли Шуҳрат Рустамов ва “Бирдамлик” Халқ Демократик ҳаракати фаоли Чамангул Негмановалар жабрдийдаларнинг хонадонида бўлишди.
Кишини ҳавотирга соладиган томони шундаки, жамиятдаги ноҳақликлардан нолиб бир эмас икки инсон беш кундирки оч-наҳор ётса-ю, Ўзбекистон деб аталмиш мамлакатни бошқараётган ҳукумат раҳбарлари ҳали балоғат ёшига етмаган боланинг, ҳақиқат ахтараётган онанинг тақдирига бефарқ бўлса? Шу кунлар давомида на маҳалла, на Чилонзор туман ҳокимияти, на хотин-қизлар қўмитаси, на Григорий таҳсил олаётган таълим муассаси, на шаҳар ҳокимияти, бир сўз билан айтганда, умуман, ҳукумат идораларидан бирор бир зоғ она-боланинг ҳолидан бир бор хабар олишга ярамаган. Негалигини биласизми? Чунки “Бу азиз Ватанда АЗИЗДИР ИНСОН”.
Беш кунлик очлик азобини бошидан ўтказаётган Лариса Григорьеванинг таъкидлашича, милиция инспекторлари устидан тўхтовсиз ёзган аризалари сабабли у ИИБ ходамларининг қахрига учраган. Қонун идоралари айбдор ички ишлар ходамларини жазолаш ўрнига, аксинча, Л. Григорьевани аёвсиз дўппослаган. Кузатув, таъқиб, таҳдид, босим, калтак билан ҳам қўрқитишга қурби етмаган ҳукуматнинг қонун идоралари ходамлари, охийри онанинг балоғатга етмаган ўғлини қийнаш орқали аёлдан ўч олиш ишқида ёнишган. Ана шу жирканч мақсадларини амалга ошириш мақсадида ИИБ инспекторлари ўсмир ёшидаги Григорий Григорьевни ўз уйдан куч билан олиб кетишган ва
«Панельный»га олиб бориб, каталар хибсхонаси ичида хуфёна тарзда очилган ўсмирларни тутқинликда ушлаб турувчи камерага қамашган. Бу ҳам камлик қилгандек, у ерда Григорий аёвсиз калтакланган. Бунинг оқибатида унинг саломатлигига жиддий салбий таъсир кўрсатувчи жароҳат етказилган. “Бу борада қўлимизда суд тиббиёт экспертиза хулосаси бор” дейди она зорланиб.
Айни кунларда эса, Сирғали туманининг «Панельный» қўрғончасида жойлашган катталар учун аталган хисбхонада балоғат ёшига етмаган ўсмирлар ҳам сақланаётганлиги хусусидаги маълумотларни матбуотга тарқатганлиги сабабли, айни дамда аламзада ҳукумат она-боладан ўзгачароқ, аниқроғи, шавфқатсизроқ ўч олишга аҳд қилган кўринади. Негаки, бугунги кунда Григорийнинг бўйнига ўғирлик айблови туфлаб ёпиштирилиш арафасида. Лекин бу айбловни ёпиштириш учун мос ва хос “елим” топа олмай азият чекаётган суд ҳокимияти ишни лағмондек чўзишдан нарига ўтмаётир. Негаки, судга тақдим этилган тергов “иши”даги барча ҳужжатлар сохталаштирилган.
“Ҳатто менинг ва ўғлимнинг имзолари ҳам қалбакилаштирилган. Мен ўшбу имзоларни экспертиза қилишни қатъий талаб қилишимга қарамасдан, негадир суд менинг ҳақли талабимни қондиришга шошаётгани йўқ. Бефарқ ва беэътибор. Боламнинг тақдирига совуққонлик билан қарашмоқда. Токи суд, қонун идораларида адолат ўрнатилмас экан, очликдан ўлсак ўламизки, норозилик акциямизга якун ясамаймиз” дея ўртанади Лариса Григорьева.
“Бирдамлик” Халқ Демократик ҳаракати матбуот хизмати