Фарғонага йўлингиз тушгудек бўлса, ўзингиз минган автоуловни албатта ёқилғи билан тўлдиришни унутманг. Сабаби бугун Фарғонада фаолият юритаётган «Метан» газ қўйиш шоҳобчаларидан фақат Саткакдаги «Наманган», Қўқон ҳудудида эса «Данғар» шоҳобчалари фаолият кўрсатмоқда. Фарғона вилояти автомашиналарига хизмат қиладиган бошқа барча «Метан» газ қуйиш шоҳобчалари турли баҳоналар билан беркитилган. Натижада, бу суьний тақчиллик ҳайдовчилар учун жуда катта муаммони келтириб чиқарди. Айниқса, пули бор одамларнинг олиб қўйган автомашиналарини ижарага олиб тирикчилик қилаётган фуқароларнинг куни кунлардан бўлмоқда. Улар бензин билан машиналарида киракашлик қилгудек бўлса, фақат ижара ҳаққини чиқариб, хўжайини учун ишлаб беришига тўғри келади. Ўзи қуриқ қўл билан бола-чақаси олдига қайтишига тўғри келади. Оиласини боқиш учун пул топмоқчи бўлса, албатта «Метан»газини қуйиб, фойда олиши мумкин, холос. Шунинг учун улар мажбуран метан гази қуйиш учун тундан тонггача, тонгдан тунгача шохобчаларда навбатда туришларига тўғри келмоқда. Турна қатор автомашина ҳайдовчилари навбатда туриб ухлашмоқда. У ердаги тартибсизлик, бош-бошдоқликни таьрифлашга тил ожиз. Бу тақчилликдан фойдаланган шоҳобча ишчилари 10 минг сўмдан пул олиб, навбатсиз автомашиналарни киритишмоқда. Бу усулда ҳам 4 ёки 5 соатда газ қуйиш жойига етиб олиш мумкин. Бундай муаммо фақат Фарғонада мавжудлигининг гувоҳи бўлдик. Андижон ва Наманганда, Тошкентда бундай ҳолатни кўрмайсиз. Фарғоналиклар қўшни Андижон ва Наманга вилоятларидаги газ шоҳобчаларига автомашиналарини бир-бирига улаб, судраб бориб, газ қуйиб келишга ҳам мажбур бўлмоқдалар. Бундай муаммолар нимага, кимга кераклигини билишга ҳаракат қилгани уларнинг вақти ҳам етмаяпти. Чунки, навбатдан қолиб кетади-да.
ОЙША РАҲМОН қизи
“Бирдамлик” Халқ Демократик Ҳаракати Ўзбекистон бўлими матбуот котиби