Кармана туманидаги Каттамачит МФЙга қарашли Чоробод қишлоғи аҳолисининг 5 йил давомидаги талабига биноан қишлоққа 2012 йилнинг 1 сентябригача ўрнатилиб, фойдаланишга топширилишига расман ваъда берган Кармана туман электр таъминоти корхонаси раҳбари Бахтиёр Хидировнинг имзоси билан ёзилган жавоб хатининг ижроси 2013 йилнинг январ ойи бошида қисман бажарилган эди. Аммо номигагина тикка қилиб кўтариб қўйилган электр устунларига электр энергияси келиши хом хаёлга ўхшаб бормоқда. Ўргимчак тўри мисол иложсизликдан аҳоли бир-бирининг тиравузидан тортиб фойдаланаётган тизимда эса ҳар куни носозлик. Кун давомида ишдан ўта ҳориб келган меҳнаткашлар қоронғу зулматда дам олиб, эрта тонгдан тағин ишга шошилишмоқда. На қатнов йўли ва на электр токи бўлмаган қишлоқда тизза бўйи лойга беланиб давлат ишига қатнаётган аҳоли “Обод турмуш йили”дан тағин умид қилишмоқда.
Навоий ГРЭСидан Навоиазот ОАЖ орқали Навоий шаҳрига кесиб чиқадиган автомобиль қатнови йўли 1980 йилдан буёғи бирор марта таъмирланганини ҳеч бир ким эслай олмайди. Негаки, йил сайин чуқурлар кўпайиб, асфальт умуман кўринмай қолган. Ҳар куни ишга қатнаётган катталар ва мактабга қатнаётган болалар ёғин-сочин кунларида автомобилларнинг чуқурлардан сачратиб ўтган лойқа сувидан ботқоққа ботган каби покиза кийимлари балчиққа беланиб қолмоқда. Бу ерлик ёшу катта аҳоли учун аҳвол шундай давом этса, қора ишчи кийимини кийиб, кўчага чиқиш афзал бўлиб қолмоқда.
МАҲЗУНА
“Бирдамлик” Халқ Демократик ҳаракати Навоий вилоят бўлими фаоли