ПАХТАКОР ТУМАН ИЧКИ ИШЛАР БЎЛИМИ ВА МИЛЛИЙ ХАВФСИЗЛИК ХИЗМАТИ МУТАСАДДИЛАРИ БУВИСИ САИДА ҚУРБНОВАНИНГ “БИРДАМЛИК” МУХОЛИФ ҲАРАКАТИДАГИ ФАОЛИЯТИГА ЧЕК ҚЎЙИШ, ТАҚИҚЛАШ МАҚСАДИДА БИР ЯРИМ ЁШЛИ НАБИРАСИ МУРОДЖОННИ ГАРОВГА ОЛИШГАН….
– Малоҳат, энди мен “Бирдамлик”да ортиқ ишлай ол масам керак. Чунки улар гўдак набирамни гаровга олишган, – сўз сўнгида Саида опа яна йиғлаб юбордилар.
– Яна қанақа гаров? Нима, набирангиз уларнинг қўлида қолдими?, – сўрадим ҳовлиқиб…
Саида Қурбонованинг изтиробли йиғисидан менга ҳамроҳлик қилган дўстим, Жиззахлик таниқли ҳуқуқ фаоли, 15 суткалик қамоқ жазосининг жабрини танасидан ўтказган Ўктам Пардаевнинг ҳам қўнгли алланечук бўлиб қолди…
– Тушунтириброқ, гапиринг, Саида опа, нимаг гап ўзи?, – бетоқат бўлди Ўктам Пардаев.
Шу пайт бир чеккада мум тишлаб ўтирган Саида Қурбонованинг келини Дилдора суҳбатга аралашди:
– Ая, бу ҳақида гапириб ҳам ўтирманг. Кафолат хатни мен ёзиб берганман. Набирангизни соғ-саломат юришини истасангиз, бу ҳақида оғиз оча кўрманг! Тинчлик керак бизга, – дея қахр қилганча қўл силтаб, биз ўтирган хонани тарк этди у.
Келинининг шаштини сезган Саида опа кўзларини юмиб, тин олди. Сездимки, Дилдора изин бермаса, Қурбонова сўз очишга қайта ботина олмайди. Шу сабаб ҳам Дилдорани гапга солдим:
– Нимага бунчалар оташин бўласиз, Дилдора, – дедим унинг ортидан эшикка чиқиб, – Илтимос, киринг. Аслида нима гап бўлганди ўзи? Гапириб беринг. Дардингизни бизга айтмасангиз, кимга айтасиз?, – умидли термулдим унга.
– Эй, опа, сиз бир келиб, кетадиган одамсиз. Булар билан бу ерда, мана, биз яшаймиз. Яхшиси, аямни тинч қўйингизлар. Бошқа “Бирдамлик” деган ташкилотда ишламайдилар. Тамом-вассалом, – жавоб қилди Дилдора қўрслик билан.
– Совуқда турманг, ичкарига кирайлик. Бафуржа гаплашиб олардик, – дедим унинг қўлтиғидан олиб, – Қани, кетдик.
Мезбон менга сўзсиз эргашди. Уйга кирдик.
– Ўғлингизни ким, нимага гаровга олади?, – Дилдорани саволга тутди Ўктам Пардаев.
– Аямларни “подвал”да истаганларича хўрлашган, калтаклашган. 15 кун бўлибдиямки, қўйиб юборгудек чўтлари йўқ. Ўзим ИИБ биносига ялиниб-ёлвориб кирдим. У ерда Акмал Жаҳоновмиди-ей, билмайман, бир милиция ходими ўтирган экан. У киши менга “Ўтир, кафолат хати ёзиб берасан!” деб талаб қилди. Ўтирдим. “Нима деб ёзай?” деб сўрасам, “Қайнонангни қўйиб юборамиз. Лекин бунинг эвазига бирортангни гаровга олишимиз керак бўлади. Агарда Саида Қурбонова яна бир бор “Бирдамлик” ташкилотида ҳукуматга қарши иш қилса, гаровдаги одам билан “гаплашамиз!””, деди. “Хўп, бўлади” деганча, тилхат ёзишга киришдим. “Қайнонам Саида Қурбонова иккинчи маротаба “Бирдамлик” ташкилотида ишламайди. Каримовга қарши гап гапирмайди, ҳукуматга тил текказмайди. Сўз бераман. Мабодо шундай бўлгудек бўлса, С. Қурбонованинг ҳатти-ҳаракатлари учун мени гаровга олишларингизни сўрайман” деган мазмунда, ҳозир аниғиям эсимда йўқ, хуллас, “Мени қайнонам учун кафолат сифатида гаровга олинглар” деган мазмунда кафолат хати ёзиб бердим. Пахтакор туман ички ишлар бўлимининг замначальниги Акмал Жаҳонов деганлари тилхатимни ўқиб кўрди-да: “Сен қайнонангга ким бўласан? Туғишганими? Бор йўғи келинисанку? Ҳеч ким эмассан Қурбонова учун! Гаровга олиш учун жигари, қондоши керак. Агар тинч юришни истасангалар, гаровга ўз болангни қўясан, тушундингми?” деганича ёзган тилхатимни бурда-бурда қилиб юзимга қараб сочиб юборди. Замначальникнинг важоҳати жуда ёмон эди. Шунинг учун Акмал Жаҳонов билан тортишиб ўтирмадим. У айтганидек қилиб, “Агар қайнонам Саида Қурбонова такроран “Бирдамлик” ҳаракатида ишлайдиган бўлса, менинг бир ярим яшар ўғлим Муроджон гаровда бўлади” дея қайтадан кафолат хати ёзиб бердим…. Меҳмонлар, сизлар ҳам бизни тушининглар, бизнинг тақдиримиз милисаларнинг қўлида. Мен ўн гулидан бир гули очилмаган боламнинг гаровда жувонмарг бўлиб кетишини истамайман. Энг яхшиси, аям шу ишларини ташлаганлари маъқул. Ҳукумат билан ўйнашиб бўлмайди. Бизни бошқа йўлимиз ҳам, чорамиз ҳам йўқ! “Бирдамлик”да фаолият юритаман деб аям шўрлик халқ душманига чиқиб қолдику? Хибсхонада эканликларида ортларидан егулик олиб борсам, ички ишлар ходамлари менга қараб: “Ҳа, Ватан хоинларига овқат олиб келдингми?” дея заҳарханда қилишганлари қилишган. Бу нимаси?” деди Дилдора зорланиб.
– Саида опа, сизнинг сиёсий фаолиятингиз учун гўдак набирангизни гаровга олишга ҳеч кимнинг ҳаққи йўқку? Бу ҳеч бир қонунга тўғри келмайди. Бунақаси ҳали бу ҳукумат тугул, бутун дунёда ҳам бўлмаганку? Нега уларга шу мазмунда кафолат хати ёзиб беришларига йўл қўйдингиз?, – хуноб бўлиб деди ҳуқуқбон Ўктам Пардаев.
– Ўктамжон, – Саида опа ҳорғин нигоҳларини Пардаевга қадади, – Келиним тўғри айтаяпти. Бизнинг ўзга иложимиз ҳам қолмаганга ўхшайди. Чунки Пахтакор туман ички ишлар бўлими бошлиғининг ўринбосари Акмал Жаҳонов шунчалар қутириб кетган эканки, босар-тусарини билмай қолган. Унга бас келиб бўлмайди, жаллоднинг айнан ўзгинаси экан…
– Бу Акмал Жаҳонов деганлари бунчалар ўзига ишонмаса? Нега у қўрқмасдан фуқароларнинг ҳуқуқларини топтайди, маҳкумларни, аёлларни таҳқирлайди? Боиси нима? Ўзбекистон ҳукуматини ичидан емириб, одамларда, халқда тузумга қарши кучли норозилик кайфиятини уйғотиш эмасмикин мабодо?, – дедим гуё ўзимга-ўзим гапираётгандек.
– Майор Акмал Жаҳоновнинг бу қадар қутириб кетишининг сабаби бор экан. Афтидан, илдизи бақувват, орқаси кучли шекилли, – афсус билан бош чайқаб гап бошлади Саида опа, – Бир куни майор мен билан Нуринисога қарата “Ўзбекистоннинг Бош вазири Шавкат Мирзиёев қаерлик?” деб сўради-да, кейин ўз саволига ўзи “Зоминлик!” дея фахр билан жавоб қайтарди. “Хўш, Пахтакор туман хокимининг туғилиб ўсган жойи қаер?! Зомин! Туман бош қозиси қаерда катта бўлган? Зоминда! Мен ҳам ўша тупроқданман – Зоминдан?! Қани, айтингларчи, Бош вазирни енгиб бўладими? Йўқ! Меничи? Асло! Шунинг учун ҳам огоҳлантириб қўйаяпман! Сенларни шесть секундда синдириб ташлайман! Менга чоҳ қазийман, юқори ташкилотларга шикоят ёзаман деб овора бўлиб юрманглар! Яхшиси. Бу ерда кўрган-кечирганларингни унутинглар!” дея Жаҳоновнинг ўзи бир куни бизга чираниб керилганди. Майор Акмал Жаҳонов ростдан ҳам Зомин туманиданми, ёки йўқми, буни Худо билади. Эҳтимол, бизга қуруқланиш, шунчаки мақтаниб қўйиш учун шундай дегандир? Мен уни ҳақиқатдан ҳам Зомин туманидан демоқчи эмасман. Шунчаки, демак, майор Жаҳонов Бош вазир Шавкат Мирзиёевнинг одами экан-да, деган фикир ўтганди ўшанда кўнглимдан. Бўлмаса, у бу қадар ўзидан кетиб қолмаган бўлармиди дейман-да. А. Жаҳонов ҳатто “оналаринг компьютерни келтириб беришни сўради” деб, ўғилларимни алдаб, уйимга кириб, хона компьютеримни олиб кетган ва 10 кундан кейин носоз қилиб, компьютернинг миясини ишдан чиқариб, унга алламбалолар ўрнатиб, яна қайтариб уйга олиб келиб ташлабди. ИИБдагилар одамнинг ожиз жойига, болаларига ёпишишаркан. Пахтакор туман ИИБ бошлиғи ўринбосари А. Жаҳонов “Қурбонова, агар яна бир марта шу йўлдан, “Бирдамлик”нинг изидан юрганинг қулоғимга чалингудек бўлса, менинг қарьерамга ҳалақит қилгудек бўлсанг, ўғилларинг ё нароктика билан қамалади, ёки бирор бир диний оқим аъзоси сифатида қулоғини ушлаб кетади. Кўрамиз, ўшанда додингни кимга айтаркансан? Ўғилларингни Ҳизбут таҳрирга алоқаси йўқлигини исботлай олармикансан?” деган пўписасини менга бир эмас, бир неча бор такрорлаган. Менинг фаолиятим учун бир ярим ёшли набирамни гаровга олишлари ноқонуний эканлигини ўзим ҳам яхши биламан. Лекин Пахтакор туманидаги қонун идоралари ходамлари қонун асосида ишлашармиди? Улар кўнгилларининг кўчаларига келган ишларини қилишадику?, – деди Саида опа изтироб билан.
“БИРДАМЛИК” ХАЛҚ ДЕМОКРАТИК ҲАРАКАТИ ФАОЛИ НУРИНИСО ҲОЛБОЕВАНИНГ ҲАМ 15 КУНЛИК ҚАМОҚДА КЎРГАН КЕЧИРГАНЛАРИ ҚУРБОНОВАНИКИДАН КАМ ЭМАС…
Очиғи, нафақат биз, балки Пахтакордаги таниш-билишлари, ҳатто, С. Қурбонованинг ўғиллари ҳам Нуринисо Ҳолбоеванинг 15 суткага қамалганлигидан бехабар эканлар. Мен бу ҳақда Саида опа билан кўришгачгина хабар топдим. Тонг отгач, Нуринисо опа билан ҳам кўришиш истагида, саҳарда опани Қурбонованинг уйига чорладик. Нуринисо опа 14 ёшли ўғли Умиджон билан кўп куттирмай кириб келдилар. Самимий салом-аликдан сўнг, кўнгил сўрашга чоғландим:
– Саида опамлардан эшитдим. Оғир кунларни бошларингидан ўтказибсизлар, ҳамдардман, -дедим ботинмайгина. Негаки, бундай пайтларда, энг қийини жабрдийдадан ҳол сўраш эканлигини жуда яхши биламан. Чунки одамзод ўзи билмаган ҳолда кишининг кўнглига озор бериб қўйиши ҳам ҳеч гап эмас….
– “Ўт балосидан, сув балосидан, туҳмат балосидан Худонинг ўзи асрасин” деб бекорга айтишмас экан-да. Мана, туҳматдан бўлиб, кўрмаган жойларимизни кўриб келдик. Биласиз, собиқ турмуш ўртоғим менинг жонимга қасд қилиб, пичоқлаб қўйганларидан кейин, қамалиб кетдилар. Шу ягона фарзандим билан ёлғиз қолгандим. Ўша куни менга ҳам қамоқ жазоси тайинлашди. Шунда ИИБ ходамларига “14 ёшли болам кўчада қаровсиз, пулсиз, оч-наҳор қолган. Бирор кўнгилсизлик содир бўлмасин. Ўғлим Умиджонга мен ҳақимда хабар бериб, уни ишончли қўлларга топшириб қўйинглар” дея зор-зор қақшадим. Қайда, улар гапимга қулоқ солишармиди… Шунинг учун ҳам болам бечора 15 кун кўчада ёлғиз қолибди, – Нуринисо опа ҳам тўлиб турган экан, кўнгил сўрашим билан “тўкилиб” кетди, – Шу куни эртасига ўғлим ўзимизнинг, “Тошкент” маҳаласининг Ҳасан исмли участка нозирига бориб, “Онам уйга келмаяптилар. Қаердалигини билмайсизми?” деб сўраган ҳам экан. Умидинг қургур участка нозири “Билмадим, хабарим йўқ” деганмиш, боламга ҳеч нарса айтмаганмиш. Мендан дарак бўлавермагач, ўғлим Умиджон туманимиздаги Пахтакор хўжалигида истиқомат қилувчи Севара исмли танишимнинг уйига бошпана излаб борган. Севара опа ўғлимни етаклаб, мендан дарак топиш илинжида Пахтакор туман ички ишлар бўлимига келиб, мен ҳақимда сўраса, Ички ишлар ходамлари Севара опага: “Саида Қурбонова билан Нуринисо Ҳолбоевалар Давлатга қарши иш олиб борган жиноятлари учун қамоққа олинган” дея жавоб қилишибди… Жудаям ёмон эзишди-да, ўзиям. .. ИИБ замьначалниги Акмал Жаҳонов деганлари худди қутирган итнинг ўзгинаси экан. Қамалган кунимизнинг ўзидаёқ ортимиздан кириб, бизни роса калтаклаган. Сочларимдан тортиб, бошимни бетон деворга ура-ура бошимни маматолоқ қилиб юборди. Бу милисалар шунақанги устаси фаранг бўлиб кетишган эканки, қаранг, бизни ўша кунининг ўзидаёқ уриб, аъзойи баданимизни кўкартириб юборишган. Орадан 15 кун ўтди, кўкарган, ғурра бўлган, қизарган излар кетиб бўлди-да… Даъво қилайлик, экспертизадан ўтайлик десак, қаерга ҳам борардик? Бизни, ичмаган аёлларни “ичди” дея хулоса берган суд тиббиёт экспертлари деган каззобларнинг ёнига ялиниб борамизми яна? Эй-ййй, бу дунёда ҳақиқат йўқ экан ўзи….
– Қай гуноҳингиз учун эди бу калтаклар?
– “Яна Қурбоновага эргашасанми? Оқ шарф тақасанми? Ҳокимиятнинг қаршисида расмга тушасанми? Давлатга тил теккизасанми?!” деб калтаклашди мени. 2011 йилнинг февраль ойида собиқ эрим мени кўчада пичоқлаётганида ўғлим Умиджон ёнимда эди. 13 ёшли болам мени ҳимоя қилиш учун отасига қаршилик кўсатган эди. Акмал Жаҳонов ўша гапни ушлаб олган. Замначальник “Агар Саида Қурбоновадан ажралмасанг, “Бирдамлик”ни ташламасанг, ўғлингни қаматаман. Ўғлинг отасига қўл кўтариб, жиноят содир этган. Биз ўшанда сенинг ёлғиз оналигингни инобатга олиб, ўғлингни жавобгарликка тортмагандик. Болангга енгиллик бергандик. Агарда ўз билганингдан қолмайдиган, қайтмайдиган бўлсанг, ўғлинг Умиджонни Намангандаги турмага тиқаман, ўзинг эса энг хафли жиноятчилар, ватан хоинлари ўтирадиган Қарақалпоғистондаги қамоқда чирийсан”, деб дағ-даға қилгани қилган. Жаҳонов ўзига жудаям ишонган экан. Акмал Жаҳонов ҳатто пагонини ўртага қўйиб қасам ҳам ичди: “Агар яна бир бор шу йўлга қадам қўйсанглар, “Бирдамлик”да туриб, тузумга қарши борсанглар, пагонимни ўртага қўйиб, қасам ичиб айтаман, уруғ аймоқларинг билан қираман, қуритаман. Қурбонова, агар яна Ўзбекистон ҳукуматига тил теккизадиган бўлсанг, аввал, ўғилларингни, кейин келину набираларингни кўз олдингда қамоққа келтириб тиқаман-да, кейин ўзингни йўқ қилиб юбораман. Оғзингни очишга ҳам улгурмай қоласан!” деб ўшқирди бир куни, – Нуринисо опа тиғ теккан танасини оҳиста силаб қўйди, – Ҳали ўзи тўлиқ соғайиб кетганим йўқ эди… Хибсхонада қайталиб қолдим…
МАҲКУМАЛАР ОЧЛИК ЭЪЛОН ҚИЛИШГАН…
– Бизни қамашганларида Саида Қурбонова билан 4 кун очлик эълон қилдик. Ўзи бир кунда бир маҳал – тушликда овқат беришаркан. Очлик эълон қилганлигимиз учун тўрт кун овқатланмадик. Ўша бир маҳал берадиган овқатларини ҳам қайтариб юбордик. Очликда совуқ янаям қаттиқроқ таъсир қиларакан. Силламиз қуриди. Лекин бирор бир Ички ишлар ходими парво қилмайди. “Нега тўрт кундирки бир маҳал бериладиган тамаддини ҳам тановвул қилмаяпсизлар?” деб сўрамайди ҳам. Кейин қарасак, бизнинг овозимиз, ноҳақликларга қарши очлик эълон қилганимиз шу торгина хибсхонанинг тўрт деворидан нарига чиқмайди. Милисалар гапимизга қулоқ ҳам солмайди. Очлик эълон қилдик, десак, эшитишмайди, эшитишни ҳам исташмайди. Охийри ҳолдан тоймаслик учун 9 декабрь куни тушликда берилган овқатни истеъмол қилишга қарор қилдик. Ўзимиз очлик эълон қилдик, ўзимизча тўхтатдик ҳам. Қамоқхонада буни биров эшитмади ҳам…
– Хибисхонада сизларни биргина Пахтакор туман ИИБ бошлиқ ўринбосари Акмал Жаҳонов тергов қилдими? Биргина майордан зуғум эшитиб, калтак еб, жабр кўрдингизларми?
– Акмал Жаҳонов бош ролда эди. Лекин фуқаро кийимида келиб сўроққа тутувчилар, ҳақорат қилувчилар, калтакловчилар сони кўп, бир-нечта эди. Афсуски, бирортасининг ҳам исм-шарифини билмаймиз. Улар бизга ўзларини таништиришмаган. Фуқаро кийимида бўлган “терговчи”лар ҳойнаҳой миллий хавфсизлик хизмати ходамлари бўлишса керак деган гумондаман… ИИБ ходамлари билишаркан, атай кўкармайдиган жойингизни топиб, мўлжаллаб зарб беришаркан… Мен…, – Нуринисонинг юзлари қизарди, – Еган калтакларим ҳақида истаганча гапиришим мумкин… Аммо милисаларнинг одам оғизга ҳам олиб бўлмайдиган уятли сўзлар билан қилган ҳақоратларини айтолмайман, уяламан….
НУРИНИСОНИНГ ИИБда ЁЗГАН ТУШУНТИРИШ ХАТИ
Махсус уюштириш усули билан қапқонга туширилган Саида Қурбонова ва Нуринисо Ҳолбоевалар “Домашная кухния” ошхонасидан Пахтакор туман ички ишлар бўлимига олиб келингач, ҳужжатлаштириш ишлари бошлаб юборилди. “Айбдор”лардан тушунтириш хати ёзиш талаб этилди. Нуринисо Ҳолбоева ўз тушунтириш хатида “Бизни айбдор қилиш мақсадида ташкиллаштирилган бу воқеаларни Пахтакор туман ички ишлар бўлими бошлиқ ўринбосари Акмал Жаҳонов уюштирган. Жиноятчи майор Акмал Жаҳоновни жиноий жавобгарликка тортишларингизни сўрайман” деган жумлаларни қайд қилди.
– Бироқ, – дейди Нуринисо, – На ИИБ ходамлари ва на судда раислик этувчи менинг тушунтириш хатимни ҳатто ўқиб ҳам кўрган эмас, ҳатто мазмунига ҳам эътибор қилишмади….
ТАЪҚИБЛАР ҲАЛИ ТУГАГАН ЭМАС…
Маҳаллий вақт билан соат эрталабки 8.00 лар эди. Нуринисо опа билан суҳбатимиз тугар-тугамас Саида Қурбонованинг келинлари Дилдора ҳовлиқиб хонага кирди:
– Мен сизларга айтдимку, Ҳукумат билан ўйнашиб бўлмайди, деб. Мана, энди нима қиламиз? Қаердан эшитишдийкин бу исковичлар? Уйимиз атрофини аллақачон қуршаб олишибди. Тўрт томонда машиналар турибди. Фуқаро кийимидаги, милиса формасидаги одамлар изғиб қолишибди. Биттаси, ана, уйимиз томонга келаяпти, – деди қақшаб.
Кейин эшикда Қурбонованинг ўртанча ўғли Мансур кўринди:
– Опа, (Аксарият Жиззахликлар онасини опа деб аташади) ана уларнинг биттаси ҳовлида турибди. Онангни чақир, гапимиз бор деяпти. Чиқаркансиз. Кимлигини танимайман. Исковичлардан, – деди Мансур ҳавотирли оҳангда.
– Онамнинг тоби йўқ, чиқа олмайди, деб айтгин. Мадорим йўқ юришга, – деди Саида опа маҳзун оҳангда. Ҳовлига йуналган Мансур кўп ўтмай ортига қайтди:
– Опа, улар “Уйларингизга Тошкентдан меҳмон келган экан. Ким у? Нега келибди? Кириб, меҳмон билан суҳбатлашсак бўладими?” деб сўраяпти. Мен унга “Меҳмон кечаси қайтиб кетган, уйда ҳеч ким йўқ” дедим. Энди нима қиламиз? Малоҳат опанинг мана бу ноутбук ва телефонларни тезда яшириш керак. Уйга куч билан кирадиган бўлишса, олиб қўйишади, – деди Мансур ташвишланиб.
Орадан ярим соат ўтар ўтмас, уйга важоҳатли бир аёл кириб келди. Кейин билишимча, “Чаманзор” маҳалласинининг хотин-қизлар бўйича маслаҳатчиси Бувинисо опа эканлар.
– Сиз кимсиз? Бу ерга нима мамқсадда келгансиз? Қурбоновани тинч қўясизларми, йўқми? Нима ишингиз бор Саидада? Нега тинчимизни бузасиз? Нима керак ўзи сизга?, – “маслаҳатчи” опа менга иддао қилишга тушди.
– Опажон, келинг, аввал танишайлик? Сиз ким бўласиз?, – дедим доимгидек жилмайиб.
– Мен хотин-қизлар бўйича шу маҳаллада маслаҳатчиман. Нимайди?, – деди Бувинисо опа қўполлик билан.
– Қурбоновадан ҳол сўраб келиш инсонийлик бурчим. Нима, сиздан махсус рухсат сўраб келишим керакмиди? Тушунмадим?, – дедим. Юзимда ҳамон сохта табассум.
– Менинг вазифам шу маҳаллага ким келаяпти, ким кетаяпти, ким оралаяпти аниқлаш. Суҳбатлашиш. Оилалардан хабардор бўлиш. Мен ўз юмушимни бажараяпман. Сингилжоним, бўлди, бас қилинглар, Саидани бошқа йўлдан урманглар. Бу бечора халқ душманига чиқиб қолдику? Мана, ёшиям олтмишга кирди. Қанча умр кўради, Худо билади. Қўйинглар, қолган умрини болаларининг бағрида ҳаловатда ўтказсин бечора, қўясизларми, йўқми?, – деди Бувинисо опа буғилиб.
– Мени халқ душмани деб атаганларнинг биринчиси ўзингизку? Яна қайси юз билан уйимга қадам қўйдингиз?, – менинг ўрнимга Саида опа жавоб қилди суҳбатдошимга…
Тортишув узоқ давом этмади. Мулойим муомала билан маҳалла маслаҳатчисини эпақага келтириб олдим….
Бувинисо опа хайрлашаркан:
Бу ерга кўп келавериб, ҳаловатимизни бузаверманг, илтимос сиздан. Йўқса, бошимда ёнғоқ чақилади. Мениям тушунинг. Мен шу маҳаллага, хотин-қизларнинг ҳаракатига жавобгарман, – деди ялинчоқ оҳангда…
Мана, Жиззахлик мухолифат вакилаларининг аччиқ қисматидан қисман бўлса-да воқиф бўлдингиз…. Қалбим қийма-қийма бўлиб сафардан қайтарканман, Нуринисо Ҳолбоеванинг “Тушунтириш” хати нуқул хаёлимда чарх ураверади: “Бизни айбдор қилиш мақсадида ташкиллаштирилган бу воқеаларни Пахтакор туман ички ишлар бўлими бошлиқ ўринбосари Акмал Жаҳонов уюштирган. Жиноятчи майор Акмал Жаҳоновни жиноий жавобгарликка тортишларингизни сўрайман”… Пахтакор туманида истиқомат қилувчи бир фуқаро, ожиза бир аёл ИИБ терговчисининг олдига “замначальнигини” жиноий жавобгарликга тортиш масаласини кўндаланг қилиб қўймоқда. Зеро, ўша пайтда, айтиш мумкинки, Нуринисонинг шу митта жони майор Жаҳоновнинг, милиция ходимларининг қўлида бўлган! Қўрқмаганини қаранг! Бунинг учун ҳам журъат, жасорат керак-да одамга! Бундай матонатни қаердан олдийкин бу митти жон?! Биргина аёлнинг юрагига шунчалар жасорат жо бўлган экан, демак, ғалаба онларимиз яқинга ўхшайди! Тез орада барча юртдошларимизнинг кўксида Нуринисоники каби бедор юрак уриб туришига ишонгим келади….
Малоҳат ЭШОНҚУЛОВА
“Бирдамлик” Халқ Демократик ҳаракати Ўзбекистон бўлими етакчиси