“Бирдамлик” Халқ Демократик ҳаракатининг фидойи фаоли, Ҳаракатнинг Хоразм вилоят бўлими етакчиси Валерий Назаров “Оммавий Шодлик” тадбирининг авж палласига чиққан маҳали – 6 декабрь куни изсиз ғойиб бўлган.
Гап шундаки, Валерий оға айнан 6 декбарь куни охирги бор Ҳаракатнинг Ўзбекистон бўлими етакчиси Малоҳат Эшонқуловага қўнғироқ қилиб, “Уйимни қуршаб олишган. Иккита ИИБ формасидаги ходим келиб менга “Сизни туман ИИБ бошлиғи чақиртирган. Биз билан бирга юринг” дейишди. Чақирув қоғози келтиринглар, ёки суднинг санкциясини кўрсатинглар, деб ИИБ ходимларига рад жавобини бердим, улар билан бирга бормадим. Тошкентга бориш учун поездга чиптам бор… Нима қилсам экан? Айланма йўллар билан уйимдан қочиб чиқсаммикан?” деган мазмунда гапирган. Шу-шу етакчимизнинг телефонлари ўчирилган, Ҳаракатнинг Хоразм вилоят бўлими матбуот котиби Бахтиёр Маҳмудовнинг ҳам телефони “хизмат доирасидан ташқарида”.
Хўш, Конститутция қабул қилинган куннинг 20 йиллиги олдидан Валерий Назаровнинг уйи нега куч ишлатар тизими ходимлари томонидан ишғол қилинган? Сабаби жуда оддий: Валерий оға, бор йўғи Ўзбекистон Қомуси қабул қилинган кунни хуррамлик билан кутиб олишга ошиққан эди! Бори шу! Умри тобора тугаб бораётганини ҳис қилган Ҳукумат эса ҳатто шундан ҳам ҳадик-да! Ўзбекларда бир гап бор: айтишади-ку, “Иштони йиртиқнинг чўпдан ҳадиги бор!” деб. Қўрққанга қўш кўринар деганларидек, бир фуқаронинг Конститутция кунини байрам қилишга бел боғлаши ҳам Ҳукуматни саросимага солиб қўяди! Эй, бу Каримов деганлари бунчалар қўрқоқ бўлмаса? Шу юрак билан у элни 23 йил қандай бошқарди экан-а?
Биз Каримов жаноби олийлари бир ҳақиқатни билиб қўйишини истардик: Тиккага кўтарилган қуёшнинг албатта пастга тушмоғи, уфқ ортига шунғумоғи бор. Ўзбекнинг осмонида ҳукум сурган қора кунлар ортда қолиши тайин, ойнинг қолган 15 куни ёруғ бўлғай! Сиз Валерий Назаров кабиларни таъқиб қиласизми, йўқми, барибир ёруғ кунлар яқин, жудаям яқин. Ҳаёт қонуни бу! Шундай экан Валерий ака каби халқнинг асл фарзандларининг хаётига хавф солиб, овора бўлиб ўтирманг Ислом оға! Сизга айтаримиз шу!
“Бирдамлик” Халқ демократик Ҳаракати Ўзбекистон бўлими Матбуот хизмати