Ўзбекистондаги собиқ сафдошлардан айримларига телефон қилиб “Қалай? Бирдамликнинг акциясига қатнашяпсизларми? Акция қандай ўтяпти?” каби саволлар бердим…
– Шаҳар марказларида,бозорларда,оқ кийинган аёллар,қизлар кўриняпти. Эркакларни кам кўрдим.
– Ўзингизчи,ўзингиз оқ кийим кийиб чиқмадингизми? Бирдамлик Сизга бегона эмасдир…
– Бегона эмас,шу учун оқ кўйнакда юрибман. Аммо оқ шим қурғур топилмаяпти…Кулранг шимдаман, – кулди,оғайним…
Сўнг бошқа бирига қўнғироқ қилиб шу хил саволлар бердим:
– Киймоқчиману,миршаблар ҳар бир оқ кийинган одамга қизиқиб қараётганини,баъзиларининг ҳужжатларини сўраб-суриштираётганини кўргач ҳафсалам пир бўлди.
– Қўрқаяпсизми?
– Қўрқишга қўрқмайман,бирликдалигимизда қамалиб ҳам кўрганман,аммо арзимаган нарсага қамалгим келмайди…
– Нега арзимаган дейсиз? Ахир бу ҳам ўзига яраша акцияку! Айтайлик жамоатчилик эътиборини тортасиз. Эшитганлар шунақа ташкилот бор экан,улар нозўровон кураш тарафдори экан,ҳокимиятда ислоҳот ўтказиб,тинч йўл билан демократия қурмоқчи экан,деб ўйлашади…
Телефон гўшагининг нарёғида “дут…”,”дут…” деган товуш эшитилди.
“Демак қўрқаяпти,ёки қуда томон алоқани узиб қўйди”,деб ўйладим…Аслида оқлик – ёруғлик,тинчлик белгиси…Ундан қўрқишга ҳожат йўқ,эди…Акциячиларни қўрқитаётганлар миршаблар! Дарвоқе,улардан баъзиларини танирдим. Қўрқитиши мумкин бўлганлардан бирига қўнғироқ чалдим.
– Алё,ўзингмисан? Ҳалиям ўша ишингда ишлаяпсанми?
– Йўқ,солиқ инспекциясига ўтиб кетганман.
– Нега?
– Энди миршабликда нон қолмади,қолаверса,эртадан кечгача чоп-чоп. Бир соат тиним йўқ…Маҳаллада бир қиз билан бир йигит дон олишиб қолсаям,миршаблардан сўршяпти…
– Бирдамликнинг акцияси бўлаётган экан,эшитдингми? Нима бўляпти,акция?
– Оқ кийинганлар юришибди. Аммо менинг собиқ касбдошларимнинг ҳам қулоғи динг.
– Уларнинг нега қулоғи динг! Аслида бу акция,мамлакатда демократия бўлишини истовчилар акцияси…Демократия бўлса,миршабларга ҳам яхшику! Вақтида ишига бориб вақтида келади,маданий дам олади,бола чақасининг тарбияси билан шуғулланади.
– Шўро давридаги гапларни гапиряпсизку,ока! Қанақа дам,қанақа тарбия?
– Нега? Миршаблар одам эмасми? Дам олмайдими?
– Айтдимку! Эртадан кечгача чоп-чоп. Агар кечаси ухламаган бўлсанг ҳам эрталаб ишга боришинг керак…хуллас,телефонда кўп гапириб бўлмайди. Бир дақиқа тиними йўқ,миршаб бечораларнинг…Уларга ҳам қийин. Чет элдаги пикетлар етмагандай,энди Бирдамлик акцияси ҳам уларнинг бошига ғалва бўлди…
– Нега ғалва бўлади? Ахир улар бировни ураётгани,бурнини қонатаётгани йўқ,тинчгина оқ кийиниб юришибди! Миршаблар индамай ўтиб кетавиришса бўлмайдими?
– Индамай ўтаолмайди,уларнинг бири формада бўлса,бошқаси формасиз. Бир бирини кузатиб юради…Уларга бошлиқлар буйруқ беради,буйруқни бажармаса,онасини Бешқўрғондан кўрсатишади
– Учқўрғондан деявергин,мақолни нега ўзгартирасан?
– Бу ерда Учқўрғон йўқ! Тошкентнинг шундоқ яқинида Бешқўрғон бор…Хуллас,деворнинг ҳам қулоғи бор. Мен солиқчи бўлиб кетганман. Ишларим яхши!
– Ҳа,ўзбек шунақа,ўзининг иши яхши бўлса бўлди,бошқа билан иши йўқ. бизнинг фожиамиз ҳам шунда.
– Энди ока,ачитиб гапирганингизнинг фойдаси йўқ Мен сизни тушунаман,аввалги ишимдан ҳам ўша тушунганим учун қочдим. Ҳозир қочаолмай юрганлар қанча.
– Ўша қочолмай юрганларнинг телефонларини бер бўлмаса!
– Майли,СМС қилиб ёзиб юбораман.
Шудай қилиб у менга иккаламиз ҳам танийдиган баъзи миршабларнинг телефонларини СМС қилиб ёзиб юборди. Аксига олиб кўпларининг номери МТС экан. Янгиларига ҳам қўнғироқ қила олмадим. Шундан кейин миршабларга Бирдамлик сайти орқали мурожаат қилгим келиб қолди:миршаб укам:агар билсанг,оқ ранг,эзгулик,ёруғлик ранги! Ҳар бир оқ кийинган одамга эргашиб юрма! Қозоғистонда бу хил акцияларга эътибор ҳам беришмайди…Чунки,бу хил акциячилар тинчлик ва хотиржамлик тарафдорлари. Сен тинчлик бўлсин,деб елиб-югурганингдай,ўзбекистонлик акциячилар ҳам жамиятда яхши ўзгаришлар бўлсин,халқимиз дориломон яшасин,деб ўзларича жон куйдиришяпти! Керак бўлса,сенинг ҳам тинчлигинг ва хотиржамлигинг,вақтида ишга бориб,вақтида дам олиш жойларига бориб ҳордиқ чиқаришинг учун тинч,нозўровон кураш олиб боришяпти…Конституция,Қанун билан яшашаётган бўлишса,ҳеч кимга озор етказмаётган бўлишса,нега уларни кузатиш,ҳужжатларини текшириш керак?! Ақлингни йиғиб ол,оқ рангни сев! У эзгулик ва тинчлик рамзи!
Б. Норбой!
http://www.wdscode.guru/birdamlik/?p=23747