2012 йилнинг 8 ноябрь куни қайта таъмирланган Урганч темир йўл вокзалининг очилиш маросими бўлиб ўтди. Тадбирда “Ўзбекистон Темир йўллари” давлат акциядорлик темир йўл компанияси бошқаруви раиси О.Раматов ва Хоразм вилояти ҳокими П.Бобожоновлар иштирок этдилар.
Урганч шаҳрида олиб борилаётган қурилиш ва ободонлаштириш ишларига ҳамоҳанг равишда “Урганч темир йўл вокзали” қисқа вақтда замонавий талабларга жавоб берадиган даражада қайта таъмирланди. Юксак қурувчилик маданияти, нозик дид ва юқори меъморчилик андозаларида барпо этилган ушбу объект, кундан кун чирой очиб, янгиланиб бораётган вилоят марказига алоҳида кўрк, бошқача бир салобат бахш этади. Ушбу объект “Ўзбекистон Темир йўллари” давлат акциядорлик Темир йўл компанияси саъй-ҳаракатлари билан гўзал маданий обида даражасига етказилди.
Қурилиш ишларини амалга оширган “Ўзбекистон Темир йўллари” ДАТК қурувчилари ўз ишларини замонавий қурилиш технологиялари асосида олиб бориб, қайта қуриш ва таъмирлаш ишларида энг янги қурилиш материалларини қўллаганлар. Бу ерда замонавий қурилиш технологиялари миллий ва маҳаллий меъморчилик анъаналари билан бирлашиб, мукаммаллик касб этган. Вилоятда амалга оширилаётган бунёдкорлик ишлари Хоразмнинг минг йиллик кошинпазлик анъаналари тараққиётига янги туртки бўлди. Ота-боболаримизнинг асрий тажрибаси энг замонавий биноларга ҳам ўзгача кўрк бағишлаб турибди.
Вокзалда йўловчи ва сайёҳлар учун шароитлар яхшиланган. Урганчга келган киши кенг ва шинам перронга тушар экан кайфияти кўтарилади. Вокзал ичкарисида она ва бола, тиббий хизмат кўрсатиш, дам олиш хоналари мавжуд. Хизмат кўрсатиш юқори савияда ташкил этилган. “Ўзбекистон Темир йўллари” ДАТК Урганч шаҳридаги “Ёшлар кўли” дам олиш мажмуасини такомиллаштиришда ҳам ўз ҳиссасини қўшмоқда. Қолаверса, “Ўзбекистон Темир йўллари” ДАТК тасарруфига ўтказилган вилоятдаги “Қабуллар уйи”ни сайёҳлик мажмуасига айлантириш, Самарқанд-Бухоро-Урганч йўналишида соатига 250 километр тезликда ҳаракатланадиган тезюрар поезд учун Бухоро-Урганч темир йўлини қуриш ишлари ҳам режалаштирилмоқда.
Фақат бир нарса, вокзалга олиб борадиган кўчанинг объектга яқин ҳудудларида неча йиллар давомида соя бериб турган кўплаб дарахтларнинг қурувчилар томонидан аёвсиз қўпориб ташланганлиги ачинарлидир. Вокзал олдига ўтқазилган тоғ арчалар эса айримлари қуриб, айримлари яхши ўсмай, йиллар давомида кичик жуссаларини сақлаб қолиши беш қўлдай аён. Табиатни муҳофаза қилиш қўмитасининг биохилмахилликни сақлаш йўлидаги ишлари ҳатто ҳукумат томонидан танқид остига олинаётган, Хоразмдаги экологик вазиятда ҳар бир дарахт бебаҳо бойлик даражасига етаётган бир пайтда бундай бемаънилик ақлга сиғмайдиган ҳолдир.
Бахтиёр МАҲМУДОВ, хоразмлик журналист.