Талабаларини пахта теримига жамулжам қатнаштиролмаган коллеж директори Хива тумани ҳокими изни билан бир кунлик ҳибсга олинди. Бунга, мазкур директор ўқувчиларни таълим жараёнига тўлиқ қатнаштиролмагани, давомат камлиги, баҳона қилиб кўрсатилди. Бир томондан, бу ҳам тўғри. Чунки у ўқитувчиларга ўқишга тўлиқ қатнаштирилган талабалар сони эвазига давлат бюджетидан мукофот тақсимлаган экан.
Лекин нима учун ўқув жараёнида эътибор берилмаган ҳолат пахта терими мавсумида юзага чиқди? Хива туманида таълим-тарбия жараёнининг ташкил қилиниши қуйидагича: Коллежга юқоридан, бу йил фалон талаба ўқишга қабул қилиниши керак, деган буйруқ келади. Режа юқоридан узатилади. Аммо қўли ишга яраган ўқувчи 9-синфни тамомлагач, рўзғор юритишга тиргак сифатида пул топиш илинжида ишлашни истайди.
Мактаб эса унинг ҳужжатларини коллеж маъмуриятига узатади. Ўқувчи баъзан бундан бехабар қолади. Эндиги босқич коллеж директорига боғлиқ. У ноиложлик таъсирида ўқувчини қабул рўйхатидан ўтказишга мажбур. Таълим жараёни бошланиши билан ўқувчи пахтага йўл олиши керак. Шуни билганидан у бу бепул меҳнатга эмас, мўмай даромад келтирадиган ишга интилиб, яқин хорижга кетиб қолади.
Шуниси қизиқки, Хива тумани ҳокими фермерлар безор бўлиб ташлаб кетган ерларни коллеж муассасаларига бериб, директорларни фермерга айлантирган. Масалан, Хива агробизнес касб-ҳунар коллежига 4 та фермер ташлаб кетган пахта етиштиришга мўлжалланган 400 гектар ер ажратилган. Агар директор зиммасига юкланган пахта етиштириш режасини бажармаса, лавозимидан айрилади. Шунинг учун у талабалар ва ўқитувчиларнинг барчасини пахта ишига жалб қилади.
Туман ҳокими пахта теримига жалб қилинган талабалар сонини назорат қилганида 50 фоиздан зиёд ўқувчи теримда қатнашмаётганлиги маълум бўлган. Шунинг учун жазо сифатида коллеж директорини 1 кун ҳибсда сақлаб, иш унуми ваъдасини олиб, қўйиб юборган. Буни қарангки, мазкур ҳолат директорни ўқувчилар олдида беобрў қилди ва талабаларнинг теримга қатнашуви умуман узилди.
Валерий НАЗАРОВ, “Бирдамлик”нинг Хоразм вилояти бўйича етакчиси.