Мен “Озодлик” радиосида ишлаб юрган кезларим. Бир куни мени хонадонимга бир аёл ёрдам сўраб келди. У бир фарзанди билан эридан ажраган ва ҳозирда бир хонали квартирада истиқомат қилар эка.Уша пайтларда АҚШ нинг қайсидир ташкилоти Ўзбекистондаги аёллар бизнесини ривожлантиришга ҳисса қўшиш учун, тижорат билан шуғилланишни хоҳлаган ҳар бир аёлга, маълум миқдорда фойизсиз пул ажратган ва мени олдимга ёрдам сўраб келган аёл ҳам бу имкониятдан фойдаланиб, яхши ниятлар билан АҚШ ташкилотидан 75 минг сўм пул олган экан. Бу пул ўша пайт учун анчагина пул эди. Эндигина ижорат ишларини йўлга қўйиб Қирғизистондан биринчи бор мол олиб келаётганда чегарачилар аёлни ушлаб, юкларини мусодара қилиб юборишган экан. Унинг айтишича аёл, бир ой ўтгач ҳалиги олган пулини қайтариши керак экан, қайтарса яна ёрдам берилар экан. Қайтармаса йўқ. Мен унга қандай ёрдам беришим мумкин эди? Жуда бўлса уша воқеани ёритаман ва бу хабар ҳукуматга таъсир қилса уша аёлни иши ўнгланиб кетиши мумкин. Муҳбирни қўлидан бошқа нима ҳам келиши мумкин? Ҳалиги аёлга ёрдам берган ташкилот ҳозир борми йўқми? Билмайман.
Орадан анча йиллар ўтди. Куни кеча маҳалламиз гузарида ўтирсам, ҳалиги аёлни кўриб қолдим. Аёл, тўғри келиб, атрофга бир разм солдида, гавжум жойдаги ҳар ҳил эълонлар қолдириладиган жойга, бир эълонни ёпиштирдида, бир менга зарда қилгандай, ғалати қараб, йўлнинг нариги томонига ўтиб, таксига ўтириб кетди. Унинг менга бундай қараши: – Ҳа! Американгни ҳам, сенларни ҳам қўлларингдан нима келди? Кўриб қўйларинг! Ҳозирга келиб мен сенларсиз ҳам аёллар кичик короҳонасини очдим, энди уларни ишга жалб қилиш учун эълон бераяпман- деяётгандек туйилди. Аёл кетгач, у ёпиштириб кетган эълонини ўқий бошладим. “ 1 ХОНАЛИ КВАРТИРА ЗУДЛИК БИЛАН СОТИЛАДИ!».
Носир Зокир