Куйнинг, қўшиқнинг тили, миллати бўлмайди дейишади. Океан ортида таралган жонбахш куй оҳангини уммоннинг бу қирғоғидаги инсон қалбан ҳис қилади, сўзсиз тушунади, гоҳо мусиқа ўз тингловчисини оҳанга монанд тебратса, гоҳида чўқур ўйлар уммонига ғарқ қилади… Ер шарининг жанубида айтилган қўшиқ ғарбдаги мухлисини махлиё этиши, маст қилиши ҳақиқат. Шу маънода қўшиқчилик санъати бутунжаҳон санъатлардан бири саналади. Куй, қўшиқ бу эзгулик, гўзаллик, ҳис-ҳаяжон рамзи. Инсонннинг энг нафис туйғулари-ла йўғрилган қўшиқ асир этган қалб кишиларини бир-бирларига яқинлаштиришга хизмат қилади. Айнан мана шу жиҳатдан мусиқа санъатини, қўшиқ санъатини халқларни, қалбларни бир-бирига яқинлаштирувчи оҳанграбо, миллатлар ўртасидаги дўстлик риштасини боғловчи тилсим дейиш мумкин.
Бугун, 5 октябрь куни АҚШнинг Ўзбекистондаги элчихонаси барча ҳимкорларини 3-йиллик Дэниэл Перл мусиқа кунлари муносабати билан ташкил этилган концерт дастурига таклиф этди.
Маълумки, Дэниэл Перл Жаҳон мусиқа кунлари куйнинг, оҳангнинг универсал тили орқали бағрикенглик, дўстлик, ҳамкорлик, эзгулик, ўзоро тиллашишни тарғиб этиш мақсадида октябрь ойи давомида ўтказиладиган мусиқий тадбирларнинг глобал тармоғи ҳисобланади. Шу ўринда Дэниэл Перл хусусида икки оғиз сўз: Дэниэл мусиқанинг илоҳий кучи орқали халқларни ўзаро яқинлаштириш истагида ёнган иқтидорли мусиқачи эди. Хабарингиз бўлса керак, ажойиб журналист, салоҳиятли санъат соҳиби – мусиқачи Дэниэл Перл 2001 йилнинг 11 сентябрь воқеаларидан кўп ўтмай Покистонда ўғирлаб кетилган ва ёзув унсирлар қўлида жон таслим қилган, жисман йўқ қилинган. Аммо унинг мусиқалари барҳаёт, ҳамон дунё аҳлига қувонч улашмоқда, қалбларга илҳом бағишлаб келмоқда. Фикримизнинг исботи ўлароқ, мана, 2002 йилдан буён журналист ва мусиқачи Дэниэл Перл меросини қадрлаган 119 та мамлакатда унинг хотирасига бағишлаб 8900 дан ортиқ мусиқий чиқишлар ўтказилди. Бу каби концерт дастурларини уюштиришдан мақсад, Дэниэл Перлнинг ҳаёт йўли ва ижодий фаолиятини ёдга олиш асосида кишилар қалбида эзгулик учқунларини аланга олдиришга, инсонларни зўравонликка қарши кураш йўлида бирлаштиришда мусиқа санъатининг кучи, қудратидан оқилона фойдаланишга қаратилган.
“Офарин” гуруҳининг жозибали раққосалари, шунингдек, бетакрор овоз соҳиби Насиба Абдуллаева иштирокидаги Дэниэл Перл мусиқа кунлари муносабати билан ташкил этилган концерт дастурини АҚШнинг Ўзбекистондаги элчиси Жорж Крол жанобларининг кириш сўзи очиб берди. Ўз нутқини “Ассалому алайкум!” деган ўзбекона лутф билан бошлаган элчи жаноблари ташрифлари учун тадбир иштирокчиларига ўз миннаддорчилигини изҳор қиларкан,йиғилганларни мусиқа куни билан самимий қутлади. Шунингдек, Жорж Крол жаноблари мусиқанинг сирли, сеҳрли оламига ҳам қисман тўхталаркан, журналист ва мусиқачи Дэниэл Перлнинг ҳаёт йўли, мусиқа санъати соҳасидаги ютуқларини ҳам алоҳида тилга олиб ўтди.
Мавриди келганда шуни ҳам таъкидлаш керакки, Дэниэл Перл мусиқа кунлари муносабати билан ташкил этилган концерт дастурига айнан эл ардоғидаги санъаткор Насиба Абдуллаева ва “Офарин” раққосалар гуруҳининг таклиф этилиши бежиз ва тасодифий эмас.
Қарйиб чорак асрдан ортиқ умрини ўзбек қўшиқчилигининг ривожига бахшида этиб келаётган Насиба Абдуллаева элнинг севимли хонандаларидан бири. “Ўзбекистон халқ артисти” унвони соҳиби, ҳамда “Меҳнат шуҳрати” ордени нишондори Насиба Абдуллаеванинг нафақат ўз она тилимизда, балки форс, озар, турк ва рус каби кўплаб ҳорижий тилларда куйлаган қўшиқлари аллақачонлар мухлисларнинг қалбидан чуқур жой олиб улгурган. Шунингдек, кўплаб ҳорижий мамлакатларида яккахон концертлари билан танилган хонанда бир қатор фестиваллар иштирокчиси ҳамдир.
2003 йилда ташкил топган “Офарин” раққосалар гуруҳи Республикасиздаги етакчи раққосалар жамоасидан бири саналади. Репертуаридан анъанавий ўзбек рақслари билан бир қаторда чет мамлакатларнинг замонавий ва халқона рақслари ҳам ўрин олган “Офарин” рақс дастаси жамоаси Индонезия, Корея, Хитой, Бирлашган Араб Амирликлари, Туркия, Исроил ва МДҲ мамлакатларида ҳам ўз санъатиларини моҳирона намойиш қилишга муваффақ бўлган.
Бугун АҚШнинг Ўзбекистондаги элчихонаси биносининг мужазгина ҳовлиси саҳнига йиғилган санъат ихлосмандлари иқтидорли хонанда Насиба Абдуллаеванинг оромбахш қўшиқлари-ю, “Офарин” гуруҳининг жозибали рақсларидан баҳраманд бўлдилар.
– Аслида концерт дастурини элчи жаноблари ўзларининг ўзбекона нутқлари билан бошлаган онларидаёқ баҳри-дилим очилиб кетган эди. Нафақат менинг, айтишим мумкинки, барча иштирокчиларнинг кўнгиллари тоғдай ўсиб кетди десам, адашмайман. Чунки элчи жаноблари ўзбек тилида сўз бошлашлари билан гулдурос қарсакларга кўмилиб кетди…. -“Тил билмоқ-дил билмоқ” деб шунга айтсалар керак-да. Миллатимизга, тилимизга бўлган ҳурматдан чексиз севиниб кетдик…. Очиғи турмуш ташвишларидан ортиб, бундай ўйлаб қарасам, яқин ўртада бугунгидек мириқиб ҳордиқ чиқармаган, вужудим сел бўлиб, куй-қўшиқ эшитмаган эканман. Тўғри, дискларда кўрган, эшитган бошқа, саҳнада турган хонанданинг хонишини тинглашнинг завқи ўзгача-да барибир… Кўнглим қўшиққа ошно бўлмаганига анча бўлиб кетган экан, рости. Руҳим ором олди, маза қилдим, – дейди 3-йиллик Дэниэл Перл мусиқа кунлари муносабати билан ташкил этилган концерт дастурида иштирок этган “Бирдамлик” Халқ Демократик ҳаракати Ўзбекистон бўлими етакчиси Малоҳат Эшонқулова.
Бўлиб ўтган куй, қўшиқ кечаси барча иштирокчиларнинг қалбида узоқ вақт муҳирланиб қолишига, садо бериб туришига шубҳа йўқ.
“Бирдамлик” Халқ Демократик Ҳаракати Ўзбекистон бўлими Матбуот хизмати