Бугун, 25 сентяьр куни АҚШнинг Ўзбекистондаги элчихонасида, айтиш ўринли бўлса, Америка Қўшма штатлари сиёсат оламнинг устунлари, Президент Олий дипломатия хизматининг профессионал аъзоси, маслаҳатчи элчи мақомамига эга дипломат Жозеф А. Персел ва АҚШ давлат котибининг “Аъло хизматлари учун”, “Карьерада эришган ютуқлари учун”, Давлат департаментининг “Буюк ҳурмат” мукофотлари, шунингдек, Мудофаа вазирлигининг “Аъло давлат хизмати учун” ва НАСАнинг “Аъло хизматлари учун” медаллари соҳиби, “Россия ва Евросиё” дастури директори, дипломат Жеймс Ф. Коллинз жаноблари билан журналистлар учрашуви бўлиб ўтди.
Тадбирни АҚШнинг Ўзбекистондаги элчиси жаноб Жорж Крол олиб борди.
Собиқ Иттифоқ ўрнида пайдо бўлган давлатлар ва Яқин Шарқ, Россия ва Евросиё, АҚШнинг ташқи сиёсати, АҚШнинг Россия ва МДҲ мамлакатлари билан муносабатлари, Европа, қурол-яроғ назорати ва тарқалмаслиги, Россия сиёсати ва иқтисоди бўйича эксперт, элчи Жеймс Коллинз жаноблари журналистлар билан бўлган мулоқот давомида ўзининг юксак даражадаги сиёсатшунос эканлигини яна бир бор намоён қилди.
– 33 йилдирки уруш дахшатларини бошидан ўтказиш бу халқ учун улкан фожиа, – дейди элчи Жеймс Коллинз жаноблари журналистларнинг қўшни Афғонистон масалаларига оид саволларга батафсил тўхталаркан, – Афғонистон масаласида у ғолиб бўлди, бу мағлуб, унисининг қўли баланд келди, келмади, деган гап йўқ. Бўлиши ҳам мумкин эмас. Бу ерда фақат биргина мағлуб деган тушунча бор, холос. Биргина мағлублар бор, жафо чекатган биргина жабрдийдалар бор, мағлублар бу – Афғон халқи. Бу халқнинг эртаси, саодати учун ҳам ҳар қандай низоларга барҳам берилиши керак…
Шунингдек, сиёсатшунос Жеймс Коллинз жаноблари “Ўзбекистон, Тожикистон, Қирғизистон давлатларининг ўзоро муносабатига қандай қарайсиз?” деган саволга, лўндагина қилиб:
“Сиз номларини тилга олган давлатлар ўзоро тил топишиб, муносабатларига ойдинлик киритиб олишлари, мавжуд муаммоларни биргаликда ҳал қилишга урунмоқлари даркор. Токи, учунчи бир давлатнинг аралашувига ҳожат қолмасин” деди комил ишонч билан.
– Агар менга Ўзбекистонда инсон ҳуқуқларини ҳимоя қилиш, кафолатлаш масалалари қониқтирадими, деб савол берганингизда, мен иккиланмай, йўқ, бу масала мени қониқтирмайди деган бўлардим. Бу муаммони бартараф этиш чораси нимада деган саволга эса, инсон ҳуқуқларини бузилишига йўл қўйилишининг олдини олиш энг аввало Ўзбекистон халқининг ўзига боғлиқ, деган фикрни билдирган бўлардим, – дейди 1997-2000–йилларда АҚШнинг Ўзбекистондаги элчиси лавозимида ишлаган диломат Жозеф Персел жаноблари.
АҚШнинг сиёсат олами отахонлари билан бўлган учрашув, ўртага ташланган саволларга улар томонидан берилган ҳар бир мушоҳадага бой жавоблар ўзбек журналистларига яхшигина сиёсат мактаби бўлди.
“Бирдамлик” Халқ Демократик Ҳаракати ўзбекистон бўлими Матбуот Маркази