Ўзбекистонда ва юртдан олисда истиқомат қилаётган Ватандошлар!
Муҳтарам мусулмон аҳли!
“Бирдамлик” халқ демократик ҳаракати барча-барчангизни Рамазон ҳайити билан самимий муборакбод этади. Байрамингиз қутлуғ бўлсин!
Биласиз, ийд-рамазон ҳайити мусулмон аҳли учун муқаддас байрам саналади.
Ушбу қутлуғ кунларда ўтганларнинг руҳлари шод этилади, қабристонлар зиёрат қилинади, кекса-касалманд кишилардан кўнгил сўралади, энг муҳими, одамлар ўрталарида бўлиб ўтган гина-кудратларни унутадилар, юраклар кечиримлилик, саховатпешалик, меҳр-оқибат, мурувват каби туйғуларнинг суруридан сув ичади.
Бир сўз билан айтганда ийд-рамазон байрами – бу – ҳамжиҳатлик, дўстлик, биродарлик, яхшилик ва фақат яхшиликлар, эзгу истаклар, олий мақсадлар айёми ҳисобланади.
Мана шундай шукуҳли кунлар барчангизга муборак, азизлар!
Ҳамиша бахт-иқбол, омад ҳамроҳингиз, Яратганнинг ўзи ёрингиз бўлсин. Дастурхонингиздан қут-барака, кўнглингиздан қувонч, юзингиздан табассум ҳеч қачон аримасин!
Кейинги Рамозон Ҳайитини ҳам қаторимиздан кам бўлмай қаршилаш барчамизга-да насиб этсин!
Яна бир бор айём муборак!
“Бирдамлик” халқ демократик ҳаракати