Муҳтарам ватандошлар, юртдан олисда, океан ортида – Америка диёрида қўним топган қадрдонлар!
Бугун сиз истиқомат қилаётган замин халқи Америка мустақиллигининг икки юз ўттиз олти йиллигини катта тантаналар билан қарш олиш остонасида.
Зеро, тили, дини, ирқи, миллатидан қатъий назар Америкада истиқомат қилаётган халқларнинг озодлиги, эрки, ҳуқуқи, фаравон ҳаётига, демократик тамойилларга мустаҳкам пайдевор бўлиб хизмат қилаётган бу мустақиллик –шукуҳли кун чин маънода шодёна қилишга арзигулик!
Аминмизки, инсон манфаатлари улуғланган бу диёрда Ўзбекистондан бориб умргузорлик қилаётган миллатдошларимиз, юртдошларимизнинг ҳам қадр-қиммати кафолатланган!
Азиз юртдошлар! Уммон ортидаги Ватандошлар!
Барча-барчангизни, сиз орқали ватандошларимига қучоқ очган бағри кенг Америка Қўшма штатлари Ҳукуматини, жамики Америка халқини беназир айём билан қалбан муборакбод этишга изин беринг!
Юрт ишқида қалби уртанаётган, юраги ёнаётган барча ватандошларимизга, бағри уммон янглиғ кенг, сарҳад билмас Америка халқига Мустақиллик куни муборак!
Жамики озодликка, эркга ташна кўнгилларга хотиржамлик, руҳ ва тан сиҳатлик, туганмас шодлик, осмон ўпар бахт, меҳру муҳаббатга лиммо-лим лаҳзалар ҳамиша ҳамроҳ бўлсин!
Қадрли миллатдошлар, муҳтарам юртдошлар!
Жонажон Ўзбекистонимизнинг чинаккам эрку озодлигини, ростакам мустақиллигини кўриш тез кунларда сизу бизга, барчамизга насиб этсин!
“Бирдамлик” халқ ҳаракати Ўзбекистон бўлими фаоллари барчангизни энг сара эзгу ниятлар билан қутлайди!