Инсон бўлиб дунё келдинг ўзинг учун,
Шамол каби шошиб елдинг ўзинг учун,
Турли йўлда Мажнун бўлдинг ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Пасту баланд қаср қурдинг ўзинг учун,
Шоти қўймай юлдуз урдинг ўзинг учун,
Единг, ичдинг, ётиб турдинг ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Сув келганда симирасан ўзинг учун,
Тош келганда кемирасан ўзинг учун,
Сўқим каби семирасан ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Текин бўлса тош ютасан ўзинг учун,
Ёғлиқ палов, ош ютасан ўзинг учун,
Калла-поча, бош ютасан ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Жўшқин дарё, сой бўласан ўзинг учун,
Кўзлари оч бой бўласан ўзинг учун,
Ўзинг исқирт ой бўласан ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Қуён юрак шер бўласан ўзинг учун,
Орият йўқ эр бўласан ўзинг учун,
Аслинг балчиқ ер бўласан ўзинг учун,
Айтгин ахир нима қилдинг миллат учун?
Айтгин ахир нима қилдинг ватан учун?
Аҳли Туроним
Аҳли Туркистоним, аҳли Туроним,
Тупроғи тиллодан миллатим жоним,
Дунёга танилган шарафим шоним,
Айрилсанг айиғу, бўлинсанг бўри,
Абадий ўчмасин туркийнинг қўри.
Аҳли Туркистоним, аҳли Туроним,
Бирлашса довулдир тенгсиз бўроним,
Оламни титратар залвор суроним,
Айрилсанг айиғу, бўлинсанг бўри,
Абадий ўчмасин туркийнинг қўри.
Аҳли Туркистоним, аҳли Туроним,
Бебош бекваччалар, амирлар хоним,
Қирпичоқ бўлмагин тўкилиб қоним,
Айрилсанг айиғу, бўлинсанг бўри,
Абадий ўчмасин туркийнинг қўри.
Аҳли Туркистоним аҳли Туроним,
Аридек тўзишиб яримта ноним,
Сомондек серобу сифатсиз соним,
Айрилсанг айиғу, бўлинсанг бўри,
Абадий ўчмасин туркийнинг қўри.
Аҳли Туркистоним аҳли Туроним,
Жонинга фидодур жону жаҳоним,
Йўлдошга айлансин зафарли оним,
Айрилсанг айиғу, бўлинсанг бўри,
Абадий ўчмасин туркийнинг қўри.
Руҳиддин КОМИЛОВ