Биз, “Бирдамлик” Халқ демократик ҳаракати Қашқадарё бўлими фаоллари, хусусан, Ҳаракатнинг “Ёшлар қаноти” бўлими аъзолари ҳам 12 июнь куни Қирғизистон элчихонаси олдида ўтказилиши режалаштирилган норозилик пикетига қизғин ҳозирлик кўриб қўйган эдик.
Биз бир нарсани, Тошкент сафари чоғида “замонавий қароқчи”лар қўлига тушиб қолиш хавфи устунлигини билардик. Шу сабаб ҳам, эҳтиёт шарт, йўлга бир кун олдин отланишга қарор қилдик.
11 июнь куни соат 16.00 ларда биринчи бўлиб Турғун ака шериги билан йўлга чиқдилар. Биз уларнинг кўнғироғини кутишимиз керак эди. Таажжубки, Турғун ака, келишилганидек, бизга йўлнинг “бехатар” эканлиги ҳақида негадир “сигнал” беришга шошилмади. Мобиль телефони ҳам бир техника-да, эҳтимол, узоқ йўлда қуввати тугаб қолгандир, деган хаёл билан мен ҳам 7 нафар шеригим билан иккита “такси”ни ёллаб, “Қайдасан, Тошкент?!” дея йўлга чиқдик. Бироқ, ҳеч қанча йўл босиб улгурмасимиздан, “ГАИ” постларининг бирида биз ўтирган киракашларнинг “тулпор”лари кутилмаганда тўхтатилди. Э йўқ, бе йўқ, биз ўтирган икки машина Ички ишлар ходимларининг махсус автоулови кузатувида ўз “ракурси”ни – манзилини ўзгартирди. Кўп ўтмай, бизни Китоб туман Ички ишлар бўлимига олиб келишди. Ана шундагина биз ҳукуматнинг “замонавий қароқчилари” қўлига тушиб қолганимизни англаб етдик. Ҳаммасидан ҳам киракашнинг хиралиги ошиб тушди. Бизни манзилимизга етказмасдан туриб “договордаги соққани тўлаб қўйларинг. Кетларинг шилта бўлса, менда нима айб? Мен санларни деб йўлдан, ишдан қолдим!” дея оёқ тираб туриб олди. У- буни қўйинг, бир эмас, иккита некcиянинг вазифасини адо этмаган ҳайдовчиларининг қистови билан 320 000 сўмга тушдик! Бунисиям майли-я, камига бизни қош қорайгунга қадар Китоб туман ИИБсида гап йўқ, сўз йўқ, олиб ўтиришди. Ва яна “Уч кун давомида Қашқадарё вилояти ҳудудидан ташқарига чиқмаймиз” деган мазмунда барчамиздан “Тилхат” ёздириб олишди. Ва яна “ИИБдан чақирув қоғози келиши билан, бир зумда етиб келамиз” деган мазмунда ҳам “Тилхат” беришимизга тўғри келди. Ана шундан кейингина, қачонки тонг отгачгина, 12 июнь куни саҳар чоғида бизни тутқинликдан “озод” этишди. ИИБ дарвозасидан чиқиб қарасак, Турғун ака ҳам шериги билан шу ерда “меҳмон” бўлган эканлар. “Йўлбарс изидан, йигит сўзидан қайтмас” деганларидек, уйга бориш қаерда, яна Тошкент “стоянка”сига бордик. Бу сафар такси ҳайдовчилари билан жиддийроқ гаплашишга тўғри келди. “Бизни ГАИ постлари учрамайдиган йўллар орқали Тошкентга олиб бориб қўйишларингиз керак. Бу иш кимнинг қўлидан келади?” дегандик, ҳартугул, ҳайдовчиларнинг “ШЕРИ” чиқиб қолди. “Пулидан қочмасанглар, ГАИ постларидан керак бўлса, учиб олиб ўтаман!” деди керилиб. Биз келишдик. Йўқ, ҳарқалай, шоферларнинг “арслон”и сўзининг устидан чиқадиганлар хилидан экан. Қашқадарёнинг айланма, уйдум-чуқур йўллари орқали ўз манзилимизга – то Тошкентга қадар бехатар етказишга муваффақ бўлди.
Яратган насиб этиб, 12 июнь куни Ирригация институтининг қаршисига етиб келганимизда, соат миллари 12.00 ни кўрсатарди…. Келсак, ҳеч ким йўқ. “Боғдодда тинчлик”, атрофда скунат. Кейин элчихона билан институт орқалиғида “савдосси” авжига чиқиб, қўли-қўлига тегмаётган пистафуруш холани гапга солдик:
– Хола, шу ерда бизнинг шерикларимиз кутиши керак эди?, – дейишимиз биланоқ:
– Ҳа, ана у плокат кўтарганларми? Уларни аллақачонлар уриб-суриб, машинага тиқиб опкетишди. Худога атаганларинг бор экан, яхшиям кеч қолибсанлар. Акс ҳолда милисахонада ўтирардинглар синган тишларингни санаб, – дея жавоб қилди писта фуруш…
Бир сўз билан айтганда, ҳукуматимизнинг беминнат “қароқчилари” касрига, ҳам вақтимиз, ҳам нақдимиз кетди-ю, аммо келишилган вақтда белгиланган жойга етиб кела олмай, армонда қолдик… . Афсус….
Аммо шуни билингки, Ҳукумат томонидан “ёлланган йўлтўсар”ларга мубтало бўлиб, ҳуқуқи паймол бўлган биргина биз эмас, Ўзбекистонда ҳар куни, ҳар сонияда юзлаб фуқароларнинг ҳақ-ҳуқуқлари ҳадсиз топталади, оёқ ости қилинади. Бу – табиий ҳол саналади биз томонларда….
Фазлиддин РАҲМОНОВ
“Бирдамлик” Халқ демократик ҳаракати Қашқадарё вилояти, “Ёшлар қаноти” бўлими етакчиси