Хоразм воҳасининг деярли барча қишлоқларида молхона, ҳовли деворлари ва ҳатто тураржой бинолари деворларига таппи ёпиштириб ташланганининг гувоҳи бўлишингиз мумкин. Бу ишни асосан аёллар қилишади. Баъзан уларга эркаклар ҳам ёрдамлашишади.
Сергап қўшним ўзининг таппи тайёрлаш техналогияси ҳақида сўзлаб берди. У каттагина лойқоргичга қорамол теззаги, майда хашак ва кўмир кукуни солиб,устидан озроқ сув қуйиб аралаштираркан-да, ҳосил бўлган ўзига хос қуюқ бўтқани думалоқлаб, деворларга ёпиштириб чиқаркан. Ўтган йилги кўмирдан қолган кукунни ёқиб бўлмайди, лекин у таппи учун яхшигина хом-ашё бўларкан. Қоришмага қўшиладиган хашак ўрнида мол емайдиган, чиқитга чиққан майда сомонни ишлатиш мумкин. Хуллас калом, сув текин ёқилғи тайёр.
“Бир вақтлар қишлоқларни газлаштириш сиёсати юргизилиб, бизнинг қишлоққа ҳам табиий газ етиб келганди. Натижада ота-боболаримиз минг йиллардан бери таппи тайёрлаб, ёқиб келганини унутаёздик. Мана бугун ўзлигимизга кайтдик”, – деди қўшним кулиб.
Дилроз ҚУЛМУҲАММАД.