Қирғизистон фожиасига ҳам икки йил тўлибди. Бироқ қўшни мамлактада ҳамон ўзбек миллатига нисбатан таҳқиру ҳақаротлар, камситишу босимлар давом этиётганлиги барчага аён. Аслида, тарих саҳифаларини ҳафсала билан титкилаган киши ўзбек билан қирғизнинг илдизи битта эканлигига гувоҳ бўлади. Шу маънода, баралла айтишимиз мумкинки, Қирғизистондаги ўзбек миллатдошларимиз ўз ерларида умргузорлик қилишмоқда. Шундай экан, ўзбекларни “келгинди” санаб, таҳқирлаш, бу энди – ўта кетган ноҳақликдан бошқа нарса эмас.
Қўшни мамлакатда ҳуқуқлари оёқ ости бўлаётган миллатдошларимизнинг тақдири биз Ўзбекистонликларни ташвишга солмасдан қўймайди, албатта. Эзгу мақсадимиз битта – у ҳам бўса, ўзбек ва қирғиз миллатининг қардош эканлигини яна бир бор таъкидлаш, ёдидан кўтарилган кишиларга эслатиб қўйиш орқали икки миллат вакилларини аҳиллиги, тинч, осуда ҳаёти учун ўз ҳиссамизни қўшиш.
Хабарингиз бор, ана шундай эзгу мақсадда “Бирдамлик” Халқ демократик ҳаракати Ўзбекистон бўлими фаоллари Ўзбекиcтондаги Қирғизистон элчихонаси олдида қирғизистонлик ўзбекларга нисбатан бўлаётган ноҳақликларга қарши ўз норозиликларини пикет орқали намоён этишликни лозим топишганди.
Шу кеча кундузда норозилик пикетига тайёргарлик ишлари қизғин. Айни дамда, Ҳаракатнинг Фарғона водийси координатори Носир Зокирга кўра, Хукуматнинг ҳам норозилик пикетини тўхтатиш борасидаги ҳаракатлари “авжида” эканлиги очиқланди.
– Бугун, 10 июнь куни кечга яқин уйимга фуқаро формасидаги икки шахс кириб келди, – дейди Носир Зокир телефон орқали бўлган суҳбатда, – Меҳмонлардан бири ўзини Наманган шаҳар ИИБ майори Икромжон Муҳаммедов, иккинчиси эса милиция подполковниги Аббосхон Қосимов деб таништирди. Тажрибадан маълумки, аксарият ҳолларда фуқаро кийимидаги “элчилар” исм-шарифларини ҳеч қачон очиқ ойдин айтишмас, сир сақлашарди. Бу гал қандай сабаб билан ошкор этишганларига, очиғи ўзим ҳам ҳайронман.
Хуллас, ҳукумат “хабарчилари”дан бири подполковник Аббосхон Қосимов мақсадга кўчди: “Носир ака, сизнинг қатор йиллардан буён амалга ошириб келаётган антиконституцион ҳаракталарингизджан хабаримиз бор. Ҳатто бундан йигирма йиллар олдин очлик эълон қилганларингизни ҳам биламиз”, деди сўзларини чертиб-чертиб. Унинг сўзларидан қон босимим кўтарилиб кетди. “ Кўп йиллик фаолиятим давомида антиконституцион иш қилган эмасман, аксинча, ҳукуматни ҳам, халқни ҳам конститутция доирасида ишлашга чақирдим. Барчани конституция талабларига буйсунишга чақириб келдим. Бундай ҳаракат сизларда антиконституцион фаолият деб аталадими? Бундан анча йиллар олдин очлик эълон қилган бўлсам, бу очликнинг конституцияга даҳли йўқ эди. Ўша пайтларда Совет Армияси сафида хизмат қилаётган Наманганлик 35 нафар йигитнинг жасади келган. Ана шу бедодликка қарши очлик қилганман, холос” дедим суҳбатдошимнинг сўзларидан ранжиб. “Носир ака, норозилик пикети ўтказаман деб Тошкентга боришингиз шартми, ака” дейди Аббосхон Қосимов. Унинг сўзларидан сездимки, аслида, улар қай мақсадда норозилик пикети ўтказишимиздан ҳам бехабар, хатто. Фақат уларга “Носир Зокирни бироз чўчитиб, талвасага солиб қўйиш керак” деб тепадан буйруқ бўлган холос. Шу сабаб, билдимки, “меҳмонжонларим” мени Тошкент сафаридан қайтирш борасида “сулҳ” тузишга келишган. “Қирғизистондаги воқеалардан, ҳозирги ҳолатдан, миллатдошларимизнинг тақдиридан хабардорсиз. Биз қўшни мамлакатда яшаётган ўзбекларнинг тақдиридан қайғудамиз. Ана шу мақсадда норозилик пикети ўтказиш ниятидамиз. Бунинг нимаси номаъқул?” дедим энсам қотиб. Ҳар қандай ҳолатда ҳам миллатдошларимизнинг ҳимояси учун пикетга етиб бориш ҳаракатидамиз, – дея сўзига якун ясади Носир ака.
“Бирдамлик” халқ ҳаракатининг тажрибали фаоли сўзларидан кўриниб турибдики, “кимлардир” норозилик пикетининг ўтказилишига тиш-тирноғи билан қарши. Аммо нега? Бу саволга ўзлари ҳам асосли жавоб бера олмайдилар, қаршиликларининг боисини шарҳлашга қийналиб қоладилар, деган фикрдаман. Бироқ, шу нарса аниқки, улар бу йўлда қўлларидан келган ҳар қандай уринишлардан тап ҳам тортмайдилар.
Аммо, умид қиламанки, бу каби уринишлар миллатдошлари тақдиридан ташвишга тушаётган, ўзбек миллатининг ҳурлиги, озодлиги, эрки йўлида тиним билмаётган “Бирдамлик” фаолларининг руҳини синдиролмайди, танлаган йўлларидан қайтара олмайди.!
Қирғизистонлик миллатдошларимизнинг ҳаёти ҳақида қайғуриш ҳар бир ватандошимизнинг, барча ўзбекнинг бурчи. Шундай экан, азиз юртдошлар, 12 июнь куни соат 11.00 да Қирғизистон элчихонаси олдида барчангизнинг йўлингизга кўз тикиб қоламиз. Келинг, норозилигингизни намойиш этинг, лоқайдлик кишанларидан қутилинг, биз билан бирга бўлинг!
Малоҳат ЭШОНҚУЛОВА
“Бирдамлик” халқ демократик ҳаракати Ўзбекистон бўлими етакчиси