22.05.12 18:18
Расмий Тошкентнинг Чикагода бошланган НАТО саммитида иштирок қилиш учун келган делегацияси «Бирдамлик»нинг «Қуллар мамлакати» ҳақидаги театрлаштирилган томошаси билан қарши олинди.
21 май куни Ташқи ишлар вазири Абдулазиз Комилов ва Мудофаа вазири Қобил Бердиевлар раҳбарлигидаги Ўзбекистон делегацияси НАТОнинг Афғонистон бўйича махсус сессиясида иштирок этиш учун Чикагога келди.
Президент Ислом Каримов, расмий таклифномага қарамай, шамоллар шаҳри бўлган Чикагога сафарини рад этди. Бир версияга кўра, АҚШ президентининг яккама якка учрашиш истагида эмаслиги уни бунга ундаган.
Каримовнинг Чикагода кутилиши «Бирдамлик» Ўзбекистон Халқ ҳаракатини НАТО саммитининг 20 майда очилиши олдидан «Қуллар мамлакати ҳақида»ги театрлаштирилган томошани уюштиришга илҳомлантирди.
АҚШда яшаётган «Бирдамлик» лидери Баҳодир Чориев, митинг арафасида Uznews.netга, ушбу акция АҚШнинг Афғонистондаги уруши чоғида унинг дунёдаги энг репрессив режимлардан бири билан ҳамкорлик қилаётганини ёритишини билдирди.
“Каримовнинг келмаслиги бизни тўхтатгани йўқ, – деди Чориев ўз интервьюсида, – биз барибир митингни ўтказдик, шаҳар фуқаролари ва меҳмонлари эътиборини Ўзбекистонга, мамлакатда содир бўлаётган воқеаларга қаратдик”.
“Бирдамлик” аъзолари ва уларни қўллаб-қувватловчи фаоллар ва шунчаки Ўзбекистон фуқаролари биргаликда жами 40 нафарни ташкил этди, улар Чикагонинг гавжум кўчаларидан бирига саҳна ўрнатишди, у ердан туриб йўловчиларга Ислом Каримов Ўзбекистони ҳақида ҳикоя қилишди.
Иштирокчиларнинг чиқишларини ўтказиб юборганлар эса шиорларга ёзилган матнлар орқали персонажларнинг нима ҳақида гапираётганини билиб олишлари мумкин.
Улар орасида – президент Ислом Каримов, Бош вазир Шавкат Мирзиëев, кучишлатар тизим вакиллари, мактаб, тиббиёт муассасалари хизматчилари, пенсионерлар, талабалар ва мактаб ўқувчилари бор.
Акция иштирокчилари шунингдек қўлларида Ўзбекистон сиёсий маҳкумлари – журналист Дилмурод Саййид, Солижон Абдураҳмонов, Муҳаммад Бекжон, ёзувчи Мамадали Маҳмудов, ҳуқуқ ҳимоячиси Аъзам Турғуновларнинг суратларини кўтариб, уларнинг озод этилишини талаб қилишди.
“Биз Каримов жаҳон ҳамжамияти томонидан яккалаб қўйилиши лозим дея ҳисоблаймиз, – дейди Чориев. – Демократик мамлакатлар, уларнинг диктаторлар билан ҳамкорлиги уни кучга миндириши, ўзбек халқини эса янада бахтиқаро қилишини билишлари лозим”.
Ўзбек делегациясидан кимдир бу акцияда иштирок этган этмаганини Чориев билмайди, бироқ унинг ишончи комилки, улар Чикаго кўчасида нима содир бўлганидан хабардор.
“Бизнинг мақсадимиз, америкаликлар ва бошқа одамларга, НАТО ҳамкори Ислом Каримов ва унинг режими нима эканлигини кўрсатиш эди”, – дейди Чориев.
Ўзбекистон вазирлари Комилов ва Бердиевлар, НАТО матуот хизматига кўра, Афғонистон
ва НАТОнинг афғон кампаниясида иштирок этаётган мамлакатлар раҳбарлари ўртасида қўшма декларацияни имзолашган.
Унда қўшинларнинг Афғонистондан чиқарилиш санаси тағин тасдиқланган – бу 2014 йилнинг охиридир. Бироқ, Афғонистон хавфсизлигини таъминлашда (ISAF) иштирок этаётган давлатлар, Қобулни уни ёлғиз ташлаб қўймасликка ишонтиришди.
«Биз таъкидлаймизки, бизнинг ҳамкорлигимиз ўтиш давридан кейин ҳам давом этади”, – дейилади декларацияда.
Мамлакатда хавфсизликни сақлаш масъулиятини афғон ҳукуматига топшириш 2011 йилнинг июлида, Лиссабонда 2010 йили имзоланган келишувга кўра бошланган.
13 майда Афғонистон президенти Карзай ўтиш даврининг учинчи босқичи бошлангани эълон қилди, бунда афғон миллий хавфсизлик кучлари ҳимояси остида 75 фоизга етишини айтди.
2013 йил ўрталарига бориб, Чикаго декларациясида айтилишича, Афғонистоннинг бутун ҳудуди маҳаллий кучлар назорати остига олиниши керак.
“ISAF шунга мувофиқ ўз қўшинлари сонини камайтиради, бу миссия 2014 йилнинг 31 декабрига бориб тўлиқ якунланади”, – дейилади Чикаго декларациясида.
Uznews.net