Кейинги вақтда Хоразм воҳасида фуқароларнинг ўз жонига қасд қилиш ҳолатлари кўп кузатилмоқда. Биз томонимиздан ўтказилган мониторинг натижаларига кўра, ўз жонига қасд қилувчиларнинг кўпчилиги осилиб ўлишни “маъқул” кўрмоқда. Айниқса, Боғот туманида суициднинг шу тури кенг тарқалган.
Кўрганимиз, билганимиз, одамлардан эшитганимизни бир жойга жамлайдиган бўлсак, Боғот туманидаги битта қишлоқнинг ўзида охирги 1-2 йил ичида 8 нафар фуқаро ўзини осган. Уларнинг кўпчилиги 16-22 ёш орасидаги ўсмирлар ва ёшлардир. Туманда ўндан ошиқ шундай қишлоқ, вилоятда ўнта туман борлигини ҳисобга оладиган бўлсак, ўз жонига қасд қилаётганларнинг сони қанчалигини тасаввур қилиш қийин эмас.
Тиббиёт ходимларининг таъкидлашича, руҳий касалликни бошидан кечирганларнинг авлодларида ўз жонига қасд қилишга мойиллик бўлади. Бундан ташқари, ўз ихтиёри билан жонидан воз кечадиганларнинг кўпчилигини 16-22 ёш оралиғидаги фуқаролар ташкил қилишини ҳисобга олсак, ўсмирларнинг ўтиш даври муаммоларини, уларнинг атрофдагилар билан келишолмай қолишларини, катталарни улар ва уларни катталар тушунмаслигини сабаб қилиб кўрсатиш мумкин. Бугунги кунда рўғор тебратиш оғирлиги, иқтисодий қийинчиликлар руҳий тушкунлик ва аламзадаликни келтириб чиқараётгани ҳам асосий сабаблардан биридир.
Масалан, Боғот туманидаги «Бешариқ» маҳалласида яшаган 9-синф ўқувчиси, ўсмир ёшидаги Ойсанам Жумамуродова (айрим сабабларга кўра, исми-шарифи ўзгартирилган) дугоналари билан ўқишга бормоқчи бўлган. Ота-онаси бунга қаршилик кўрсатган. Натижада, ўз жонига қасд қилган. Шу йил апрель ойида «Юмолоқтўқай» маҳалласида истиқомат қилган Юсуфбой Нурметов ўзини осган. У фермер хўжалиги раиси бўлган. Нима учун бу ишга қўл урганлигини аниқлаштириб бўлмади.
Дилроз ҚУЛМУҲАММАД