Қашқадарё вилоятининг Қамаши туманида Лўлигўзар маҳалласи бор. Дарё қирғоғида қўним топган бу масканда узоқ йиллардан буён лўли миллатига мансуб аҳоли истиқомат қилиб келади.
“Камбағални отнинг устида ҳам ит қопади” деганлари рост чиқди. Буни қарангки, куни кеча табиатнинг қахри каби қаттиқ ёққан сел лўлиларнинг ўтовларини оқизиб кетиш билан қаноат қилмади. Кучли ёққан жала икки нафар лўли боланинг ҳам жонига жабр қилди. Сел оқибатида тўлиб-тошиб оқаётган сув болаларни ҳам ўзи билан олиб кетди. Мана, икки кундирки, икки нафар гўдакнинг на ўлигидан, на тиригидан дарак бор. Лўлигўзар аҳолиси болаларни қидирмаган жойи қолмади. Натижа йўқ. Маҳаллий ҳукуматнинг эса кўзи кўр, қулоғи кар, тили сақов. Гунг каби скут сақламоқда. Кўмак қўлини чўзай, одамларнинг ярасига малҳам бўлай демайди.
Ҳукуматнинг муздек совуққонлиги лўлигузар аҳлининг жон-жонидан ўтиб кетди. Ниҳоят фарзанд доғида қалби доғ бўлаётган аҳоли ҳукуматнинг лоқайд ҳоқонларига қарши исён кўтарди.
Айни дамда Қамаши туманини кесиб ўтувчи поеъзд йўли ва автомабиль йўллари лўлигузарлик фуқаролар томонидан тўсиб қўйилган. Ҳукуматни инсофга чақириш, дом-дараксиз кетган икки нафар лўли боланинг тақдирига қайғуриш, уларни излаб топиш талаби билан бош кўтарган лўлилар поеъзд йўлига ва автомобиль йўлларига узала тушиб ётиб олишган. Шу муносабат билан йўлларнинг мазкур қисмида ҳаракат мажбурий равишда тўхтатилган.
Лўлигузар аҳолиси амалдорларини адолатга ундамоқда, Ҳукуматни инсон ҳаётига бефарқ бўлмасликга чақирмоқда.
Ҳукумат томонидан йўл қўйилаётган ноҳақлик ва бефарқликга қарши қаратилган лўлиларнинг ушбу “исён”и Андижон воқеалари каби ўқ отар қуроллар билан бартараф этилармики, ёхуд Ҳукумат зарурий чораларни қўллармикин? Буни энди вақт кўрсатади.
“Бирдамлик” Халқ Демократик ҳаракати Қашқадарё бўлими матбуот Маркази