Жиззах вилоятининг Пахтакор туман ҳокимлиги биноси ёнидан катта канал оқиб ўтади. Канал билан ҳокимиятнинг оралиғи тахминан 30 – 35 метр чиқади. Шу канал қирғоғида ёш болалар эрталабдан автомашина ювишади. Машина ювган сув кир ювиш парашоги, чанг, мой аралаш яна қайтиб каналга оқиб тушади. Бундан сал пастроқда эса ёш болалар, ўспиринлар, йигитлар чўмилишади, одамлар сув олишади, Пахтакор туманида тоза ичимлик суви танқислиги мавжудлиги сабаб, баъзан қайнатиб ичишади ҳам.
Туманнинг барча раҳбарлари, шу жумладан, ҳоким ҳам бу ҳолни кўради. Ҳокимият биносига кираётган киши ҳам, чиқаётган киши ҳам бу ҳолга кўзи тушмаслиги мумкин эмас. Чунки бу “автомойка” Пахтакор туман хокимлиги биносининг шундоққина тумшуғ тагида жойлашган.
Бу ерда кунда тахминан 50 дан ортиқ автомашина ювилади. 50 та машинани ювиш учун қанча сув сарфланса, демак, ана шунча ифлосланган сув қайтиб каналга оқади. 10 кунда, бир ойда, бир йилдачи? Қанча сув ифлосланади? Бу “автомойка” эса бир йил эмас, икки йил эмас 12 йилдан буён шу таризда фаолият юритади. Бироқ бу ҳол на ҳокимни ва на бошка раҳбарни ташвишга солмайди. Канал қанча жойлардан, қанчадан-қанча қишлоқлардан оқиб ўтади. Ахир, бу сувни қайнатмасдан истеъмл қилаётган одамлар ҳам йўқ эмас деб ҳеч ким кафолат бераолмайди-ку?
Саида ҚУРБОНОВА
“Бирдамлик” Халқ демократик ҳаракати Жиззах вилоят бўлими раҳбари