АҚШ Президенти – Жаноб Барак Обамага
Буюк Британия Бош вазири – Жаноб Дэвид Кэмеронга
Германия Федерал Канцлери – Хоним Ангела Меркелга
Франция Президенти – Жаноб Франсуа Олландга
ТАНИҚЛИ ФУҚАРОЛИК ФАОЛЛАРИНИНГ ҲАЁТИ ХАВФ ОСТИДА!
МУҲТАРАМ ЛИДЕРЛАР!
Биз сизларнинг ўта банд эканликларингизни тушунамиз. Бироқ , Ўзбекистоннинг таниқли фуқаролик фаоллари ҳаётига реал хавф туғилганлиги бизни Сиз демократик дунёнинг лидерларига мурожаат этишга мажбур қилмоқда.
Ўзбекистон пойтахти Тошкентда журналист ва мухолифатдаги “Бирдамлик” ҳаракатининг республика бўлимининг етакчиси Малоҳат Эшонқулова икки ҳафтадирки, оғир бетоб бўлиб ётибди. У ўз танасида кечаётган жараёнларни текширтирганидан сўнг, кейинги вақтда шундай хулосага келганки, яъни унинг сиёсий фуқаролик фаоллигига нуқта қўйиш учун уни заҳарлашган.
2014 йил 15 март куни у ва унинг 20 ёшли қизи Зарнигор билан кечган воқеалар ривожи буни яққол тасдиқлайди. Ўша куни улар Зарнигор билан иккаласи “Бирдамлик” офисига келишиб ширин чой ичишган. Шундан сўнг иккаласи ҳам хасталаниб қолишган.
2014 йилнинг 21 февраль куни таниқли инсон ҳуқуқлари ҳимоячиси Елена Урлаеванинг яна бир маротаба Тошкент шаҳар руҳий касалликлар шифохонасига олиб кетилганлиги ҳақидаги нохуш хабар тарқалди. Қариндошлари икки йил один ҳам уни худди ўша жойга олиб боришиб ҳар-хил нарсаларни ичишга мажбур қилишганидан хавотирда. Демократик мухолифат вакиллари ва мустақил кузатувчилар кўп йиллардан буён Елена Урлаевага нисбатан инсон асаб тизими ва руҳиятига салбий таъсир кўрсатадиган махсус воситалар қўлланилган. Бунинг сабаби Тошкент ҳукуматининг унинг ҳуқуқ ҳимоячиси сифатидаги фаолиятига чек қўйиш истаги билан боғлиқ.
Махсус препаратларни қўллаш орқали “Бирдамлик” аъзаолари, фуқаролик фаолларининг йўқ қилинишига оид айрим фактлар ҳақида эслатиб ўтишни ўзимизнинг бурчимиз деб биламиз:
2009 йил сентябрь ойида бу ҳақда билган ва ўз исмининг сир тутилишини сўраган тиббиёт ходимларининг берган маълумотларига кўра, парламентнинг собиқ депутати , сиёсий маҳбус ва ҳаракатимизнинг матбуот котиби, ҳар жиҳатдан соғлом бўлган Иномжон Турсунов заҳарланишдан “сирли” равишда вафот этган.
2013 йил 10 ноябрда “Бирдамлик”нинг Хоразм вилояти бўлими раҳбари Валерий Назаров ҳуқуматнинг мажбурий “даволанттириши”дан сўнг дастлаб овози йўқолган ва фикрлашдан тўхтаган. Бироздан сўнг эса ҳаёт билан видолашган.
2014 йил 14 март куни “Бирдамлик”нинг Қашқадарё вилояти раҳбари, ўз отам Ҳасан Чориев оламдан ўтди. Ҳукумат томонидан унга нисбатан мутлақо мавҳум ва ҳеч қандай асосга эга бўлмаган айб қўйилиб қўлга олинди ва судланди. Бу каби қамоққа тиқиш билан Тошкент ҳукумати мени “Бирдамлик” ҳаракатидаги раҳбарлигимни тўхатмоқчи ва қўрқитмоқчи бўлди.
Олти ой мобайнида тўлиқ ташқи дунёдан узилганлик, руҳий, маънавий ва жисмоний таҳқирланиш, қийноқлардан сўнг унинг соғлигига жиддий тарзда путур етди. Унинг соғлигини тиклаш борасидаги катта эътибор ва жиддий муолажага қарамасдан қамоқдан озод этилганидан сўнг икки ойдан кейин вафот этди. Қамоқдан озод этилганидан кейин уни кўрганлар у ўзига ўхшамай қолганлигига гувоҳ бўлишган, бундан кўринадики, унинг ҳам махсус препаратлар билан “сийланган”лиги эҳтимоли жуда юқори эканлигидан далолат беради.
Иномжон Турсунов, Валерий Назаров ва Ҳасан Чориевларнинг адолат йўлидаги мустақил ҳаракати ва жасорати, фуқаролик фаоллиги учун Тошкент ҳукумати улардан қасос олди.
Ислом Каримов ва унинг режими шундоқ ҳам бугун етарли даражада бутун дунё олдида шармисор бўлди. Президентнинг тўнғич қизи Гулнора Каримова Швейцарияда йирик миқдордаги маблағни ўзлаштирганлик ва коррупцияда гумонланиб Тошкентда уй қамоғида ўтирибди. Худди шундай жиноят ва порахўрлик билан у Швецияда ҳам гумонланмоқда.
Муҳтарам Лидерлар!
Демократик дунёнинг Лидерлари сифатида фақат Сизларнинггина қатъий қораловларингиз билан Каримов режимининг ноҳақиқий ва ноқонунийлигига чек қўйиб, уни жойидан қўзғатиш мумкин.
Юқорида келтирилганларни ҳисобга олиб, Сизлардан амалий ёрдам беришларингизни ва талабларимизни қўллаб-қувватлашларингизни сўраймиз.
- Биз Ўзбекистон ҳукуматидан Малоҳат Эшонқулова ва унинг қизи Зарнигор ҳамда Елена Урлаеваларнинг соғлиғини мустақил текширувдан ўтказадиган тиббий комиссиянинг ташкил этишини талаб этамиз.
- Ушбу комиссия таркибига Америка Қўшма Штатлари, Буюк Британия, Германия ва Франция элчихоналаридан кузатувчилар жалб қилинишини талаб этамиз.
- Ўзбекистон ҳукумати томонидан бирор бир амалиётга қўл урилмаган, бизнинг талабларимиз бажарилмаган тақдирда “Бирдамлик” Ўзбекистоннинг АҚШ пойтахти Вашингтондаги элчихонаси ва президентнинг кенжа қизи Лола Каримова-Тиллаеванинг АҚШнинг Калифорния штати Беверли-Хиллсдаги La Palais қасри олдида муддатсиз пикетлар ва бошқа акцияларни бошлашини эълон қилади.
Биз ўзбек элчихонаси ва Лола Каримова –Тиллаева қасри олдида палаткалар қурамиз, токи ҳар куни бизни кўришсин ва Малоҳат Эшонқулова, қизи Зарнигор, Елена Урлаева ва режимнинг бошқа қурбонларини эслашсин.
Агар Каримов режими ўзининг барча жиноятлари қаторига Малоҳат Эшонқулова, унинг қизи Зарнигор, Елена Урлаеваларни жисман йўқ қилишни ҳам қўшар экан, унда улар орасида унинг вакилларидан бўлган ва зебу-зийнат, бойликлар уммонида сузаётган Лола Каримова-Тиллаеваларга ҳам цивилизациялашган мамлакатда ўрин йўқ деб ҳисоблаймиз.
Лола Каримова-Тиллаева ва бошқа ўзбек чиновникларининг болалари ҳам ўзлари бизнинг мамлакатимизни жаҳаннамга айлантирган -Ўзбекистонга кетсин.
Сизнинг қўллаб-қувватловингиз ва кўмагингизга катта умид билан.
Сизларга олдиндан ўз миннатдорчилигимни билдириб,
Сизларга чуқур эҳтиром билан,
Баҳодир Чориев – Ўзбекистон
“Бирдамлик” халқ демократик ҳаракати раиси