Сир эмаски, кейинги йилларда Ўзбекистоннинг барча вилоятларида, қишлоқ ва туманларда электр тармоқлари корхонаси аҳолини “Ильич чироқлари”дан мусавво қилиш борасида ким ўзарга пойга ўйнашмоқда. Ҳеч бир гапдан хабари йўқ шўринг қургур фуқаролар эса “Ислом ота, туман, вилоят ҳокимлари муттаҳам, бизга газ бермай, свет бермай азобга қўймоқда. Буни билмайсиз! Бизга ҳиммат қилинг, ҳокимларнинг танобини тортиб қўйинг!”, дея юрт отасига узиндан-узоқ арз-ҳол қилишгани-қилишган.
Бугунги кунга келиб эса, бундай кўргуликларнинг тепасида айнан юртбошининг шахсан ўзлари тургани маълум бўлди-қолди. Қандай қилиб дейсизми?
Гап шундаки, Самарқанд вилоятининг Оқдарё туман аҳолиси Нурали АБДУҒАНИЕВИЧ БЕРДИЁРОВ деган валломат ҳоким бўлгандан буён куну тун табиий газсиз танчага, электр чироғисиз ота-бобосидан қолган “мой лампа”га, ёхуд шамга сажда қилиб ўтиришарди. Эй-ййй, бу туман аҳолиси ҳокимнинг ҳақсизлигидан дод демаган, ТЕПАга арз қилмаган дейсизми? Хўп ёзган, борадиган жойига борган, томоқлари йиртилгудек фарёд қилган, аммо натижа йўқ: элнинг дардига даъво, кўнгил ярасига малҳам бўлмаган.
Дунёнинг ишларини қарангки, туман аҳолисини қон қақшатган Нурали Абдуғаниевич Бердиёров куни кеча фуқароларга зулм ўтказишда кўрсатган жонбозлиги, “жасорат”лари учун айнан Юрт отаси томонидан, Ҳукумат томонидан муносиб тақдирланди! Мукофотга – оқ тулпор – некция автоулови эмиш!
Нурали Абдуғаниевичнинг тақдирланиш тафсилотларига таяниб айтадиган бўлсак, Ўзбекистон Ҳукумати барча вилоят ва туман ҳокимлигига электр энергиясини тежаш борасида фатво берган. Аҳолига сув текинга – ўзбек сўмига берган қайда-ю, Тожикистону Афғонистон, Чин элинга электр улгурни Америқо сўмида сотган қайда?! Бўлсин, бўлсин, юрт отаси иқтисодчи бўлсин экан-да! Евро, доллур кўрсатса, электр у ёқда турсин, табиий газу ўзбек тиллосига хотину-ю, тирик бўлса, онасини ҳам қўшиб пулларкан! Қаранг!
Узр, яна “ўтлаб” кетдимми? Гап Оқдарё туман ҳокими Бердиёровга берилган ҳадя ҳақида эди-я?!… Нурали Абдуғаниевичнинг кўрсатган “каромат”и шундан иборатки, кейинги икки йил давомида электр токини нафақат туманда, Республика миқиёсида кўп ва хўп тежаб-тергаган. Ишончли манбаларнинг хабарига кўра, халққа электр токини бермай, оммани азоблаш бобида Нурали Бердиёров Республикада учинчи ўринни қўлга киритган. Ҳукумат эса электр токини тежаш орқали аҳолини “мой лампа” ёқишга мажбур қилгани, шаҳам савдосининг бозорини чаққон этгани учун 1-, 2-, 3- ўринга муносиб деб топилган туман ҳокимларига Ўзбекистоннинг “дулдули” – Некция автомашинасини тортиқ этган. Четга сотилаётган табиий газ ва электр токи эвазига ҳориждан келаётган доллур отлиғ сармоя олдида 3 дона некция нима бўпти?! Хайр-эҳсон ҳам қилиб туриш керак-да ахир! У-бу гапни қўйингу, қийнидан қийин яна оқдарёликларга қийин бўладиган бўлди. Чунки қўлга киритган тортиғидан талтайиб кетган Нурали Бердиёров енг шимариб электрни янада кўпроқ тежаш операциясига жон-жаҳди билан киришиб кетди. Оқибатда, икки йилдирки бир кеча-кундузда бор-йўғи икки-уч соат электр чироғидан баҳраманд бўлаётган аҳоли шундоқ “буюк бахт”дан ҳам мусавво бўлди. Икки соатлик мурувватини ҳам кўп кўрган ҳоким жаноблари аҳолига электр бериш маросимини яна қисқартирди. Айни кунларда оқдарёликлар бир суткада 2 дақиқагина электр токини кўришга мушарраф бўлмоқда.
Энг ёмони, “қовун-қовундан ранг олади” деганларидек, Нурали Абдуғаниевичнинг ютуғидан илҳом олган ўзга ҳокимлар “Бердиёров нексияли бўлганда, биз бўлмаймизми? Ундан қаеримиз кам?” дея тутоқиб қолишган. Бунинг натижасида, бугун Самарқанд вилоятининг қай бир туманига борманг, ҳукуматнинг “электрни тежаш” борасидаги махфий фармони ижросига гувоҳ бўласиз. Ҳокимман дегани борки, махфий буйруқни ҳаётга тадбиқ этиш билан овра. Муддао: биринчи бўлиш, эҳсон олиш, некцияни миниш!
Нурали Бердиёровнинг шарифига қараб, Ислом отанинг иниларидан бўлса керак, деган хаёлга борувчилар учун қисқа изоҳ: Самарқанд вилоятининг Қушработ туманида туғилиб ўсган Нуралининг Каримовга мутлақо алоқаси йўқ. Аммо оқдарёликларнинг орасида ўрмалаган гапларга кўра, Нурали Бердиёров мамлакат бош вазири Шавкат Миромоновичнинг ишонган одамларидан.
Орзигул ХУДОЁРОВА
“Бирдамлик” Халқ Демократик Ҳаракати Ўзбекистон бўлими фаоли