Ислом Абдуғаниевич, Американинг машҳур нашри “The Daily Beast” сиз салкам 23 йилдан бери олиб бораётган шаклан халқчил, мазмунан ўзбекистонликларни геноцид қилиш сиёсатингизни “юқори” баҳолаб Ўзбекистонни порахўрликка энг ботган, энг чириб кетган давлатлар рўйхатида биринчи ўринга қўйди. (http://www.thedailybeast.com/galleries/2012/02/08/the-20-most-corrupt-countries-from-cambodia-to-afghanistan.html) Албатта, бу нашр бундай хулосага ўз – ўзидан келмаган. У халқ қўзғолони гирдобида қолган Сурия қанчалик коррупция ботқоғига ботганлигини аниқлаш учун 20 та давлатдаги сиёсий ва фуқаровий эркинликлар, матубот эркинлиги ва жамоатчиликнинг коррупцияни қандай қабул қилишини ўрганиб чиқиб Ўзбекистон дунёдаги энг коррупциялашган давлат деган хулосага келган. Нафақат бу нашр, балки халқаро ташкилотлар тузган рейтингларда ҳам Ўзбекистон энг коррупциялашган давлатлардан бири сифатида кўрсатилган эди. Масалан, Transparency International ташкилоти 2011 йилда тузган рўйхатда Ўзбекистон энг коррупциялашган давлатларнинг биринчи бешлигига киритилган эди. Ўзбекистондан кейинги ўрин Африка қитъасида жойлашган Эритреяга , ундан кейинги ўринларни эса Лаос, Афғонистон, Эквотериал Гвинея, Беларусь, Конго Демократик Республикаси, Свазиленд, Эрон, Эфиопия, Чад, Сурия, Кот-д – Ивуар, Венесуэлла, Ироқ, Яман, Бурунди, Ангола, Камбоджа, Гаити эгаллаган. Эътибор беринг, Ислом Абдуғаниевич, Африкада жойлашган, фуқаролик уруши гирдобидан яқинда чиққан Конго Демократик Республикасида, қўшни давлатлар билан йиллаб урушган Ироқда, фуқаролик уруши гирдобида бўлган Сурияда ҳам аҳвол сиз бошқараётган давлатдагидан сал бўлсада яхшироқ. Бу сизни қанчалик “узоқни кўра оладиган” раҳбар эканлигингизни кўрсатади. Сиз ушбу нашрни судга бермаганлигингиз унда очиқланган маълумотлар рост эканлигидан, мамлакатни боши берк кўчага киргазиб қўйиб ҳам истеъфога чиқмаётганингиз ҳокимият сиз учун ҳамма нарсадан, ҳатто халқнинг манфаатидан ҳам устун эканлигидан, ҳокимиятни ўз қўлингизда сақлаб қолиш учун ҳар нарсага тайёр сиёсатчи эканлигингиздан дарак беради. Ўзбекистонда кенг урчиб кетган порахўрликка асосий жавобгар сиздир. Сизнинг туҳматингиз туфайли қамалиб чиққан Юсуф Жума бекорга:
Подшомиз порани яхши кўради,
Эл ризқин чўнтакка уриб юради.
Кўзи оч, ҳаттоки сўрғич кўрсатсанг
Сўрдир деб оғзини очиб туради.
демаган. Энди Ўзбекистонни ишсизлик, адолатсизлик, сиёсий ва иқтисодий эркинликлар чекланганлиги, мажбурий аборт ва қамоқлардаги маҳкумлар сони бўйича дунёда биринчи ўринга олиб чиқсангиз Ўзбекистон тарихидаги энг ёмон ҳукмдор номига тўлиқ муносиб бўласиз.
Адхам Тангриев