Муқаддас Жиззах вилоятининг Пахтакор шаҳридан бизнинг “Чаманзор” номли қишлоғимизга яқингинада қанчадан-қанча беғубор орзулар, эзгу истаклар,тилаклар билан келин бўлиб тушганди.
– У жуда бахтли эди. Чунки келин бўлганидан кейин орадан кўп вақт ўтмасдан бўйида бўйида бўлди. Муқаддас ҳомиладорликнинг азоблари-ю қувончларини татиса-да, азобларидан қувончлари устунлик қилардим, оналик бахтидан сармаст эди, – дейди биз билан суҳбатда унинг яқинларидан бири, – У янги йилни катта қувонч ва бир олам орзулар билан кутиб олди. Кайнона ва қайнотасининг хизматини елиб-югуриб бажонидил бажарди. Гарчи оғироёқ бўлса-да, Муқаддас ўзини жуда енгил ҳис қиларди. Оёқ-қўли чаққонгина эди.
Суҳбатдошимизнинг айтишича, 2012 йилнинг 6 январ куни тунги соат 2.00-3.00 лар орасида Муқаддасни яқинлари қорнидаги кучли оғрик билан Пахтакор туман касалхонасига олиб боришган. Унинг ҳомиласи 7 ойлик бўлган. Тиббиёт ходимлари уни у бўлимдан бу бўлимга, яъни гоҳ гинекология бўлимига, гоҳ шошилинч тиббий ёрдам бўлимига, ундан кейин туғруқхонага, яна жарроҳлик бўлимига жўнатиб росса овора қилишган. Бу вақт ичида унинг яқинларига электр энергияси йўқлиги сабабли шам олиб келишларини айтишган. Улар ярим кечаси шам қидириб дўконма-дўкон юришган. Дўконнинг эгасини топиб, уйғотиб, шам олиб келгунларича орадан бир соатдан ортиқ вақт ўтиб кетган.
Хуллас, бундай сарсонгарчиликлар туфайли фурсат бой берилган. Эрталаб келган шифокор Муқаддасни текшириб кўриб: «Шошилинч операция қилиниши керак. Бола ичида аллақачон ўлиб қолган», дея “ташҳиз” қўйган. Буни эшитган Муқаддас врачга ялиниб: «Доктор боламни ўлган деманг. Илтимос, боламни вакуумга қўйиб бўлса-да, сақлаб қолинг» дея ялинган.
Уни шошилинч операция қилишганларида боланинг йўлдоши ёрилиб кетганлиги, ҳомиланинг нобуд бўлганлиги аниқланган. Муқаддаснинг ўзи ҳам операциядан кейин ҳушига келмай, оламдан ўтди. Яқингинада ҳам қишлоғимизда туғруқ пайтида она ва бола оламдан ўтган эди. Менинг фикримча, бу сафар ҳам Муқаддас ва ва унинг ҳомиласи тиббиёт ходимларининг ўта беғам ва бепарволиги, маъсулиятсизлиги, лаёқатсизлиги, қолаверса Гиппократ қасамига садоқатсизлиги оқибатида оламдан эрта кўз юмишди.
Саида Қурбон
“Бирдамлик” Халқ Ҳаракати Жиззах вилояти бўлими раҳбари