Ўзбекистонда кўз кўриб, қулоқ эшитмаган зап замон бўлди-да! Бундоқ дейишимизга саба, мамлакатда ажабтовур ҳангомалар, ғайритабиий воқеалар содир бўлмоқдаки, эшитиб, беихтиёр ҳайратдан ёқа тутасан киши. Ҳеч бир амонда бирор бир маконда ҳали “то-той”ламаган, тили чиқмаган, қўйингчи, икки ёшга тўлмаган гўдакларнинг “металлом” йиққанини, темир-терсак “плон”ини дўндирганини эшитганмисиз? Йўқ-а? Унда эшитинг: Ўзбекистон деб аталмиш “Келажаги буюк давлат”нинг мактаб ўқувчилари-ю, олий ўқув юртлари, коллеж, литций талабалари “оқ олтин” тергани сафарбар қилинса, ҳали тили чиқиб улгурмаган гўдаклари ҳам йўл қовуштириб, тек ўтиришмайди. Бул мамлакатнинг икки ёшгача бўлган норасидалари темир-терсак йиққани енг шимаради. Ишонаверинг!
Гап шундаки, кейинги йилларда ўз-ўзини бошқариш органи ҳисобланмиш қишлоқ ва маҳалла фуқаролар йиғини томонидан икки ёшгача бўлган болаларга “таъсис” этиладиган нафақа пулига ҳукумат томонидан ўлпон солинган. Гўдаклар пулига солинган бу солиқ “металлом плани”ни бут қилиш мақсадида жорий этилган. Айни дамда темир-терсак учун икки ёшгача бўлган болаларнинг нафақа пулидан олинадиган бож миқдори 3000 (уч минг) сўмни ташкил қилмоқда. Норасидалардан ўлпон йиғиш “маросим”и фақат бир ойгагина бўлса, кошки эди. Икки ёшгача бўлган болага ҳар ой бериладиган 120 000( бир юз йигирма минг) сўмнинг нари-бериси миқодридаги пулдан эринмасдан ҳар ойда “металлом”га деб нақд 3 000 ( уч минг) сўм “ушлаб” қолишади.
– Бунинг орқасидан маҳалла раислари бой бўлиб қолди. Айтишларича, бола пулидан ушлаб қолинган маблағлар тегишли жойга топширилгач, унинг ўрнига маълум миқдорда сирлик идишлар бериларкан. Қайси бир маҳалла фуқаролар йиғинининг раиси ё котибининг хонадонига борманг, сирлик идишлардан коллекция тўплаган дейсиз. Аслида, қай бир гўдакнинг нафақасидан темир-терсакка деб пул “ушлаб” қолинган бўлса, пақир, тоғара каби сирлик идишлар ўшаларга берилиши керак. Маҳаллакомлар эса, бериш қайда, ўзларининг уйига ташиб ётишибди, – дейди Самарқанд вилояти Пойариқ туманининг Эшимоқсоқ қишлоғида яшовчи оналардан бири нолиб.
Ўзбекистонимизда икки ёшгача бўлган озмунча гўдак борми? Йил ўн икки ой уларни ҳар бирининг нафақасидан металлом учун ўлпон олишади. Шундаям бу темир-терсак ўлгурнинг ҳеч “плани” тўлай демасмикин-а? Шунга лол қоласан киши….
Қай бир мамлакат болалари дунёга келибоқ, ҳали гўдаклигидаёқ мамлакат ривожига ҳисса қўшади? Бунақаси ҳеч бир ўлкада топилмас-ов. Аммо, билиб қўйинг, биргина бизда, Ўзбекитонда шундай. Ўзбек боласининг танглайи меҳнат билан кўтарилган. Тер тўкишга жисмоний қуввати етмаганлиги учун ҳам, нафақа пули ҳисобидан бўлса-да чақалоқларимиз Ўзбекистон иқтисодига, ривожига ҳисса қўшиш билан машғул… Аана шунақа гаплар…. Ўзбекистонда икки ёшгача бўлган болалар “металлом” йиғим-теримига шу тақлид сафарбар этилган. Гарчи оёғи, тили чиқмаган бўлса-да Ўзбекистоннинг “Келажаги буюк давлат” бўлишига ҳатто икки ёшга тўлмаган гўдаклар ҳам муносиб “ҳисса” қўшаётганига қойилмисиз? Шу боис ҳам “Бу муқаддас Ватанда азиздир инсон!”….
Дарвоқе, бул оммавий “тадбир”нинг қонунийлигига тўхталмоқчимисиз? Бекор қиласиз…. Ўзбекистонда тили-жағи, ҳатто қўлида юрист деган дипломи борлар, катталар топталган ҳақ-ҳуқуқларини тиклаш учун курашаолмайди-ю, гўдакларга йўл бўлсин? У шўрликлар Ҳукуматдан ҳақларини қандай ҳимоя қилсин?
Малоҳат Эшонқулова
“Бирдамлик” Халқ Ҳаракати Ўзбекистон бўлими раҳбари
Мазкур хабарда 3 минг сум урнига, нолллар сони биттага купайиб, 30 минг сум булиб, утиб кетган жиддий хатолик учун укувчилардан узр сурайман.
Муаллиф