Ислом Абдуғаниевич, ўтган йили сизнинг ташаббусингиз билан Ўзбекистон президентининг ваколати муддати 7 йилдан 5 йилга туширилди. Баъзи бир таҳлилчиларнинг фикрича, бу ўзгаришни сиз ўзингиздан кейин келадиган ворисингиз учун қилгансиз. Шу ўринда мен ҳам бир нарсани таклиф қилмоқчи эдим. Маълумки, бола ота- онасининг қилмиши учун жавоб бермайди деган тамойил бор, аммо халқимизда “Илоннинг боласи илон, чаённинг боласи чаён бўлади”, “Қарийсан қартасан, асли зотинга тортасан” деган мақоллар ҳам бор. Қолаверса, ҳозирги замон олимлари ҳам ота-онанинг генлари фарзанднинг феъл-атвори шаклланишида катта роль ўйнашини исботлаб беришган. Юқорида келтирилган халқ мақолларида ифодаланган доноликдан ва ҳозирги илм-фаннинг хулосаларидан келиб чиқиб, сиздан кейин президентликка даъво қиладиган шахснинг ота-онаси, бобо- бувиси ким бўлганини холис комиссия томонидан синчковлик билан текшириш, агар унинг аждодлари орасида нопок одамлар бўлган бўлса, уни президентлик мансабини эгаллашига йўл қўйилмаслиги тамойили қонунлаштирилиб, Конституцияга киритилишини таклиф қиламан, чунки аждоди нопок бўлган одам ҳам нопоклик йўлига кириб кетиши эҳтимоли жуда катта.
Бунга мисол қилиб ўзингизни келтириш мумкин. Маълумки, сизнинг отангиз ўтган асрнинг 30-йилларида қамалиб чиққан. Ўша даврларда, худди сиз раҳбарлик қилаётган ҳозирги Ўзбекистондаги каби, Совет Иттифоқида қамалганлар орасида ўзининг диний ёки сиёсий қарашлари, миллатпарварлиги, эркин фикрлагани учун қамалганлар кўп бўлган, аммо сизнинг отангиз беайб қамалмаган. У давлатнинг мулкига хиёнат қилгани, яъни давлат мулкини ўзлаштиргани учун 5 йилга қамалган. Сиз ҳам шу борада отангизга тортдингиз, яъни отангизга ўхшаб ўзингизга тегишли бўлмаган нарсани ўзлаштириш билан ном чиқардингиз. Ўзбекистон президенти мансабини ноқонуний равишда ўзлаштириб олиб, аллақачон президентлик муддатингиз тугаб кетган бўлса ҳам ҳокимиятни беришни истамай, турли найранглар уюштириб юрибсиз. Англиянинг Ўзбекистондаги собиқ элчиси Крейг Мюррей берган маълумотларга ишонсак, сиз халқ мулкини ўзлаштиришда, нопокликда отангиздан, қизларингиз эса сиздан ўтиб кетган. Буларнинг бари халқимизнинг “Илоннинг боласи илон, чаённинг боласи чаён бўлади” деган мақоли тўғри эканлигини кўрсатиб турибди. Шунинг учун юқоридаги таклифимни қабул қилишингиз шарт деб ўйлайман. Агар сиз қабул қилмасангиз сиз адолатсизлик ва порахўрлик пойдеворига қурган диктаторлик тузуми қулаганидан кейин ҳокимиятга келажак “Бирдамлик” Ҳаракати каби адолатли ва ватанпарвар кучлар бу таклифимни қабул қилажаги шубҳасиз.
Маматқулова Муборакхон