- Саида Қурбон
-Собиқ турмуш ўртоғим томонидан фарзандимга бериладиган алиментнинг Пахтакор туман почта алоқа тармоғига келиб тушганига бир ой бўлди. Икки йиллик алимент бор-йўғи 200.000 сўм бўлган экан. Шу маблағ жўнатилганди, – дея эзилиб ҳасрат қилиб қолди Нуринисо, – Бироқ шу икки юз минг сўмни ҳам почта ходимлари эртага келинг, индинга келинг деган гаплар билан овора қилиб, беришмаяпти. Боламнинг рисқини ололмаяпман. Эртага келинг деган гапларга ҳам бар ҳафтадан ошди. Гўдагим учун юборилган алимент пулининг барини почтага қатнаш учун йўлкирога сарфлайман чоғи. Почтадагиларнинг қуруқ ваъдаси билан қорнимиз тўйармиди? Қийналиб кетдик. Баъзан мактабга отланган фарзандимнинг қорнини тўйдириш, нонушта қилдириш учун нон тополмай қоладиган вақтларим ҳам бўлаяпти. Болам шўрлик очдан-оч. Йиғлаб, ўксиб мактабга кетмоқда. Дилбандимнинг ўксиганини кўриб, эзилиб кетаман. Маҳала раисига, туман хокимлигига ёрдам пули беришларини сўраб мурожаат қилдим. Хокимиятдагилар “Кам таъминлаган оилалар жуда кўп. Шунинг учун сизни навбатга қўямиз”, дейишганди. Навбат кута-кута, мана, уч йилни ҳам ўтказиб қўйибман.
Андуҳга ботган ёлғиз онанинг қайғули ҳикоясини эшитарканман, унга, у кабиларга ачиниб кетдим. Нуринисонинг гўдаги билан чекаётган азобларига бефарқ қараб тураолмадим. Унга ҳамроҳлик қилишга қарор қилдим. Одам тафтини одам олади ахир. Нурнисо билан биргалашиб Пахтакор туман Почта алоқа тармоғи бошлиғининг ҳузурига бордик. “Нуринисо ёлғиз она. Иқтисодий аҳволи жуда оғир. Фарзандига жўнатилган алимент пулини эса у Сиз етакчилик қилаётган почтадан бир ойдирки ололмай овора”, дея Почта алоқа бўлими бошлиғи Бошбек Шариповга арз қилдим. Гапларимни эшитган бошлиқ бошини чангаллади, бир оз тин олиб турди-да, сўнг бизга юзланди.
– Сиз ҳали бор йўғи бир ойдан буён ололмаяпман деяпсиз. Мана, бошқалар йиллаб ололмай овора. Сиз икки юз минг сўмни гапираяпсиз, бир-икки миллионлаб алиментларини ололмай юрган одамлар бор. Негаки, туманимизда нақт пул муаммоси ҳаммани қийнаб қўйган. Биргина алиментнинг ўзидан йигирма миллион қарзимиз бор. Менинг қўлимдан нима ҳам келарди, – деди Бошбек Шарипов бошини сарак-сарак қилиб.
– Сизнинг почтангизга келиб тушган пул почтанинг, яъни туманнинг чўнтагига кирган хисобланади. Почта тўлаб беролмаётган ўша алимент учун тушган 200 000 пул туманнинг чўнтагида йиллаб ўлик пул бўлиб турадими ёки бирон жойга мақсадли ўтказиладими?, сўурадим ундан.
Бошлиқ бу саволга жавоб бера олмади. Эҳтимол, ички сирини очгиси келмагандир? Ҳарҳолда Б.Шариповнинг ҳузуридан ноумид чиқмадик. Бошлиқ ходимларидан бирини чақириб Нуринисонинг 200.000 сўм алиментини тўғрилаб беришни тайинлади.
Йиллаб эгаларига етиб бормай, туманнинг чўнтагида сақланаётган пуллар кимнинг ҳамёнига хизмат қилмоқда? Ёки ўлик пул бўлиб турибдими?
Қандай ҳолатда сақланаётган бўлмасин, бундан алимент кутиб, йиллаб сарсон бўлиб қийналаётган аёллар ва тирик етим гўдаклар жабр чекишмоқда.
Призидентимиз томонидан 2012 йил «Мустаҳкам оила йили» деб эълон қилинди. Илоҳим оилаларимиз мустаҳкам бўлсин. Аёллар ва норасидалар алимент кутиб кўз ёш тўкмасин, кийналмасин.
Саида Қурбон
Жиззах вилоят,
Пахтакор тумани 17. 12. 2011.